THUPHUON 12 - PATHIEN LEKHABU THIENGTHO (BSI)

Numei leh Dragon

¹ Chun, thilmak lopi tak van ah a hung kilang ta a. Numei, nisa a kivan, a keng nuoia thapi um, aksi sawm le nih a kivan lallukhuk khu a hung um a.

² Amahnu chun nau a vawp a, nau nei dinga na leh thuokgim chun a kiko a kiko a.

³ Chun, thilmak dang van ah a hung kilang kit a; ngaitie! dragon san, lien tak, luchang sagih leh ki sawm nei, lallukhuk kikhuk hi a hung um a.

⁴ A mei chun van aksi, mun thuma khena mun khat a luoi a, lei chungah a paih tha ta a. Nau a suok phat phata a valh zawh theihna dingin, dragon chuh numei nau nei ding âng achun a ding zing a.

⁵ Tichun, chapa, nam chengcheng chung ding a thik tienga vaihawm ding a hun nei a. Himahleh, a cha chuh lak manga um in. Pathien leh a lalchutphah kawm achun lak toh in a um ta a.

⁶ Chun, numei chuh thaleka Pathien in amahnu dinga mun a guonggalhna mun achun a taimang a, zie tak a chuh ni sangkhat leh ni zanih leh ni sawmgup sung chuh a khawi theihna dingin.

⁷ Chun, van achun kidona a um a; Mikael leh a sawlchakte chun dragon chuh a do uh a; chun, dragon leh a sawlchakte chun le a do thuk uh a;

⁸ Himahleh, a zo ta puou a, tichun, amah leh a sawlchakte chuh van a a um uh chuh phal a hi ta puoi.

⁹ Chun, Dragon lien tak, gulpi têk, Diabol leh Setan a tih uh, khawvel pumpi thempa chuh a paih tha tau a. Tichun, amah leh a sawlchakte chuh leia paihthâk khawm in a um tau hi.

¹⁰ Chun, van a kipat chuh aw ngeih tak in, “Tuhin chuh I Pathien uh hukdamna leh, thilhih theihna leh gam chuh a hungtung tai! Tuhin, Krista chun a thuneihna chuh a sulang tai! Tuhin, I Pathien uh masanga dinga, I suohpihteu sun leh zan a hêk sekte khah, van apat a paihthâk in a um tau hi.

¹¹ Belamno thisan vang leh, thudik a hettuoksak thuu vanga guolzote a hiu a, a hinnau chan khawp leh thih ngama pang te a hi ngâl uh a.

¹² Zieziekchun, vante leh a sunga umte haw kipâk un! Himahleh, lei leh tuisuohgiet chung chuh a gik ie! Diabol chun, hun tawmcha mai a nei tai tih a kihet zieka, lungna mah mah puma, na kawmuh a a hung suktak ziekin,” a tih ka za a.

¹³ Tichun, dragon chun, leia paihthâk a hi tih a kihet phetin, chapa neinu numei chuh a sugimthei pan ta a.

¹⁴ Tichun, thalek muna a umna a chuh a lên lut theihna dingin, numei chuh mupi lien tak tha lang nih hi a pieu a, zie tak a chuh kum thum leh a kim chuh, dragon in a dona apat a chuh bit taka etkawl a a um theihna dingin.

¹⁵ Chun, dragon chun tui a tawh mang sak theihna dingin, numeinu nung lam achun, a kam apat in tui nasatak mai hi a phih dawk a.

¹⁶ Himahlele, lei in numei chuh a panpih a, a kam a ka a, dragon in a kam apat a tuia hun phih dawk cheng chuh a na valh zo zel ta a.

¹⁷ Khutichun, dragon chuh numei chung achun a lungna mah mah ta a, tichun, a suonte haw, Pathien thupiek haw zawp a, Isu hetpihna thu pawmte chuh do dingin a chiehdawk ta a.

¹⁸ Chun, dragon chu tuisuohgiet sehpho achun a ding ta a.