THUPHUON 11 - PATHIEN LEKHABU THIENGTHO (BSI)

Hetpihtu Nih

¹ Chun, tehna thik, tiengkhut tawbang khat hih ei pie a, tichun, kuo a him in, “Chieh inla, Pathien Ho-In leh, a maichâmte chuh va teh in, chun, a sunga Pathien hote chule sim in.

² Ho-In sung pawlam dai sung vang chuh teh ki’n, zie chuh Jentel te kawma piek dawk ahi ta ngâl a, amau haw chun Khawpi Thiengtho chuh tha sawmli leh tha nih tawhden un au.

³ Tichun, ka thu ei hetpih nih te chuh thu pie’ng ka ting, amau chun kawlladip puon silh in, ni sang khat leh za nih leh ni sawmgup sung thu gen un au,” a ti a.

⁴ Zie hetpih nih te chuh, olive thing nih leh thaumei tunna nih te, lei lalte masanga dingte chuh ahiu hi.

⁵ Amau chuh kuo’nle suknat a guot leh, a kam uh apat mei a hung pawt dawka, a melmateu chuh a sumang thei sek a; khutibang chun kuole, amau suknat guote chuh thaha um zel ding ahiu hi.

⁶ Ziete chun a thugen sung chenguh guoh zu lo dinga van khâk chak theihna thu a nei ui. Chuleh, tui thisan suoh sak theihna thu neihna le a nei uh a, lei hile gawtna tin chenga a ut phat phat uh a gawt theihna thuneihna le a nei uh ahi.

⁷ Chun, a hettuoksaknau thuphuon chuh a zawh tiengu leh, thampikuo-âwng apat sahang hung pawtdawk ding chun a mau chuh do intin, zo intin, sulum ina.

⁸ Tichun, a luong u chuh a Lalpau a khetdênnau, khawpi lien tak khawlai dung achun kital ina. Zie khawpi etsakna min ding chun, Sodom leh Aigupta a tih uh a hii.

⁹ Nam tina mite, phung tina mite, pau tina mite, chi tin laka mite chun a luong u chuh ni thum leh a kim sung en un tin uh, vuih mang phal puo’n au.

¹⁰ Zie mi nih te thihna ziek chun leia mite chuh kipâk un au. Kipahnate siem in, thilpiekte kithak tuoh un au, zie thiemgau nih te chun lei chunga umte chuh a sukgimtheih sek ziek un.

¹¹ Chun, ni thum leh a kim nung chun, Pathien apat a hinna hu chuh a sung u ah a lut a, tichun a ding dawk uh a, a mu taphawtte chun a lau mah mah tau hi.

¹² Chun, zie thiemgau nih te chun van a kipat aw ngeih tak a, “Zie tak ahin hung to un,” ti a kiko hi a zau a. Tichun, meitang lak achun van lam ah a kal to tau a; a melmateu in a et zing lai u chun,

¹³ zie lai tak chun, leiling nasatak in a hung kilîng a, khawpi chuh mun sawma khena mun khat chuh suksiet in a um ta a, chun, mi sang sagih suklup in a um tau hi. A thi mâwk cheng chuh a lau mah mah uh a tichun, van Pathien lopina chuh a pakcha tau hi.

¹⁴ Chunggikna nihna chuh a kichai ta a, ngaitie, chunggikna thumna chuh hung um vak ding ahi tai!

Pêngkun Sagih

¹⁵ Chun vânsâwlchâk sagihna chun a pengkun chuh a vak mût a, tichun, van apat in aw ngeih tak in, “Khawvel gam hih I Lalpau leh Krista gam a hung hi tai, amah chun kumkhuotuong in vaihawm ina!” a hun ti a.

¹⁶ Tichun, upa sawmnih le li, Pathien ânga a lalchutphah uh a chute chuh a khupbawk uh a,

¹⁷ “Aw Lalpa Pathien, Bangakai hihthei, Um lai tak leh umsapa! Na thilhih theihna lopitak chuh laa, Vai na hawm pat tâk ziekin, kipahthu ka hun gen ui!

¹⁸ Namte chuh lungnatna’n a dim tau a, Na lungnatna ni a hungtun tâk ziek leh, Mithi te chunga vaihawmna ni a hungtun tâk ziekin. Na sawntawlawi, na thiemgaute kipahman leh, nang hun ho, na mite chengcheng, a lien a neute kawma kipahman piek ni a hungtung ta ngâl a. Leisiet sumangthaite sukmangthaina ding hun le a hungtun ta ngâl a,” ti’n, Pathien a ho uh a.

¹⁹ Tichun, van a Pathien Ho-In chuh a hung kihawng ta a, a sunga Thugawlh Thingkuong chuh a hung kilang ta a. Ziephet chun, kawlphe le, aw le, vangi le, leiling leh gielpi nasatak a hung um zieng ta a.