THUPHUON 10 - PATHIEN LEKHABU THIENGTHO (BSI)

Vânsâwlchâk leh Lehkhabu ziel

¹ Chun, vânsâwlchâk dang khat, van apat a hung kum suk hi ka mu a. Meitang a kivan a hi a, a luchang kimvel achun sakhizozum a um a; a mai chuh nisa tawbang a hi a, a keng chuh mei khuom tawbang ahi.

² A khut achun lehkhabuziel neucha, hawnsa a chawi a. A keng changlam in tuisuohgiet a tawh a, a veilam in thingtâng a tawh a,

³ sakeibaknei kitum bangin ngeih tak in a kiko ta a. Khutia a kiko zawh chun, vangi sagihte chun a hun dâwng tau a.

⁴ Chun, van-gi sagihte’n a awu a hun suoh phet un, zik ka guot leh, “Vangi sagihte thugen chuh îm chak inla, zik dah ta’n,” ti’n van apat in aw ka za a.

⁵ Chun, vânsâwlchâk, tuipi chung leh leichung a ding ka muh pa chun, a khut changlam chuh van lam ah a tung a,

⁶ Kumkhawtuong a hingzingpa, vante, lei te, leh tuipi leh a sunga thil um chengcheng te siempa Pathien min sam in, “Hun um ta puo’n a!

⁷ Himahlele, vânsâwlchâk sagihte chun a pengkun uh a hun mût tieng uh leh, a sawntawlawite kawma a phuon tâk sa guolin, Pathien in a thil guon thuguk chuh hihbukim ta’n a,” ti’n, a tiem ta a.

⁸ Chun, van apat a aw ka zak khan ei hun hopih kit a, “Tuisuohgiet leh thingtâng chunga ding, vânsâwlchâk khuta lehkhabuziel hawnsa khuh va la ta’n,” a tih ka za a.

⁹ Tichun, vânsâwlchâk kawm achun ka va chieh a, a kawmah, “Lehkhabuziel neucha khah nei pie’n,” ka va ti a. Amah chun ka kawmah, “La’n la, ne zo kêi ah, tichun, na gilpi achun hung kha’n tin, na kam achun khuoizu guolin thum ina,” a ti a.

¹⁰ Chun, vânsâwlchâk khuta lehkhabuziel neucha chuh ka la a, ka ne zo kêi a, tichun, ka kam achun khuoizu guolin a thum a, himahlele, ka nek zawh phetin ka gilpi achun a hung kha ta a.

¹¹ Chun, ka kawmah, “Mi tamtak te, nam tamtak te, pau tamtak te, leng tamtak te chungchâng thu phuong kit inla,” ei ti a.