THUGENPA 8 - PATHIEN LEKHABU THIENGTHO (BSI)

Lengte Thupiek chuh Zawp in

¹ Mi pil chun thil umzie a hethiem sek a. Pilna chun a mel a sutai a, a maichang thimna chuh a beimang sek hi.

² Pathien masanga na thutiem ziek chun, leng thupiek khawksa dingin a hun tih ahi.

³ Leng chun a nawp nawp ahih thei a, tichun a umna apat chun kikiengkawih inla, zie tawbang mun lauh-um a chun um sawt ki’n.

⁴ Leng chun thu a nei a, kuoma’n, Bang hih na hi? a ti ngam puou hi.

⁵ Kuole a thupiek zawp tapoh chun sietna tuok puo’n tin; mipil chun ahun leh amun a hethiem sek hi.

⁶ Thil chengcheng hin hunbi leh lampi a nei chiet u a, ahih ziekin, mihingte chung achun buoina nasa tak tak a tung sek hi.

⁷ Thil hung um ding kuoma’n I hethei puou a, a hung um ding dân chuh kuoma’n ei hilh thei diek puou hi,

⁸ Huih chunga kuoma’n thu a nei thei puoh a, zie guol chun, thihna ni chung ale kuoma’n thu a nei thei puou a, kido lai le mawk chawlhsak theih ahi puoh a; gitlohna hih te khule kuoma’n a sawl uh ahi puoi.

Mi nunsie leh Mi diktat

⁹ Zie khawvel a thil kihih haw cheng hi ka lungthim in ka suongtuoh viela, mi khat chun midang khat sietna dingin mi khat chungah thuneihna a suoh sek hi tih ka mu a, ziehaw cheng hile ka gel kimvel veka.

¹⁰ Chuleh, minunsiete a thân u a vuiha um chuh ka mu a, mun thiengtho achun a lut in a pawt u a, zie thil ahih na khawpiteu chuh a pakchau a. Zie hile bangmah lo mai ahi.

¹¹ Thil phalo hihte chunga thutanna kintaka bawl ahih sek loh ziekin, mihing lungthim chuh thil phalo hih nawpna’n a dim hi.

¹² Migilo thil gilo zakhat vei hih a, sawttak damte sang chun; Pathien lauh chuh a pha zawi tih ka hêi, a masanga chuh lauthawng taka ding ding ahih ziekun.

¹³ Mi gilote dingin vang thilpha a um puoi A hinnau chuh lim bei pai ding tawbang ahi a, Pathien a lauhna a nei puoh ngâl u a.

¹⁴ Himahlele, zie chule bangmahlo mai ahi. A ziek chuh, khawvel a thil umte hi en in a châng leh mi dikte chun mi gilote thuok ding a thuok u a, mi gilote chun mi diktatte chan ding chuh a mu sek ui. Zie hile bangmahlo mai ahi.

¹⁵ Zieziekchun, khawvel a hin mihing a dingin a nêk a, a dâwn a, nuom taka a um sanga phazaw bangmah a um puoi tih ka mu a; zie chuh Pathien in a piek khawvel a a damsunga a sepgimna gah chuh ahi ngâl a.

¹⁶ Mi pil hung hi ding leh, khawvel a thil um chengcheng het guoa sun le zan a ip lo a ka vak ngaihtuoh lai chun;

¹⁷ Pathien thilhih chengcheng, ni nuoia a thilhihte chuh hetdawk ding guol ei puoi tih ka he ta a. Mihing in bang tawbang in bawl mahleh, mudawk diek puo’n a; Mipil in het kigingcha mahleh, he dawk zo diek puo’n a.