THUGENPA 7 - PATHIEN LEKHABU THIENGTHO (BSI)

Chitna

¹ Minphatna hi thau gimlim man tamtak sangin a phazaw a; chun, thihni chule pienni sangin a phazawi.

² Lusûn In a chieh chuh, guolvakna In a chieh sangin a phazawi, ziehi mi cheng cheng a dinga tawpna ahih ziekin; zie hi mihingte lungthim put ding dân chuh ahi.

³ Nuihna sangin lungkhamna chuh a phazawi, mel achun lungkhamna kilang mahleh hetna a tat hiem hi.

⁴ Lawpna thil mai ngaihtuoh mi chuh mingawl ahi a; mipil chun thihna chanchin le a ngaihtuoh sek hi.

⁵ Mipil in ei gaihna chuh mi ngawlin pahchakna la ei sakkhum sangin a phazawi.

⁶ Mingawl nuih chuh mei laka ling kihal puok set set tawbang ahi a, umzie bangmah a nei puoi.

⁷ Gimtheihna ziekin mipil chule a ngawl thei a, Gawlhgukna chun lungthim a subuok hi.

⁸ Thil kipatna sangin a tawpna chuh a phazaw a; Lungthima thuokhatna chuh chapona sangin a phazawi.

⁹ Lungna pai zieng ki’n, lungnatna chuh mingawl angsung ah a kikhawlkhawm sek hi.

¹⁰ “E khai, tulai sangin tuma lam khan thil bangkim a phazaw hilo ahim?” ti ki’n. Zie chuh dawtna pil a kipan ahi puoh ngâl a.

¹¹ Pilna hi go luoh ding guola pha ahi a; zie chuh ni eng mu khate hamphatna ahi.

¹² Pilna na kivenbit sak chuh sumlepai kivenbit sak tawbang na hi a, hetna neite chuh hinna a pie a zie chuh a phatchuomna ahi.

¹³ Pathien thilhihte hi ngaihtuoh in, a kawisa a a siem chuh kuo a hihzang kit thei ding?

¹⁴ Na kibutit nihaw a chun kipâk in la, melma na neih lai in kingaihtuoh in, Pathien in khat guola chuh a dang chule a siem ahi; khutichun thithei mihing in a nunga thil hung um ding a muhdawk theih loh na dingin.

¹⁵ Ka hinkhuo bangmahlo sung ahin thil bangkim ka mu ta a, mi diktatte chuh a diktatnau ah a beimang u a, chun mi nunsiete chuh a thil phalo hih kawm un sawttak a dam u a.

¹⁶ Dik kisa taluo ki’n la, kipilsak taluo diek ki’n, bang zieka nang leh nang kisusie ding na him?

¹⁷ Nunsie taluo ki’n la, ngawl taluo diek ki’n, bang zieka a hun lo taka thi ding na him?

¹⁸ Khat zaw na tûk det chuh a phâi, ahi’n khat chule thahsuok diek lo in; Pathien kihchate chuh a nih nih a chuh lawhting ding ahi ngâl u a.

¹⁹ Khawpi a vaihawm sawmkhat sangin, pilna chun miching kawmah hatna a pie tam thei zawi.

²⁰ Khawvela hin kuomah thil sukkhelh nei kha lo a, thilhih dik zing a um puoi.

²¹ Mi thugen cheng ngaihsak ki’n, na ngaihsak chun, na suokte hun vauna aw za kha’n la,

²² Chuleh, nangmah ngêi inle mi dang tamtak vei na hamsiet tai tih na lungthim in a hezing hi.

²³ Pilna mang in ziehaw chengcheng hi ka patepa, pil ta’ng ka ka ti a, himahleh a gamla khawp mai hi.

²⁴ Zie chuh a gamla a, thuk tak ahih ziekin kuo a mudawk zo ding?

²⁵ Ka lungthim chuh pilna leh hetna delh in thil umdan haw hechien a hawldawk dingin ka kipie a, himahleh, ngawlna leh thil manloh ahi tih ka mudawk tai.

²⁶ Thihna sanga lauh-um zaw ka muh chuh numei thang a pang, a lungthim chuh thang leh lên, a khutte chuh thikkawl tawbang ahi a; Pathien sukipak te chuh amah apat chun suokcha’n tin, himahleh, mi gilote chuh a puimang sek hi.

²⁷ Ahi, “Thil ka hawlna achun zie umzie chuh neuchah ka hun mudawk tai,” ti’n thugenpa chun a gen a.

²⁸ Ei hilhchien thei ding thil dang ka hawl kit a, himahlele khatchale ka mu puoi. Mi sangkhat lak achun pasal khat mai ka mu a, numeite lak achun vang ka mu puoi.

²⁹ Entie, ka muhdawk chuh zie mai hi ahi; Pathien in mihiem hi zang takin a siem a, himahleh, amau hin thil tampi a kihawldawk ui.