THUGENPA 5 - PATHIEN LEKHABU THIENGTHO (BSI)

Kintaka Kipautiem Phatloh dan

¹ Pathien Ho-In a na chieh tieng leh kivengpha’n. Mi ngawlte’n kithawihna a piek sang un, thu ngaitha dinga chieh chuh a pha zaw ngâl a; thilpha leh thil phalo a khendang puoh ngâl u a.

² Na gen dawk man phatak in gel inla, Pathien kawmah kinawh takin thutiem bawl ki’n. Amah chuh van a um a hi a, nang chuh leia um na hi a; zieziekchun thu tawmcha gen zaw’n.

³ Mang chuh buoina tam zieka hung um ahi a, a thugen a kipatin mingawl ahi tih het ahi sek hi.

⁴ Pathien kawma thu na tiem tieng leh, na thutiem chuh nit in, kithepna chuh a kipahpih puoh ngâla. Na thutiem chuh supiting tei in.

⁵ Na thutiem na muolsuoh loh sang chun, thu na tiem loh chuh a phazawi.

⁶ Na thugen chun gitlohna ah hun puilut kihen, Angel masanga le a diklo ahi ti diek ki’n. Bang zieka Pathien chuh sulungna a, na khut sepgim gah chuh sukmang sak ding na him?

⁷ Mang a tam poh leh thu maimai a tama, thu mantheihlo a tam saka himahleh, nangin chuh Pathien na kihchak ding ahi.

Hinkhuo hi Bangmahlo ahi

⁸ Mi gimtheite nuoisieha um leh, gamsung vaihawmnate a dikna a um loh inle maksa diek ki’n. Dinmun sangzaw a dingte chun le, amau haw sanga sangzaw mitmei ven ding a nei ui;

⁹ Himahleh, thil cheng hi ngaihtuoh tie, gam phatchuomna chuh ziehi ahi, Leng chule lo masuok a kinga ahi a.

¹⁰ Dangka sum ngaina mi chun dangka sum ah lungkimna mu diek puo’n tin; hauhsakna ngaina chun le alawk deihkhawp mu diek puon a. Ziehi le bangmahlo mai ahi ngâl a.

¹¹ Neihlelam a pun phawt leh, a ne ding a pung a, mita a muh mai tihloh chuh a neipa ding chun banga a phatchuomna um diek?

¹² Na semgim chuh ne tawm in ne tam leh, a ihmut a nuom seka; Himahleh, mi hausa chun vang a neihzawhna chuh a ihmut loh lawh sek hi.

¹³ Ni nuoia thil phalo tak khat ka muh chuh; mihing in hauhsakna amah sietna dinga a kikawih hi ahi.

¹⁴ Himahleh zie chuh thil manloh in a subei u a, a chateu kawma piek sawn ding bangmah a nei ta puou hi.

¹⁵ A nu sûl a a hung pawt bang khan sangawn in vaikit intin, a sepgim gah bangmah a khut in kichawih diek puo’n a.

¹⁶ Zie hile lungkham um tâwp chuh ahi, a hung bang tak u khan a chieh kit u a; gimthei taka na a sep u hi banga phatchuom na a muh uh?

¹⁷ Zie mai chule hilo in, a damsung chenguh lungkhamna, natthuokna, leh lungna kawmin thim lak ah an a neu a.

¹⁸ Thilpha leh hawih khawvel a ka muh chuh Pathien in damsung hun chawmchah a piek sunga mihing in a sepgim gah chuh a nêk a, a dawna nuom tak a a chen chuh ahi; zie chuh a chantawk ahi.

¹⁹ Mi kuo hitaleh Pathien in hauhsakna leh neihlelam a piek a zie achu lung-awi taka a um a, a dinmun a kipahna neih chun, zie chuh Pathien thil piek ahi.

²⁰ Pathien in kipâk taka um a phalsak ziek chun, a damsung chawmchah sung chun lungkham taluo lo ding ahi.