THUGENPA 4 - PATHIEN LEKHABU THIENGTHO (BSI)

Ni nuoia Gitlohna

¹ Tichun, ka vak enviel a ni nuoia gimtheihna umte chuh ka ngaihtuoh a. Sukgimtheih a umte mittui chuh entie, kuomah a panpih ding a um puou hi. A sugimtheite chun thuneihna nasa tak a nei u a, amau chula a thamuon ding a um puou hi.

² Zieziekchun, mihing a na chieh a thisate chuh awhchâk-um ka sa zawi; dama um nalaite sang chun nuom a sa zaw ngâl u a.

³ Ziete nih sang chun le, a pieng nailote, zie khawvel a diktatlohna umte mu kha lote chuh a phazaw nalai ui.

⁴ Sepgimna cheng leh, muh beh ding utchaknate hi ki-awhchâk tuohna zieka hung um ahi tih ka he tai. Ziehi le bangmahlo leh huih delh tawbang ahi tih ka he tai.

⁵ Mi ngawl chun a khut a kilhtuoh a, amah taksa ngêi a ne a.

⁶ Lunggil gimthei tak leh semgim taka khutdim nih sang chun, lungthim chawldam taka khutdim khat neih chuh a phazawi.

⁷ Tichun, ka kihei a, ni nuoia hinkhuo hi bangmahlo mai a hihna ding khat ka vak mu kit a.

⁸ Mi khat chapa le neilo, suohpih le neilo a um a; himahleh gim takin na a sem a, a thil neih te chule a mit taina kham ahi diek puoh a. “Ka nawpchenna ding chân lawh hiela kuo a dinga semgim ka him?” ti’n a kidawng a. Ziehi le bangmahlo mai leh a thawna buoina mai ahi.

⁹ Mi nih chuh khat sangin a phazaw a, a kigawm u a na tamzaw leh phachuom zawa a sep theih ziekun.

¹⁰ A khatzaw chuh puk lele, a guolpa chun a panpih a. Himahleh mi khat mai a um a, a panpih ding a um lote chuh a chunguh agik hi.

¹¹ Zielo chun le mi nih a kuolkhawm u chun a kisulumtuoh u a, khat mai chuh bangti’n ahim a kisuklum theih ding?

¹² Mi khat in khat chuh a zo maithei a, mi nih in khat chuh nuom taka zo ding ahi ngâl a. Khauhuol zang thum kihekkawp chuh baihlam takin a tan zieng puoi.

¹³ Leng teksie ngawl tak mi thuhilhna la thei talo sang chun, khangdawng chagah pil tak chuh a pha zawi.

¹⁴ A lalgam sunga mi chagah insung a pieng hi zieng lele, suongkul apat in le vaihawm dingin a hung pawt thei hi.

¹⁵ Ni nuoia mihingte hi ka vak ngaihtuoh a, khangdawng leng thasanga hung pang le a um hi tih ka mu a.

¹⁶ A mipi puihhuoite chuh a tâwp a um puoh a, Khutisa chun le a nung u a hung um dingte chun le amau chuh pakcha diek puo’n a. Zie hile bangmahlo mai leh lungkhamna ahi.