THUGENPA 12 - PATHIEN LEKHABU THIENGTHO (BSI)

¹ Khangdawng na hih lai in nang hun siempa chuh hezing in, ni phalote a hung tun ma leh, “Kipahna himhim ka nei puoi,” na tihna ding kumte a hung naih ma hin.

² Nisa te, vak te, tha te, aksi te a hung thim ma leh, guoh nunga meipi a hung vaihkit ma hin.

³ Zie tieng chuleh na bân nang hun veng pên chuh kithing intin, tu a na keng hât nalai chuh hung zawi intin, an nekna dingin na ha chuh tawm taluo ta’n tin, na mit inle kichien takin mu thei ta puo’n la.

⁴ Khawpi a thawmgi chuh za tapuo’n na tin, buh gawihgawpna khawl gi leh thil gi dang dang chule za tapuo’n na tin; vacha hâm git in khanglo ta’n la.

⁵ Ahi, chung sang chuh lau in natin, lampi ah lauhna a um a, nanga dingin vakviel chuh lauhthawng um hung hita’n tin, na sam hung kâng intin, nang mah kidokhang haksa hun sa ta’n na tin, na utchakna chengcheng chuh bei ta’n a. Mi chuh a kumsawt In zuon a chieh in; kawtthêl haw ahin lusûnte chuh vakviel ta’n au.

⁶ Dangkaguo thikkhau a tan a, sana belte chule a hung gawp a; Tuikul a tui khaihdawkna khaute chuh a tan a; tuibel haw chuh a kêk masang hin.

⁷ I taksau chuh a hih na ngêi banga um dingin lei ah vaikit in tin, chun, thagau chuh a piepa Pathien kawmah a vaikit in a.

⁸ Thugenpa chun, “Bangmahlo mai ahi, thil chengcheng hi bangmahlo mai ahi,” a ti a.

Mihingte Nasep ding pên

⁹ Thugenpa chuh mipil a hih ziekin a thil hette chuh mi kawmah a gen zel a. Ahi, a ngaihtuoh a, a sut a, thuching te chuh a sim a, chuleh a dikna he dingin phachuomngai takin a patep zel a.

¹⁰ Thugenpa chun thu ngaihnawp-um tak muhdawk guon a hawl a, thutak haw chuh kichien tak leh diktak in a zik dawk hi.

¹¹ Mipilte thugen haw chuh sutna thik tieng guolin a hiem a, a thupil lâkkhâwmteu chuh thikkilh dettak a khet lut banga det ahi a; zie chuh I bawn u a ei chingpa Pathien in a piek ahi.

¹² Ka chapa, ziehaw cheng bân ahin na et phat ding thil khenkhat a um hi: Lehkhabu zik hin tâwp a nei puoh a, sim tam takluot chule taksa dinga gimtheih na phet ahi.

¹³ Ziehaw chengcheng khaihkhawmna chuh ziehi ahi: Pathien lau inla, a thupiek zawp in, zie chuh mihing te nasep ding pên ahi ngâl a.

¹⁴ I thilhih chengcheng uh, a sie leh a pha le, a gûka thilhih cheng le Pathien in ei vaihawm sak ding ahi ngâl a.