THUCHINGTE 9 - PATHIEN LEKHABU THIENGTHO (BSI)

Pilna leh Ngawlna

¹ Pilna chun In a sa a, khuom sagih a phut a.

² A ganchate that in, uain tawh a chawkhel sek a; a dawhkhâng achun nek dingte a lui sek a.

³ A suok nungakte chuh a sawldawk a, khawpi a munsang haw achun a kiko viel sek u a:

⁴ Mimawl cheng chengte haw, zie lama hin hung un, ti’n, mingawlte kawm achun;

⁵ “Hung unla, ka chângthâk hi neu inla; ka uain helsa hi dâwn un.

⁶ Nang haw mingawl te haw, mingawngte lampi chuh taihsan unla, hing un. Hetthiemna lampi chuh zui zawu in” ti’n.

⁷ Mi muhsit chîngte hilhgaih chun gaihthukna tuok untin; kuole migilo hilhgaih chun liemna a tuok sek hi.

⁸ Mi muhsit chîngte chuh hilhgaih ki’n hun mudah kha’n au; mipil chuh hilhgaih leh chin, hun lungsiet ding ahi.

⁹ Mipil na hilhgaih chun hung pil zawsem intin; mipil sinsak leh chin, hetna hun hau zaw sem ding ahi.

¹⁰ Lalpa kihchak hi pilna bulpi ahi a; Pathien thiengthote hetna chuh hetthiemna ahi.

¹¹ Kei ziekin na nite chuh hihsau hi’n tin; na damsung kumte chuh behlap hi’n a.

¹² Na pil chun nanga dinga pil na hi a; muhsit chîng mi na hih chun, nangmah ngêi in thuok inla.

¹³ Numei ngawl chuh a um hiet hiet thei puoh a; a mawl a, zahchâkna a he puoi.

¹⁴ A kawtkhak ah a chu sek a, khawpi mun sang haw a chutphah haw achun tawh.

¹⁵ Lampi a mi vakviel taphawtte chuh a sam in; zie lampi a hung vakviel taphawtte chuh.

¹⁶ “Nanguh mi mawlte leh hetna neilote chuh zie lam a hin hung un,” a ti sek hi,

¹⁷ “Tui kiguk thawh chuh a thuma; A gûka chângthâk nek chuh a lim hi,” a ti a.

¹⁸ Himahlele mithi haw chuh zie chun a um ui tih a he puou a; zie a zin te chule Sheol thuk tak sung ah a um ui tih a he diek puoi.