THUCHINGTE 8 - PATHIEN LEKHABU THIENGTHO (BSI)

Pilna Phat dân leh Pahchakna

¹ Pilna chuh kiko in, hetthiemna chun tâng a sam puoh a ahim?

² Lampang mun sang haw chung leh, lamkathuom vel ah a ding sek a.

³ Khawpi lutna haw leh, a lutna kawtkhak bul haw achun ngeih tak in a kiko sek a.

⁴ “Aw nang haw mihingte haw, ka hun sap na hiu hi, ka aw hi mihing chate ding ahi.

⁵ Aw nang haw mingawngte haw, pilna hi hethiem unla, nang haw mingawlte haw, pilna lungthim nei mi hung hiu in.

⁶ Ngaiun, thil lopi haw gen ding ka hi, ka kama thu pawt te chuh thudik ngên hi ding ahi.

⁷ Ka kam chun thudik gendawk intin, nunsietna chuh ka kama dingin thil kihdak-um ahi.

⁸ Ka kama thu pawt chengcheng chuh thudik ngên ahi a, zie chun, zuou ahim, thu kâwi ahim a um puoi.

⁹ A hechiente ding chun a kichien vek a, hetna mudawkte ding chun a dik vek hi.

¹⁰ Dangkaguo sangin ka sinsakna hi pawm unla, sana deihum tak sangin hetna hi nei zawu in.

¹¹ “Suongmantam sangin pilna chuh a phazaw ngâl a; thil utchak um tincheng tawh tehkal theih ding ahi puoi.

¹² Kei pilna hin pilna achun ka khawsa a, hetna leh ngaihtuoh thiemna chuh ka mudawk ta a.

¹³ Lalpa kihchak chuh gitloh hawt hi ahi a, chapona leh kiletsakna chuh ka haw a, gitlohna lampi leh pau chapo chu tawh.

¹⁴ Thil ka guonggalh a, ka supiting a, hetthiemna ka nei a, hatna le ka nei hi.

¹⁵ Lengte chun kei ziekin vai a hawm u a, vaihawmte chun thudik a thutan dingin.

¹⁶ Lei chunga thuneite chengcheng chun kei panpihna’n vai a hawm u a; thugen thiemte leh miliente cheng in le.

¹⁷ Ei lungsiet taphawt chuh ka lungsiet a, gunchuh taka ei hawl taphawt chun ei mudawk ngêi in au.

¹⁸ Hauhsakna leh zahumna chuh ka kawmah a um a, hauhsakna leh felna sawt daih tak mai chuh.

¹⁹ Kei apat a na muh chuh sana sangin a phazaw a, sana thiengkei sangin a phazawi; chun, ka lak lut chule dangkaguo sangin.

²⁰ Kitûpna lampi chuh ka hawh a, diktatna lampi chuh ka zui a.

²¹ Ei lungsiet te chuh hauhsakna ka pie a; a inteu chuh gothil in ka hihdim sak ahi.

²² “Lalpa chun a nasep kipat tûngin ei siem a, tuona tânga a thilsiem masa chuh ka hi.

²³ Kum tamtak chieh ta akhan siem in ka um ta a, lei a kisiem ma him in le.

²⁴ Tuisuohgiet haw um masang in siem in ka um ta a; tuinakte um masang in ka pieng tai.

²⁵ Tang haw ana dindawk ma leh, muol haw a um ma pek in le ka um ta a,

²⁶ Gam leh leisiette a na siem ma leh, khawvel a pîlnel a um pat masang in.

²⁷ Vante a sukdet lai khan zie tak achun ka um ta a, tuipite gamgi a siem lai khan.

²⁸ Chunglama van a sukdet lai leh, tuipi thuk tak haw a siem lai chun,

²⁹ Tuipi a dinga gamgi a zam lai leh a tih khela lien lo dinga thu a piek lai khan.

³⁰ Zielai chun a kawm achun nasemte lawiupa bangin ka um a, ni chenga a kipahnau ka hi a; a umna achun kipâk in ka um zing hi.

³¹ Lei chung chen theihna achun kipaka um in, ka kipahna chuh mihing chate chungah ahi ta a.

³² “Zieziekchun tuhin ka chapate haw, ngaithau inla, ka thugente ngaiun, ka lampi zuite chuh a kipâk u a,

³³ Sinsakna chuh ngaithau inla, ching thei un; ngainep himhim kiu in.

³⁴ Ka thu ngaitha taphawt chuh mi hampha ahiu a; ka kawtkhak bula nichenga chuh a; ka kawtkhak ngak zingte chuh.

³⁵ Kuole, ei mu taphawt chun hinna a mu a, Lalpa deihsakna chang ahi.

³⁶ Himahleh, ei mulo taphawt chuh amah ngêi kisuliem a hi a, kuole ei haw taphawt chun thihna a deih zawu hi.”