THUCHINGTE 7 - PATHIEN LEKHABU THIENGTHO (BSI)

¹ Ka chapa ka thu haw vawp inla, ka thupiek haw hi khawlkhawm in.

² Ka thupiek haw vawp inla, tichun hing inla, ka danhaw chuh mitnaucha bangin vawp in.

³ Na khutzunghaw achun but inla, na lunggil dawhkan pek chung achun zik ah.

⁴ Pilna kawm achun, “Ka suohpihnu na hi” ti’n la, hetna chuh na guolpha bangin nei in.

⁵ Melhetloh numei apat leh, a kamsuok a mithep hât nam dang numeite lak apat hun vengbit in a.

Numei Thanghuoi chuh

⁶ Ka in vathangkalh apat chun ka vak dâk dawk a,

⁷ Hetna tam neilo tangval lak chuh ka vak en a, a laku achun tangval mawl diek khat ka mu a.

⁸ Numei kuo ahim umna khawlai ningkawi lam achun a chieh suk a, a In zawtna lampi achun a chieh a.

⁹ Nitâk lam, mielzul in, khawthim nung chun, zan thim nuoi achun a vakviel hethut a.

¹⁰ Tichun ngaitie, zie tak achun numei, nawhchizuok van a kivan leh lungthim chitgil tak a kituokpih a.

¹¹ Numei hangsan tak leh zahchâkna bei; khawlai a mawk vak viel viel mi ahi a.

¹² Khawlai ningthip a mi ngaka ding leh, lamkathuom vela mi ngaka ding sek ahi.

¹³ A banin tangvalte chuh a kâwi a, a châwp a, a mit uh chang takin a en a,

¹⁴ “Chamna kithawihna lân ding ka hi a, tuni hin ka thutiem ka hih zo ta a;

¹⁵ Zieziekchun nang hun mu dingin ka hung hi, hun muh kal ka ngaklah a, zie hin ka hun mu ta a,

¹⁶ Ka zâlkhun ah puonphah hawih tak, Aigupta gam apat a kila puon nem, ka phah a,

¹⁷ Ka zâlkhun chuh gimlim ka thehkhum a, murra te, begaw te leh thingguithak in.

¹⁸ Hung inla, zankhuo’n, deihkhawp set in lungsietna chên hiti; hehpihna’n kipawm hiti,

¹⁹ ka pasal In ah a um puoh a, khuol gamla tak ah a zin ngâl a.

²⁰ Paisa tamtak a keng a, thalik lam leh hungkit hâm ding ahi,” a ti a.

²¹ A kamthiemna chun a zawl pai a, a mûkzawlna chun a thempuk ta a.

²² Tichun, a kipana amah nu chuh a zui ngâl ta a; bâwngchal a thatte kawma a chieh bang leh, sazuk in a awkna thâng a zawt guolin,

²³ Vacha’n a thihna ding ahi tih helo a, thal in a thin a kap kek macheng a, a awkna ding thanglam a zawt guolin.

²⁴ Zieziekchun, ka chapate haw, ka thu ngai unla, ka kama thu pawt haw hi khawksak un.

²⁵ Zie tawbang numeite chun na lungthim uh zo kihen la, a lampi haw achun le chieh diek kiu in.

²⁶ Mi tam tak a susie tau a, a lampi achun le kihei ki’n.

²⁷ Amahnu In chuh Sheol zawtna lampi a hi a, thihna phuol a lut ahi.