THUCHINGTE 6 - PATHIEN LEKHABU THIENGTHO (BSI)

Vaulawkna Dangte

¹ Ka chapa, midang te leibatna chunga mawhpuo dinga na kitiem a, mi khat kienga na kigen-awkna na neih chun,

² Nangmah thugen ngeia mata um na hi a, na kama thutiem ngêi in ahun mat na hi.

³ Khuti-ahih chun ka chapa, zie pa khut achun na um ta a, himahleh ziehi na pawtdawk theihna ding dân chuh ahi: A kawm achun kin takin chieh inla, hun thahdawk dingin va ngên in.

⁴ Na mit chuh ihmut sak ki’n la, na mitkhuchung haw le kichawlhsak diek ki’n.

⁵ Gamvakte khut apat a vacha ahim, sakhi ahim a suohchak bang mai in pawtdawk in.

⁶ Nang mi thadah, sikmite kawm a khun chieh inla, a hindan teu khu ngaihtuoh inla, pil in.

⁷ Amau chun lawiupa a nei puou a, hausa ahim, vaihawm ahim a um diek puou hi.

⁸ Himahlele nipi sungin an a kikhawlkhawm u a, phalbi a dingin kigingkhawl san a um sek ui.

⁹ Aw thadah, bang chan ahim na kuol ding? Na kuolna a kipat in bangtik leh tho ding na him?

¹⁰ “Kuol tadih ing ka ting, chawmkhat ipmu kit ing ka, khut angkilh in kichawl tadih ing ka,” na tih chun.

¹¹ Zieziekchun, chatgahna chuh gucha bangin na kawmah hung in tin, chun, tâksapna chun gâlvan a kivan bangin hun tuom ina.

¹² Mi mantheihlo, mi gilote chuh zuou gen in a vak viel sek u a.

¹³ Mi a mit sik-ât u a, keng in thu a gen u a, a khutzung un mi a hilh sek ui.

¹⁴ A lunggil u achun chapona a um a, thil gilo a ngaihtuoh u a, kituoklohna chi a tuh sek ui.

¹⁵ Zieziekchun, a lungzînna chuh hung tung phut intin thakhat in nasa taka sukliem in um in a.

¹⁶ Lalpa’n a zakdah tak thil gup a um a, ahi, thil sagih amah a dinga kihdak um ahi.

¹⁷ Mit hah chapo leh lepchieh haw, pawikhawih lote thisan suohna khut haw,

¹⁸ Thil phalo ngaihtuohna lunggil leh thil phalo hih dinga kalzâng haw hi:

¹⁹ Hetpih diklo a lepchieh gen haw, suohpih kikala kituoklohna tuh sekte hi.

Zawlsai lo dinga Vaulawkna

²⁰ Ka chapa, na pa thupiek hi vawp phan la, na nu hun sinsakna hile ngainep diek ki’n.

²¹ Na lunggil achun vawp zing inla, na ngâwng ah âwk zingin.

²² Na chieh phat leh nang hun pui intin, na ihmut tieng leh nang hun veng in a. Tichun, na hung khanlawh tieng leh hun hopih in a.

²³ A thupiek teu chuh thaumei ahi a, a thuhilhnau chuh vak ahi ngâl a. A hilhgaihna thununna chuh hinna lampi ahi ngâl a.

²⁴ Midang te zi apat a hun veng ding leh, numei zawlsainu kamthiemna apat a hun veng dingin.

²⁵ Na lunggil chun a hawihnau chuh utcha kihen la, a mitmei u chuh kimat sak diek ki’n.

²⁶ Aziek chuh, numei zawlsai ziekin pasal topi chângthâk thêm a suok theia, zawlsainu chun hinna lul tak chuh bangmah lo a suoh sek hi.

²⁷ Mi’n a puon ka lo in bangti’n a ângsung ah mei a pawm thei dem?

²⁸ A hihloh leh, a keng ka lo in, mei-âm chungah mi a chieh thei dinga ahim?

²⁹ A invengte zi kuolpih chuh zie tawbang chuh ahi a, a sukha taphawt chuh gawt loh in um puo’n a.

³⁰ Gucha’n a gilkiel lai taka, a nek ding, a gûk chun mi’n a musit puou a.

³¹ Himahlele, matdawk ahih chun a leh sagih in din intin, a neih chengcheng a piek ding ahi.

³² Kuole zawlsaih taphawt chuh hetna bei ahi a, zie tawbang hih te chuh amah leh amah kisusie phet ahiu hi.

³³ Liemna leh muolphona tuok in tin, a muolphona chuh sukmang hi puo’n a.

³⁴ Itthikna chun pasal a sulungna a, phuba lâk ni chun taluo um puo’n a.

³⁵ Kitatna sum himhim pawm puo’n tin, bang tienga thilpiek lopi le pawm hi puo’n a.