THUCHINGTE 5 - PATHIEN LEKHABU THIENGTHO (BSI)

Zawlsaihna Thu a Vauna

¹ Ka chapa, ka chitna hi khawksak inla, hetthiemna a hin na bil dawh in.

² Tichun, umdan pha hun he’n na tin, na thugente chun na hetna sulang in a.

³ Numei thanghuoi mûk chuh khuoizu’n a va a, a kam chuh sathau sangin a nâl zawi.

⁴ Himahleh, a tawpna vang chuh gimtheihna leh natna ahi a, chemzâm hiem tuok sangin a hiem zawi.

⁵ A keng chuh thihna achun a kum suk a, a kalsuon chun thihna khawvel a zuon hi.

⁶ Tichun hinna lampi zang tak chuh a zui kha puoh a, a vakvai a, amah chun la bangmah a he puoi.

⁷ Zieziekchun tuhin, ka chapa, ka thu ngai unla, ka kam a thu pawt te kiheimangsan ki’n.

⁸ Zie tawbang numei apat chun kikiengkawih inla, a In kawt chule va naih ki’n.

⁹ Khutilochun na zahumna chuh midang te chang untin, tangval lai takin lungsietna neilote khut achun piek in um kha’n la.

¹⁰ Hetkhakloh mite chun na hauhsakna chuh lau intin, na sepgim gah chuh midang te chang in au.

¹¹ Na taksa leh na thazung a chauh tieng leh, Na hinkhuo tawpna ding achun thum leh mau in um inla.

¹² “Bang zieka thununna kha ka deih loh a, ka lunggil a hilhgaihna kha ka ngaihnep ahi die aw!

¹³ Ei sinsakte thu ka na zawp puoh a, ei sinsakte lama le ka bil ka na dawh puoh a:

¹⁴ Mipi kikhawmkhawmte lak ahin, muolpho na dinmun a ding ka hi,” hun ti ding na hi ngâla.

¹⁵ Nangmah tuikhuk ngêi apat in tui dâwn inla, na tuisutdawk apat a tui luong ngêi chuh thal in.

¹⁶ Na tuinak haw chuh luon zak sak a um in khawlai dunghaw achun tuinak haw chuh zak ding maw?

¹⁷ Nangmah maia hi hen la, na kawma hetloh mite ding hi kihen.

¹⁸ Na tuikhuk chuh vangsak in um hen la, na tanglak zi achun kipâk in.

¹⁹ Sazukpi deihum tak leh sakhipi deihum tak guolin, bangtik lai inle a âng lum chun hun sutai zing hen la, a lungsietna chun nang chuh hun nem zing sek hen,

²⁰ Zieziekchun nang ka chapa, bang dinga numei dang chuh tawh kipawl a, numei zawlsaite chuh angsieh ding na him?

²¹ Lalpa’n mihing lampite chuh a mu zinga, a lampi teu chuh a enchien zing sek ngâla.

²² Minunsie chuh amah gitlohna ngêi chun man intin, a gitlohna khauhuol a kantawm in um in a.

²³ Sinsakna tâksap ziekin thin tin, a ngawlna nasat ziek chun amah chuh mangthai in a.