THUCHINGTE 4 - PATHIEN LEKHABU THIENGTHO (BSI)

Chitna Lawknate

¹ Naupangte haw, Pa sinsakna hi ngaithau inla, hetthiemna nei dingin ngaihsak un.

² Kithu-hilhna pha chuh ka hun pie a, ka hun thuhilhna hi kiheimangsan ki’n.

³ Ka pa chapa ka hi a, ka nu chapa chang khat leh deihchuom ka hi a.

⁴ Tichun, ei sinsak a, ka kawmah, “Ka thute hi na lungthim in vawppha zing in la, ka thupiek haw hi vawp inla, hing in;

⁵ Chitna hun nei inla, hetthiemna le hun nei in, hengilh hiel ki’n la, ka kama thu pawt te apat hin kilepmang hiel ki’n;

⁶ chitna chuh kiheimangsan ki’n la, hun vawp phan tin, amah chuh hehpih inla, hun veng ding ahi.

⁷ Chitna bulpi chuh ziehi ahi, zieziekchun chitna nei in la; bang hitaleh na chunga thil hungtung cheng chuh hetthiemna nei inla.

⁸ Chitna chuh limbawl inla, amah chun hun chawisâng in a, amah chuh na pawm phat leh, amah chun zahum takin hun siem in a.

⁹ Na luchang a ding chun pakchavui hun pien tin; amah chun hawihna lallukhuk hun khuksak ina.”

¹⁰ Aw ka chapa, ngai inla, ka thugente hi ngaitha’n la, na damsung kum haw chuh sawt tak hung hi ta’n a.

¹¹ Chitna lampi chuh ka hun sinsak ta ngâl a, felna lampi achun le ka hun pui ta ngâl a.

¹² Na chieh phat leh na kalsuon lamzang ta’n tin, tai leh chinle kisuipai diek ta puo’n la.

¹³ Kithu-hilhna chuh tudet kei inla, thahsuok hiel ki’n. Vawp chak kêi inla, na hinna ahi ngâl a.

¹⁴ Mi gilote lampi achun chieh ki’n la, mi phalote lampi chuh hawh diek ki’n.

¹⁵ Pumpelh inla, chieh hiel ki’n, zie tak apat chun kiheimang inla, chieh zel in.

¹⁶ Thil pawi a khawih loh u chun a ipmu thei puoh ngâl u a, mi kuo ahim a suknat loh u chun a ipmu thei puou hi.

¹⁷ Nunsietna chângthâk chuh a neu a, thagum suoh chuh uain bangin a dâwn u a.

¹⁸ Himahleh, mifel lampi chuh zing khawvak bang ahi a, sun chang lai tak bangin a vak hawih deuh deuh hi.

¹⁹ Mi gilote lampi chuh thim sah tak tawbang ahi a, bang ahim a suih khak uh tih nasan le a he thei puou hi.

²⁰ Ka chapa, ka thu haw hi khawksak inla, ka thugen ahin na bil chuh dawh in.

²¹ Na mitmuh apat chun chiehmang sak ki’n la, na lungthim lailung tak achun vawp zing in.

²² A mute ding chun hinna ahi a, a taksau a dingin damna ahi ngâl a.

²³ Thil dang cheng sangin na lunggil vengpha’n, zie chuh hinna tuinak kipat na ahi ngâla.

²⁴ Pau phalo chuh nang apat in kawihmang inla, holimna thanghuoi chuh nang apat chun kawihmang in.

²⁵ Na mit chun malam chuh zang takin en inla, na mitkhuchung haw chun le malam chuh zang takin en hen.

²⁶ Na thilhih ding chuh pilvang takin gel masa’n la, na thilhihte chun thudik puodawk zel hen.

²⁷ Changlam ahim, veilam ahim ah kihei ki’n la, gitlohna apat in na keng chuh heimang in.