THUCHINGTE 31 - PATHIEN LEKHABU THIENGTHO (BSI)

Lengte kawma Thuhilhna

¹ Ziehaw hi leng Lemuel thu haw, a nu’n a kawma a gente chuh ahi:

² “Nang hi ka chapa deih tak, ka pauchamna dawnna chuh na hi, bang ka hun hilh ta die?

³ Na hatna chuh numei chungah mang zo ki’n la; na sum cheng cheng chule numei chungah seng zo diek ki’n, lengte a susie zo sek ngâl a.

⁴ Lemuel, ngaiin, lengte chun uain a dâwn loh dinguh a hi a, vaihawmte chun zu dâwn utna le a neih loh dinguh ahi.

⁵ Khutilochun, a dâwn u a, dân thupiek chuh a hengilh sek u a, mi gimtheite dinmun chuh a hengilh sek ui.

⁶ Mangthai ding kuonte chuh zukha pieu inla, chun, mi lungkhamte chuh uain pieu in.

⁷ Dâwn u hen la, a chatgahnau chuh hengilh u hen; tichun, a lungkham nau chuh hengilh u hen.

⁸ “Amau ding kigen theilote chuh gensak inla, chansie leh panpih beite dikna chuh humbit sak in.

⁹ Na kam kân la, chagah leh panpih ngaite dingin kiko dawk inla, dik takin vaihawm in.”

Numei Pha

¹⁰ Numei khawsak pha chuh kuo a mu thei ding? a man chuh suongmantam san chi sang inle a tam zawi.

¹¹ Amah chuh a pasal lunggil in a muong a, tasam in um kha puo’n a.

¹² A damsung cheng chun a sie lam hilo in, a phalam ngên in thil a hihsak sek hi.

¹³ Samul leh patngatpuon a hawl a, a khut in kithalawp takin na a sem sek hi.

¹⁴ Amah chun sumkawlveite lawng guolin, gamla tak apat in nek ding a la sek hi.

¹⁵ Phalvak masang in a tho a, insung mite nek ding a pie sek a, a suok numeite sep ding le a guonggalh sek hi.

¹⁶ Lo a ngaihtuoh a, a chawdawk sek a, a khut ngêi in grep huon a siem sek hi.

¹⁷ Hatna’n a tai a gâk a, a khut a suhat sek hi.

¹⁸ A sumkawlvei chuh a lawk hi tih a he a, zan lele a thaumei a mit kha puoi.

¹⁹ A khut in muikhut a tu a, a khut in pat kap phel a thahsuok kha puoi.

²⁰ Mi gimtheite panpihna’n a khut a zak a, mi tasamte lam ah a khut a zak sek hi.

²¹ A insung mite ding chun vuk kiek chuh a lauhsak puoh a, a insung mite chuh puonsandup in a thuom sek hi.

²² Amah a dingin puonphah a kigat a, a silhlechente chuh patngatpuon leh puonsandup ahi.

²³ Kulhkawtkhak a upate chutkhawm na achun, a pasal chuh hetkhen ahi sek hi.

²⁴ Patngatpuon silh chi a siem a, a zuok sek a, sumkawlveite kawmah kawnggakte a thakdawk sek hi.

²⁵ Hatna leh zahumna’n a kivan a, hun hung tung dinga le a lau diek puoi.

²⁶ Pilna’n a kam a ka a, nunnemna thu chuh a kam in a sinsak sek hi.

²⁷ A insung khawsak chuh a en tup a, mawk um maimai in thatdahna chângthâk a ne puoi.

²⁸ A chate chun a thawhdawk tieng u leh, “Numei vangpha nu” a tiu a, amah chuh a duot u a, a pasal inle a pakcha sek hi

²⁹ “Numei khawsak pha tamtak a um u a, himahlele, nang chun na khel vek hi,” ti’n.

³⁰ Deihsakna hi thepna ahi a. Mel hawihna hi bangmahlo ahi; himahlele numei Pathien kihcha chuh pahchak in um ina.

³¹ A khut nasep gah chuh pieu inla, kulh kawtkhak achun a nasep in amah chuh pakcha hen.