THUCHINGTE 30 - PATHIEN LEKHABU THIENGTHO (BSI)

Agur Thugente

¹ Jakeh chapa Agur thugente, thupil chuh: “Pathien chuh ka kawmah a um puoi, Pathien in ei umpih puoi; panpih bei ka hi”.

² Mihing dingin ka mawl taluo a, mihingte’n hetthiemna a neih u hi ka nei puoi.

³ Pilna thu ka zil kha puoh a, Mi Thiengtho hetna himhim le ka nei diek puoi.

⁴ Kuo a van a kal a hung kum kit chuh? Kuo a khutpêk a huih simkhawm thei chuh? Kuo a puo’n a tui chu’n thei? Kuo a lei ning li gamgi phutdet? Amah chuh kuo ahi? A chapa min na he kha?

⁵ Pathien thu chengcheng chuh a dika, a thiengtho hi; Amah kisêlna a neite ding chun phaw ahi.

⁶ A thugente chuh behlap ki’n, khutilochun, suklatin um intin, mi lepchieh hi khan la.

Thupil dangte

⁷ Na kawmah thil nih ka ngên a, ka thih ma ngêi in ei lawhtit sak tei in.

⁸ Diktat lohna leh lepchiehna hi kei apat hin kawihmang kei inla, chatgahna ahim, hauhsakna ahim ei pie diek ki’n; kei dinga hun phet an nek ding ei pie’n,

⁹ Khutilochun vah taluo leng hun hengilh kha’ng ka ting, Lalpa chuh “Kuo ahi?” ti kha’ng ka; a hihloh leh hung chagah taluo leng gu kha’ng ka ting, ka Pathien min susie khang ka.

¹⁰ Suok chuh a pu kawmah heksie ki’n; khutilochun hansie hun lawh intin, mawh chan sak in um khan la.

¹¹ A pate hansie buokkhum a, nute vangsakna pie lo mi a um hi.

¹² Amau mita thiengtho kisa mi le a um u a, himahlele, a thien lohnau chuh sawp theih ahi diek puoi.

¹³ Mi, lopi kisa mah mah zieng a um u a, ahi, a khawhei u chuh bang tienga sang ahi ta’m?

¹⁴ A hateu chuh chemzâm tawbang, a hatuteu chuh chemcha tawbang le a um u a, lei chunga mi gimtheite ne zo ding leh, leisiet um apat mi gimtheite leh tasamte mihingte lak apat nêk zawh guo le a um ui.

¹⁵ Sailit in chanu nih a nei a, “Ei pie’n, ei pie’n” ti’n a kiko u a, lung-awi thei mawng mawng lo, thil thum a um a, ahi, hunta hen ti lo, thil li a um ui.

¹⁶ Mithi khuo, chuleh sûl chîng, tui mu lo tânggawchak, “Hun ta’n a” ti ngeilo meikuong.

¹⁷ A pa musitte leh a nu thu zuih ding ngainepte chuh, phaigam va-âk in a mit kheuhdawk sak intin; mulukawlh in ne zo in a.

¹⁸ Mak ka sak mah mah thil thum a um a, E! thil li ka hêtchet theih loh a um hi.

¹⁹ Vanlaizawl a mupi len na lampi, suongpi chunga gûl vakna, tuisuohgiet a kuong chiehna, pasal leh numei kilungsiet na lampi te hih.

²⁰ Numei zawlsaite lampi chuh zie tawbang hi ahi, a ne a, a mûk a thiek ngim a, thil gilo bangmah ka hih puoi, a ti a.

²¹ Thil thum ziekin leichung a kithing sek a, ahi, thil li ahi thuok zawh umlo chuh;

²² Suok, leng a hung pang, mingawl nek ding buting taka nei;

²³ Numei muhdah um takin pasal a hun neih, suok nungak in a pi go a hun luoh chuh.

²⁴ Lei chunga hin thil neucha cha li a um u a, himahleh amau haw chuh a pil mah mah ui.

²⁵ Sikmi haw hi hatlo tak a hi nau a, ahi’n, nipi hun sungin a nek dinguh a khawlkhawm sek ui.

²⁶ Sazupi hi ganhing hatlo tak ahiu a, hilele suongpi lak ah kuo a kisuot sek ui.

²⁷ Khaupehaw hin leng a nei puou a, himahlele a hawn in a leng sek ui.

²⁸ Inngak hi a khutpêk a kihamtang hâm hâm ahi na a, himahleh, leng In ah a cheng sek hi.

²⁹ Thil thum, a umdan u a lopi tak a um u a, thil li kituok taka chiehkhawm a um ui.

³⁰ Sakeibaknei hi gamsa laka hatpen a hi a, bangmah chan a suk-hêi zawh loh ahi.

³¹ Ui sathiem, âkchal kisuol thiem tak; chun, leng, kuomah do ngam loh haw hi ahi.

³² Nangmah kichawisang dinga thil ngawlhuoi tak na bawla, thil phalo tak na na ngaihtuoh khâk chun, na khut in na mûk him in;

³³ Bâwngnawi kichawknâng in bâwngnawi khal a siem dawk guol leh, nak apat a thisan zêp dawk ahih guolin, lungnatna chawhthawh kit chun kinakna a hingdawk sek hi.