THUCHINGTE 28 - PATHIEN LEKHABU THIENGTHO (BSI)

¹ Migilo chuh kuomah delh loh in a tai a; himahleh, mi ginum vang chuh sakeibaknei bangin a hangsan ui.

² Gam khat chuh a hung hel tieng leh thunei ding a tam seka; himahlele, mi hetthiemna nei leh hetna neite ziekin nam chuh a bit sek hi.

³ Mi chagah te sugimthei, mi chagahte chuh; nek ding umlo hiela guohpi’n a tawhmang vek tawbang ahi.

⁴ Dan ngaihsak lote chun migilo a pakcha sek u a; himahleh, dân zawpte vang chun a kalh sek ui.

⁵ Migilo chun thudik chuh a hethiem sek puoh a; himahleh, Lalpa hawlte vang chun thil cheng a hethiem vek sek ui.

⁶ Mihausa hin dân diklo taka hing sang chun, mi chagah dik taka khawsa chuh a phazawi.

⁷ Kuole dân vawppha chuh chapa pil a hi a; mi gawlsan te tawh kivawp vang chuh a nulepa zahchâkna ahi.

⁸ Kuole, a pung delh a diklo taka kisuhausa chuh; mi gimthei lungsiet te matchâk ding khawlkhawm ahi.

⁹ Kuole dân he dinga a bil dawh nuom lo chuh; a pauchamna chule kihdak-um ahi.

¹⁰ Kuole, mi pha gitlohna lampi a pui kawi ta chuh; amah kawkhuk ngêi ah kie lut intin; himahleh, mi phabukim chun thilpha luoh un au.

¹¹ Mihausa chuh amah ngaih in a pil a; himahlele mi chagah, hetthiemna neite chun amah chuh a hechien sek ui.

¹² Mi phate guolzawh tieng chuleh kipahna nasa tak a um sek u a; himahleh migilo vaihawm tieng le vang mi a kiselmang sek ui.

¹³ Gitlohna selgute chuh lawhting ngei puo’n tin uh; himahleh kuole, kiphuonga haihsante vang chun zahngaihna mun au.

¹⁴ Lalpa lau zing mi chuh mi vangpha ahi; himahleh a lungthim sukhauh te vang chuh sietna khuk ah kien au.

¹⁵ Sakeibaknei humham bang leh savawm suklungnat guolin, vaihawmtu nunsie chun mi chagahte chungah vai a hawm sek hi.

¹⁶ Vaihawmpa hetna tasam chuh mi sugimthei gilo tak a hi a, diktat lohna haw mi vang chuh damsawt in a.

¹⁷ Kuole tuolthat a gitlohna nei chuh; a thih masang sieh gâltai henla, kuoma’n panpih kihen.

¹⁸ Kuole dik taka chieh te chuh hukdawk in um untin, himahleh lampi diklo a kalsuonte vang chuh kawkhuk ah kielut un au.

¹⁹ Kuole lokai chun nek ding kiting tak nei intin, himahleh, mi thadah zuite vang chuh hung chagah in au.

²⁰ Mi ginum chun vangsakna chang intin; himahleh, kintaka hauhsak guo vang chuh gawt loh in um puo’n a.

²¹ Mi deihchuom neih hi a pha puoh a, gawlhgukna neucha ziekin mi’n thil diklo a hih sek ui.

²² Mi amah angsung khuol taluo chun hauhsakna a delh a; a chunga tâksapna hung tung ding ahi tih a he puoi.

²³ Mi pahchak lêm thawhte sang chun mi hilhgaihpa chun, a nung leh deihsakna tamzaw mu’na.

²⁴ Kuole a nu ahim, a pa ahim gûk sak a, Gitlohna ahi puoi, ti chuh; a siet na ding guolpha a nei tawbang ahi.

²⁵ Lungthima duh-âm mi chun kinakna a chawkdawk a; Lalpa chunga ginna ngate vang chuh suk hauhsak in um in au.

²⁶ Kuole, amah ngaihdan mai a kinga chuh mingawl ahi; himahleh, chingthei taka chiehte vang chuh hukdawk in um in au.

²⁷ Mi gimthei thil piete chuh tasam kha puo’n tin uh, himahleh, kimuhmawh sakte vang chuh hansie lawh in um in au.

²⁸ Migilo a guolzawh tieng leh mi a kiselgu sek u a, himahleh, a pukmang tieng le vang mipha a pung sek hi.