THUCHINGTE 25 - PATHIEN LEKHABU THIENGTHO (BSI)

Solomon Thupil dangte

¹ Ziehaw hi Solomon thupil, Juda leng Hezekia mite’n a zikthak sawn chuh ahi.

² Thil selguk hi Pathien lopina ahi a, himahleh lengte lopina chuh thil hawldawk hi ahi.

³ Van a san guol leh, leinuoi a thuk guol tak hin, lengte lunggil chuh a thuk a, suihdawk guol ahi puoi.

⁴ Dangkaguo tui-êk chuh suthieng in, thîk sêkte chun thil hawihtak a hun siem dawk sek ui.

⁵ Leng masang apat in migilo chuh nawhdawk inla, khutichun a lalchutphah chuh dikna a sukdet hi’n a.

⁶ Leng masang achun challatna chuh ki’n la, a miliente masang achun le ding diek ki’n.

⁷ Mi lopite masanga sukniem a um sangin; “Zie lam ahin hung chun la, chutna pha ahin hung chu to tie” tih chuh nanga dingin a phazawi.

⁸ Na thil muh te ziekin vaihawmna In ah kin takin chieh ki’n; hetpih dangte’n na diklohna hun mu leu, bang na gen ta die?

⁹ Na thubuoi u chuh na invengpa tawh genkhawm unla, midang thuguk vang chuh gendawk kiu in.

¹⁰ Khutilochun a hete chun hun suzakchau intin; na minsietna chuh mang lo in um khâna.

¹¹ Ngaihdan diktak gendawk chuh; dangkaguo bawm sunga sana theigah tawbang ahi.

¹² Mi hilhgaih thiem takin a ngaitha nuom kawma hilhgaihna a piek chuh; sana zungbuh leh dangkaguo phatak a kicheina tawbang ahi.

¹³ Palai ginum tak chuh a sawlpa a dingin; buh-ât laia vuk vawt tak kie tawbang ahi a; a pute lungthim a suthak zing sek hi.

¹⁴ Thilpiek a piek lohpi pie a kigen a, uong mi chuh, guohtui puo lo meipi leh huih tawbang ahi.

¹⁵ Zaidawhna chun vaihawmpa chuh thuzawh in a um a, aw nem tak chun guh leh châng a subawng thei hi.

¹⁶ Khuoizu na muh chun na deihkhawp phet ne’n, khutilochun luodawk kit khan la.

¹⁷ Na invengte veh mun taluo ki’n; khutilochun hun ningkitel untin, hun mudah kha’n au.

¹⁸ A invengte a dinga hetpih diklo a pang chuh, heicha leh chemzâm leh, thalchang hiem tak tawbang ahi.

¹⁹ Lungdawn laia mi ginumlo a kingak chuh; ha bal leh keng guh kipel tawbang ahi.

²⁰ Mi lungthim nate kawma la sak chuh; khawdap lai a a silhlechen sut sak leh liem maa uain thuk kinuh sak tawbang ahi.

²¹ Na melmate a gilkiel chun nek ding pie’n la; a dangchâk chun dâwn ding pie’n.

²² Tichun, a luchang a mei-âm suon sak hin na tin; khutichun Lalpa’n kipahman hun pie ding ahi.

²³ Mâl huih in guohtui a hun puok bangin, mi gensiet chîng chun lungnatna a tun sek hi.

²⁴ Numei hansie tak tawh In lien taka chenkhawm sang chun, In chung sipzum a um chule a phazawi.

²⁵ Gam gamla tak apat a chanchin pha zak chuh; dangchâk lai taka tui vawt dâwn tawbang ahi.

²⁶ Mi gilote masanga mi diktat kitulut chuh; tui thieng laka buonthuok tui sun lut leh luinak suknit tawbang ahi.

²⁷ Khuoizu dâwn tam takluot hi a pha puoh a; zie guol mah chun maipha hawl takluot le a pha puoi.

²⁸ Mi amah lungthim thunun zo lo chuh; khawpi sie sa, kulhbang bei tawbang ahi.