THUCHINGTE 22 - PATHIEN LEKHABU THIENGTHO (BSI)

¹ Hauhsakna sangin minphat hi tel zawk ding ahi a, dangka leh sana sangin deihsakna a deihum zawi.

² Mi hausa leh mi chagah a um gêl gêl u a, a nih u chun Lalpa siem gel gel ahiu hi.

³ Mipil chun thil lauh-um a muh chun a pumpelh sek a, himahleh mi mawlte vang chuh a lak ah a lut u a, a thuok lawh sek ui.

⁴ Kingaihniemna leh Lalpa kihchakna man chuh, damsunga hauhsaknate, chawih-atna te, hinna te ahiu hi.

⁵ Mi dukdaklote lampi achun ling leh thâng a um a, kuole a ngaihtuohna vengpha vang chuh zie apat chun gamla tak ah a um sek hi.

⁶ Naupang chuh a chiehna ding tak lampi chuh sinsak leh chin, a hung upat tieng lele thahtham lo ding ahi.

⁷ Mihausa chun mi chagah chungah vai a hawm a, thil palâkpa chuh a palâknapa suok ahi.

⁸ Kuole manlohna tuh chun lungkhamna ât intin, tichun, a lungnatna mawlh chuh lawhsam in a.

⁹ Mi thilphal chuh vangsak in um intin, a chângthâk mi gimtheite a kikawppih sek ziekin.

¹⁰ Mi muhsit chîng mi chuh nawhdawk unla, kinielna chuh bei intin, ahi, kisuolna leh kigensietna chuh bei in a.

¹¹ Lunggil thiengtho leh kampau deihum na mat chun, leng chuh nanga dingin na guolpa hi’n a.

¹² Lalpa mit chun hetna nei mi chuh a en zing sek a, himahleh mi zuou te thu haw vang chuh a paih tha sek hi.

¹³ Mi thadah chun, “Lampi ah sakeibaknei a um a! Ka vak dawk chun ei that ding ahi,” a ti sek hi.

¹⁴ Numei zawlsai chuh thâng tawbang ahi a, Lalpa’n a chunga lungnatna a neih te chu âwk in au.

¹⁵ Naupang lungthim achun ngawlna a bek chak a, himahleh, thununna mawlh chun gamla tak ah a nawhmang sek hi.

¹⁶ Lawkna dinga mi chagahte bawl gimthei leh, mi hausa kawma thilpiek pie sekte chuh a lawhsam sek ui.

Mipil te Thugen

¹⁷ Na bil hun dawh in la, mipil thugen haw chuh ngaitha’n; chun, na lungthim chuh ka chitna dawnna’n mang in.

¹⁸ Na lungthim a na vawp a, na kama na kawih zing theih chun thil deihum tak ahi.

¹⁹ Na ginna chuh Lalpa chunga na ngak chak theih na’n, tuni ngêi hin na kawma ka hun hetsak ahi.

²⁰ Thutak leh thudik hun hetsak ding leh, a hun sawlpa kawma dawnna diktak chuh na piek theih na dingin,

²¹ Thutak chuh bang ahih hun sinsak intin, zie hawl dinga chuh na chieh tieng, a dawnna diktak chuh mudawk inla.

²² Chagah chuh a chatgah ziekin lâksak ki’n la, kulh kawtkhak a sukgimtheih thuok te chuh le tawh den diek ki’n.

²³ Lalpa’n a chungthuu chuh genpih intin, amau haw hinna susiete hinna chuh susie ding ahi.

²⁴ Lungnat chîng mi chuh guolpha’n siem ki’n la, mi lungchawmte chule kivawppih diek kih.

²⁵ Khutilochun, a umdan u chuh hun tatmuh untin, na hinna a dingin thâng hung hi khâna.

²⁶ Midang te sum batna chungah mawhpuo dingin kisiem ki’n la, mi dangte a dingin kipautiem na’n le pang diek ki’n.

²⁷ Piek ding na neih loh a a hih chun, na zâlkhun tieng nasan hun lâksak ding ahiu hi.

²⁸ Na pilepute’n malaia gamgi a a bawl sau chuh chawnmang kih.

²⁹ Mi khutthiem taima taka nasem na mu kha? Amah chun leng masang achun ding intin, mi vantâng masang achun ding kha puo’n a.