THUCHINGTE 14 - PATHIEN LEKHABU THIENGTHO (BSI)

¹ Numei pil chun a In a sa a, himahleh a ngawl chun vang amah khut ngêi in a susie sek hi.

² Mi ginum taka um mi chun Lalpa a kihcha a, himahleh, mi ginumlo vang chun a musit sek hi.

³ Mingawl chun a nungzang a dingin mawlh a kigen dawk a, himahleh mipil kam chun vang amah a vengbit sek hi.

⁴ Bâwngchal umlohna achun buh In a hawm a, buh In dimna ding chuh bâwngchal thahatna achun aum hi.

⁵ Hetpih ginum chuh a zuou ngei puoh a, himahleh hetpih ginumlo vang chun zuou a gen sek hi.

⁶ Muhsit chîng mi chun pilna chuh a hawl sek a, a mu diek puoh a, himahleh, hetthiemna neite ding chun vang pilna hi baihlam taka muh ahi.

⁷ Mingawl apat chun kikiengkawih inla, amah apat chun chitna mulo ding na hi.

⁸ Mipil pilna chuh umdan ding hetna hi ahi a, himahleh mingawl ngawlna vang chun amau a puimang sek hi.

⁹ Mingawlte chun gitloh thawihna chuh a musit u a, himahleh mipilte chun Pathien deihsakna a kipahpih sek ui.

¹⁰ Na lungthim natna chuh nangin na kihet a, hêtkhâk loh mi chun na kipahna chuh a hun kipahpih thei puou hi.

¹¹ Migilote In chuh suksiet in um intin, himahleh mi dik puon-In vang chuh paklun zing in a.

¹² Mi ngaih a lampi dik hi leh kilawm tak a um a, himahleh a tawpna chuh thihna lampi ahi ngâl.

¹³ Nuihna muna le lungkhamna a um a, himahleh kipahna tawpna chuh lungkhamna ahi.

¹⁴ Lungthim a nungchawn mi chuh amah deihdan in dim intin, mipha chuh vang amah nasep in sulungkim in a.

¹⁵ Mimawl chun thil cheng a gingcha a, himahleh, mipil chun a chiehna ding phatak in a en sek hi.

¹⁶ Mipil chun gitlohna chuh a kihcha a, a taihmang san a, himahleh, mingawl vang chuh a kihansak a, amah a kipielut sek hi.

¹⁷ Mi lungchawm chun ngawlhuoi takin thil a hih sek a, chuleh, mi dawha thuk chuh muhdah in um in a.

¹⁸ Mimawl chun a ngawl man chuh muntin, himahleh, mipilte vang chuh pilna lukhuk khuk sak in um un au.

¹⁹ Mi phalote chun mi diktatte masangah a kûn u a, mi nunsiete chuh mi diktatte kawtbul ah a kûn sek ui.

²⁰ Mi chagah chuh a invengte ngêi in le a mudah a, himahleh mi hausa chun vang guolpha a hau sek hi.

²¹ Kuole a invengte musit chun thil a sukhiel a, himahleh mi gimthei hehpihte vang chuh a kipâk ui.

²² Thil phalo guonggalhte chuh thil sukhiel hilo ahiu em? Thil pha guonggalh te chun ginumna leh taksan umna mu’n au.

²³ Sepgimna achun punna a um a, himahleh kama gen thawh maimai chun vang tâksapna a tun hi.

²⁴ Mipil lallukhuk chuh a pilna ahi a, himahleh mingawl vang chun ngawlna chuh pakchavui guolin a âwk sek hi.

²⁵ Hetpih dik chun hinna a hukdawk sek a, himahleh zuou gen mi chun thepna thu a gendawk sek hi.

²⁶ Lalpa kihchakna chun mi amah kimuonna a pie a, himahleh a chate chun kihukbitna mun nei in au.

²⁷ Lalpa kihchak chuh hinna tuikhuk ahi a, thihna thâng pumpelhna le ahi.

²⁸ Leng lopina chuh mihing tam ziek ahi a, himahleh mihing tawmna mun achun vang leng chate thihna a um sek.

²⁹ Mi lungnieng tak chuh pilna nasa tak nei mi a hi a, himahleh mi lung chan-gang vang chun ngawlna a sulang sek hi.

³⁰ Lunggil kipahna chuh taksa a dingin hiselna ahi a, himahleh itthikna vang chuh guh sukdam theih loh tawbang ahi.

³¹ Mi chagah sugimthei chuh a Siempa musit ahi a, himahleh tasamte khawmtuoh chuh a Siempa limbawl ahi.

³² Migilo chuh a thil hihkhelh achun paih lut in um intin, himahleh mipha chun vang a thihna achun kinepna a nei sek hi.

³³ Pilna chuh hetthiemna neite lungthim achun a cheng a, himahleh mi ngawl te lungthim achun vang pilna a um puoi.

³⁴ Diktatna chun nam a chawisâng a, himahleh gitlohna vang chuh nam a dinga muolphona ahi.

³⁵ Suok pilvang tak chuh leng deihsakna a chang a, himahleh, a zahchâkna ding hihte chung achun a lungnatna a chu sek hi.