THUCHINGTE 10 - PATHIEN LEKHABU THIENGTHO (BSI)

Solomon Thupil haw chuh

¹ Ziehaw hi ahi Solomon thupil haw chuh: Chapa pil chun a pa kipahna a siem a; mahleh chapa ngawl chuh a nu lungkhamna ahi.

² Diklo taka hauhsakna chun lawkna a nei puoh a; himahleh, diktatna chun thihna apat a hukdawk sek hi.

³ Mi diktat chuh gilkiel a um ding Lalpa’n a phal puoh a; himahleh, mi gilote duhthusam vang chuh a paih tha sek hi.

⁴ Mi thadah khut chun chatgahna a tun sek a; himahleh, mi taima vang chun hauhsakna a tun sek hi.

⁵ Nipi laia buh lakhawm chuh chapa pil ahi a; hi mahleh, buh-ât hun a ipmu vang chuh chapa muolphona tun ahi.

⁶ Mifel lu chung achun vangsaknate a um a, himahleh, mi dukdaklote kam vang chuh nunsietna’n a khuh ahi.

⁷ Mifel hetzingna chuh vangsak na ahi a, himahleh, mi nunsiete min vang chuh beimang pai in a.

⁸ Mipil chun thupiek chuh khawksak intin, himahleh, mi ngawl mûk lepchieh vang chuh sietna ahi.

⁹ Mi diktat chuh hangsan takin a chieh a, himahleh, lam diklo zuite vang chuh hetdawk in um in au.

¹⁰ Thudik selgu mi chun buoina a tun a, himahleh, langchang taka hilhgaihna chun chamna a siem sek.

¹¹ Mifel kam chuh hinna tuikhuk a hi a, himahleh, mi nunsie kam vang chun nunsietna a khuh sek hi.

¹² Muhdahna chun lungnatna a chawktho a, himahleh, hehpihna vang chun gitlohna chengcheng a khuhmang sek.

¹³ Hetthiemna neipa kam achun pilna muh ahi a, himahleh, hetthiemna neilote nungzang achun mawlh a chu sek hi.

¹⁴ Mipil chun hetna a khawlkhawm a, hi mahleh, mingawl kam vang chuh manthaina naih zing ahi.

¹⁵ Mi hausa hauhsakna chun amah a vengbit a, himahleh, tâksapna chun mi chagah a susiei.

¹⁶ Mifel sepgimna chuh hinna ahi a, himahleh, mi gilote lawkna vang chuh sietna ahi.

¹⁷ Kisinsakna khawksa mi chuh hinna lampi ah a um a, mahleh, hilhgaihna khawksalote vang chun a sukhiel sek ui.

¹⁸ Muhdahna selgu chuh mûk lepchieh a hi a, chun, mi demna thu gendawk mi chuh mingawl ahi.

¹⁹ Thu tamna achun gitlohna a tam a, mahleh, a mûk veng thiem mi vang chun chingthei takin a hih sek hi.

²⁰ Mifel lei chuh dangkaguo deihum tak tawbang ahi a, himahleh, migilo ngaihtuohna vang chuh pannabei ahi.

²¹ Mifel mûk chun mi tamtak a vak a, himahleh, mingawl vang chuh hetna tâksap ziekin a thii.

²² Lalpa vangsakna chun a suhausa a, lungkhamna a siem beh sak puoi.

²³ Mingawl ding chun gitlohna bawl chuh guolvakna siem tawbang ahi a, himahleh, hetthiemna neite ding chun pilna ahi.

²⁴ Migilo chuh a lauh bang tak chun a chungah hung tung intin; mahleh, mi fel duhthusam vang chuh piek in um in a.

²⁵ Huihpi a hung nunga, migilo chuh a tawkmang a himahlele mi fel vang chuh kumkhuo’n a ding det zing hi.

²⁶ Ha a dinga uain thuk leh mit dinga meikhu bangin, mi thadah chuh a sawlpa a ding chun lungnat um ahi.

²⁷ Lalpa kihchakna chun damsung ni a hih sau a, himahlele mi nunsie kumte chuh sukchawm in um in a.

²⁸ Mifel duhthusam chuh kipahna hi’n tin, hi mahleh, migilo kinepna vang chuh manthaina hi’n a.

²⁹ Lalpa lampi chuh mi fel a ding chun kulhpi dettak ahi a, mahleh, migilote ding chun manthaina ahi.

³⁰ Mifel chuh suktawih hi ngei puo’n tin, himahleh, mi gilote vang chun gam hi luoh puo’n au.

³¹ Mifel kam chun pilna a gendawk a, mahleh, mûk lepchieh vang chuh âtthâk in um in a.

³² Mifel kam chun thil kipah-um haw a gen a, himahleh, migilo kam vang chun lepchieh thu a gen sek hi.