THUCHINGTE 1 - PATHIEN LEKHABU THIENGTHO (BSI)Thuching Lulna chuh 1 Israel leng David chapa Solomon thuching haw chuh: 2 Mite chun pilna leh sinsakna he ding leh, thu umzie haw hethiem dingin; 3 Thilhih ching taka kisinsakna dawng dingin, kitûpna leh vaihawmna leh khenchuom neih lohna leh, 4 Mimawlte kawma chitna pie ding leh; khangdawngte kawma chitna leh lam dik hetthiemna pie dingin. 5 Miching te chun le a het u a, thiemna a chuh a pun beh theihna dingin leh, hetthiemna nei mite chun vaihawmna dikte chuh a chan theihna dingun. 6 Khutia chuh thuching leh a umzie hethiem ding leh, miching te thu leh a thu kisel te chuh a het theihna dingun. Khangdawngte Thuhilhna 7 Lalpa kihchak chuh hetna bulpi ahi. Himahleh mingawl chun chitna leh kisinsakna chuh a musit hi. 8 Ka chapa, na pa hun sinsakna chuh ngaitha’n la, na nu thupiek chuh kiheimangsan ki’n. 9 Na luchang a ding chun pakchakhi hawihtak hi’n tin, Na ngâwng kimvela chun khi bangin âwk in. 10 Ka chapa, migilote’n a hun thep u chun lem sakpih zieng ki’n la. 11 “Keihaw kawmah hung inla, thisan suoh hiting un; a ziek um lo in mi pawi khawih lo a gûkin châng hi tingun, 12 Sheol bangin a hingsan in valh zo hi tingun, mi kitûpte sheol a chieh suk bang mai in; 13 thil mantam haw chuh mui tingun, I inteu chuh gâllâk thil haw chun sudim hiting un; 14 na chanvo chuh keihaw lak ah kawih inla, sumbawm kikawp hitiu,” ti leu le. 15 Ka chapa, amau haw chuh lampi ah kitawnpih ki’n la, a lampiu apat chuh kivêng pha’n. 16 A kengteu chuh gitlohna lam ah a suon hât u a, thisan suoh dingin a kisazo zing ngâl u a. 17 Vacha haw mitmuha lên zak palh chuh, a thâwn kei ahi ngâl a. 18 Chun, a gûka thisan suoh te chun, amau hinna ngêi chule a gûka kichan ahiu hi. 19 Lawkna dinga misuomte lampi chuh zie tawbang chuh ahi a zie ngêi chun a neite hinna chuh a lâkmang sak sek hi. Pilna chuh a Kiko hi 20 Pilna chuh khawlai achun ngeih tak in a kiko a, khawlai haw achun a aw chuh a suoh a. 21 Khawlai mun pawimawhna mun achun a kiko a, khawpi lutna kawtkhakhaw achun a gen sek a, khawpi sung achun thu a gen sek hi. 22 Bang chan ahim nang haw mimawlte haw, mawlna hi na hehpih zing ding uh? muhsit chîngte chuh a mi muhsitnau achun kipâk in, mingawlte chun bang chan ahim hetna chuh a deihloh naklai dinguh? 23 Ka hun hilhgaihna hi ngaithau inla, kithu-hilhna pha chuh hun pie’ng ka ting, ka thu chuh nang haw hun hetsak ing ka. 24 Ka hun sama, na ngaitha nuom puou a, ka khut ka zaka kuoma’n na ngaihsak nuom puou hi. 25 Ka thuhilhna te na kihetmawh sak u a, ka hun hilhgaihna khatchale na ngaihsak puou hi. 26 Keile na lungzîn niu leh nui ing ka ting, Na lauhnau a hungtun phat chuleh hun êngho ing ka. 27 Na lauhnau chuh huihpi bang leh, na lungzînna chuh chinpei bangin hung intin; Gimtheihna leh lungzînna na chung u a a hung tun tieng, 28 Kei ei hun sam un na tin, himahlele hun dâwng puo’ng ka; gunchuh takin ei hawl un na tin, himahlele ei mu puo’n lau. 29 Aziek chuh, hetna chuh a deih puou a, Lalpa kihchak chuh a tel zawk loh ziekun. 30 Ka thuhilh haw khatchale na zawp puou a, ka hilhgaihnate chengcheng chuh na muhsit ziekun. 31 Zieziekchun, na tuh gahteu ngêi chuh neu in na tin uh, na thilhih guot hawu ngêi chun suknat in um inlau. 32 Mimawlte chiehkhelh na chun amau chuh thih lawh untin, mingawlte nawpsak bawlna chun amau chuh susie ding ahi ngâl a. 33 Amahvang chuh kuole ka thu ngai ta chuh bit takin cheng untin, sietna lau lo in um hiet hiet in au. |
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
Bible Society of India