THILSIEMBUL 2 - PATHIEN LEKHABU THIENGTHO (BSI)

¹ Tichun lei leh vante chuh a chung u a um haw chengcheng chu tawh siem zawh ahi ta a.

² Chun, Pathien in ni sagih ni chun a thilsiem chengcheng chuh a zo ta a; tichun a thilsiem chengcheng chuh a chawlhsan ta a.

³ Tichun Pathien in ni sagih ni chu vang a pie a, a suthiengtho a: Zie ni a chuh Pathien in a thilsiem chengcheng thu maia a siem leh khuta a siemte chuh a chawlhsan tâk ziekin, zie ni chuh a hih thiengtho ta a.

Eden Huon

⁴ Chun, Lei leh van kisiem laia Lalpa Pathien in lei leh van a siem dân chuh hiti hi ahi

⁵ Lei ahin hampa mawngmawng a na um puoh a, lei a thaichi mawngmawng le ana kek puoi; Lalpa Pathien in lei chungah guoh a na zuk sak puoh a, lei let dingin mihiem le a na um diek puoi;

⁶ himahleh, lei apat in tuihu ahung pawt a, lei chung chengcheng chuh a chapno sek hi.

⁷ Chun, Lalpa Pathien in lei a leivui in mihiem a siem a, a nak achun hinna hu a halut a; tichun mihiem chuh mihing a hung hi ta a.

⁸ Chun, Lalpa Pathien in suohlam a Eden achun huon a siem a; a mihiem siem chuh zie tak achun a kawih ta a.

⁹ Chun, Lalpa Pathien in lei apat in thing mit la tak leh nek tuok tak a kehsak a; huon lailung tak achun Hinna thing le a kehsak a; asie leh apha hetna thing le a kehsak hi.

¹⁰ Chun, Eden apat chun huon chapchêk dingin lui a luong dawk a; zie apat chun a kikhen a, ka li a kisuoh a.

¹¹ Lui khatna chuh Pishon ahi a; zie chun Havilah gam chengcheng chuh a kuolkhum a, zie chun sana a um a;

¹² Zie gama sana chuh aman tam chi tak ahi; thil gimlim Bdellium leh suongmantam chi khat onix kiti chu le a um hi.

¹³ Chun, lui nihna min chuh Gihon ahi a; zie chun Kush gam chengcheng chuh a kuolkhum hi.

¹⁴ Chun, lui thumna min chuh Hiddekel ahi a; zie chuh Asuria gam suohlam a luong chuh ahi. Chun, lui lina chuh Euphrates ahi.

¹⁵ Chun, Lalpa Pathien in mihiem chuh a pui a, Eden huon achun a enkawl ding leh a veng dingin a kawih ta a.

¹⁶ Chun, Lalpa Pathien chun mihiem kawm achun, “Huon a thinggah tincheng gah haw hi na nawp nawpin na ne thei hi;

¹⁷ Himahleh, asie leh apha hetna thinggah vang hi chuh na nek loh ding ahi; na nek a ahih chun, na nek ni ni leh thi ngêi ngêi ding na hi,” ti’n thu a pie a.

¹⁸ Chun, Lalpa Pathien in, “Mihiem amah maia um hi a pha puoi: amah panpih ding a kithuohpih ding dawl mi siem sak ing ka,” a ti a.

¹⁹ Khutichun, Lalpa Pathien chun leia pat in gamsa tincheng leh chung leng vacha tincheng chuh a siem a, chun, amin dingun bang a sa dem tih hetna’n Adam kawm achun a pui ta a: chun, ganhing chengcheng chuh Adam in a min uh a na sak taphawt chuh a min uh ahi den tai.

²⁰ Tichun, Adam chun gancha tin cheng, chung leng vacha tin cheng, gammânga gamsa tin cheng min chuh a sa chiet a; himahleh, Adam a ding chun a panpih ding leh a kithuohpih ding chi a um nai puou hi.

²¹ Tichun, Lalpa Pathien chun Adam chuh nuom takin a ihmutsak a, a ihmut lai chun a nakguh laka khat a la a, zie mun chuh pheh in a sudim a.

²² Chun, Lalpa Pathien chun Adam apat a a lak nakguh chun numei a siem a, Adam kawmah a pui ta a.

²³ Chun, Adam chun, “Zie zet hi chuh ka guh apat a guh nei, ka pheh apat a pheh nei ahi; Pasal apat a lâkdawk ahih ziekin ‘Numei’ tih ding ahi,” a ti a.

²⁴ Zieziekchun pasal in a nu leh a pa nusieh in, a zi chuh tu’ntin; tichun pumkhat hung hi ta’n au.

²⁵ Chun, Adam leh a zi chuh sangawn a um gel ahiu a, himahleh, a zakcha puou hi.