SUNNA LA 4 - PATHIEN LEKHABU THIENGTHO (BSI)

Jerusalem Puksiet nunga Thilte

¹ Bangti dana sana chuh muol tha a, bangti dana sana thieng takte chu muoltha zo ahi ta! Mun thiengtho a suonghaw chu ning tin a thehzak in a um zo tai.

² Zion tangval lul tak, sana hawih tak tawh tehkal theih haw chu; bangti dana bêldêngpa khuta leibel bang mai hung hi ahi tau hi?

³ Si-âlte’n bawn a noteu a nawi uh a chep sak u a, a noteu a vak u a; Himahleh, ka mite chanute chu thalek a vacha lien chi bang mai in, a ningkhel zo tau hi.

⁴ A chasen nawichep laiteu chu dangchâk in, a lei uh a khadang u ah a bek chak a; Naupangte chun chângthâk a ngên u a, himahleh kuoma’n a pie puou hi

⁵ An phatak ne sekte chu kawtthêl ah a thi zo tau a; Puonsandup silh a nuomsate chu êk khuk chungah a chu tau hi.

⁶ Ka mite chanu gitlohna gawtna chu; Sodom gitlohna gawtna sangin a huoisie zaw a, Pathien khut apat in thakhat in a chungu ah sietna a hung tung tai.

⁷ A lengteu chu vuk sangin a vam zawu a; nawitui sangin a vam zawu hi. A taksa teu chu rubi suongmantam bangin a san sengsung u a, sapphire suongmantam bangin a val a.

⁸ A mel u chu meihawl sangin a vawm zaw a, Kawtthêl ah hetloh khawp in a kuol tau hi. A vunteu chu a guhhawu achun a bek a, a gaw a, mawlhkang tawbang ahi tai.

⁹ Anngawl a awl awla thih sangin, chemzâma thih a phazawi, A gam gah tâksap ziekin awl awlin a gawng deuh deuh u a, nasa takin a beidawng tau hi.

¹⁰ Ka mite chanu chun a kivâk u a, a chung u ah sietna a tun sak u a; Lainatna nei tak nute chun amau khut ngêi in a chateu chu a huon tau hi.

¹¹ Lalpa’n a lungnatna lauh-um tak chu a suguitung a, a lungnatna tizat-um tak chu a sungbuo a; Zion achun mei a chawhkuong a, zie chun, a suongphum haw nasan a katum tai.

¹² Mi cheng cheng leh lei a lengte nasan aka tum tai; Gâlte leh melmate Jerusalem kulhkawta a lut ding chu a gingcha puou hi.

¹³ A thiemgaute leh thiempute gitlohna ziekin ahi a sung achun bangmah hihsie lote thisan chu a suoh ta a.

¹⁴ Kawtthêl haw achun mitdûk guolin a vakviel viel u a, thisan in a kisubuok u a, kuoma’n a silhlechen teu nasan a sukha nuom puou hi.

¹⁵ A kawm u ah “Chiehmang un, chiehmang un, a buok na hiu hi, Chiehmang un, Chieh mang un” ti’n mipite chu a kiko khum u a. A taimang u a, a vakviel viel tieng u leh, amau chun namte lak ah, zie chun um ta puo’n au, a tiu hi.

¹⁶ Lalpa lungnatna chun amau haw chu a thehzak a, a ngaihsak zawm ta puoh a. Amau chun thiempute hihna a zah puou a, upate chule deihsakna a chang chuom puou hi.

¹⁷ Ei u chu panpihna hungtung lo ding thîlna’n I mitteu a chau zo ta a; Ei hukbit theilo ding namte chu I ngak u a.

¹⁸ Melmate’n I kalsuon teu a entha zing u a, khawlai ah I vak dawk ngam ta puou a; I tâwp na dinguh a nai ta a, I niteu a kiem a; I tawpna dinguh a tung tai.

¹⁹ Ei delhzuite chu vanlaizawl a muvanlai sangin a chan-gang zawu a. Tang chungte achun ei huol kimvel u a; thalek gam achun ei chânggu tau hi.

²⁰ I nak u a hinna hu, Lalpa sathau nuh chu kawkhuka mat in a um ta a, A thalim nuoi ah namte lak achun hing hitiu, I na tiu a.

²¹ Aw Edom chanu lawp leh kipâk in um un, Uz gam ah na cheng a, Himahleh, nang haw sietna ding le hung tung ding ahi a; kham un na tin, ngâwnchang a um ding na hiu.

²² Aw Zion chanu, na gitloh zieka gawtna chu a bukim ta a: Lalpa’n salin hun kawih zawm ta puo’n a. Himahlele Aw Edom chanu, Lalpa’n hun gawt intin: na gitlohna chu phuong chil in a.