SUNNA LA 2 - PATHIEN LEKHABU THIENGTHO (BSI)

Lalpa ’n Jerusalem a Gawtna

¹ Bangti dana Lalpa lungnatna meipi chun Zion chanu a khuhkhum a? Israel hawihna chu van apat in lei ah a paih tha ta a. chuleh, A lungnat ni a a kengngakna hezing lo ahi tâm!

² Lalpa’n lungsietna neilo hielin, Jakob chênna cheng chu a sumang ta a; A lungnatna chun Juda chanu kulh dettak te chu a suchim a. A vaihawmte leh a lenggam u chu a hihniem ta a.

³ Amah chun a lungnatna lauh-um tak chun Israel ki chu a sukbawt saka, a khut changlam chu melma masang apat chun a nung zuk a, Mei ko a kimvela thilte katum zul zul bangin, thil chengcheng chu a katum vek tai.

⁴ Melmate bangin a thalpi ei kau khum a; gâl guolin a khut changlam in a dinga, Zion chanu puon-In a a mitla cheng chu a sumang a, a thangtawmna chu mei bangin a sungtha ta a.

⁵ Melmate bang mai in Lalpa’n Israel chu a hihsie ta a; A leng In teu leh kulhpite chu a suchim vek a. Juda chanu chung achun sûnna leh kahna a hih pung a.

⁶ Amah I honau Ho-In ngêi chule hiemngam takin huon guolin a susie a: Lalpa chun Zion ah kikhawppi hunbi neite leh Chawlhni te chule hetngilh in a um saka. Lungna takin lengte leh thiempute chu a paih tha tai.

⁷ Lalpa’n maichâmte chu nawlh in Mun thiengtho chu a kihdak ta a; A leng In kulh bângte chu melmate khut ah a pie dawk ta a, amau chun Kut lopi ni guolin Lalpa In ah thawm gi a nei u a.

⁸ Lalpa’n Zion chanu kulhbang puksietna ding chu a guotsa ahi a; A tehna khau chu a zan a, susie lo dingin a khut a nung zuk puoh a, Zieziekchun tuhin a gâlven In te leh, a bângte chu a puk khawm tau a.

⁹ A kawtkhakte chu leia tumin, a kamnate chu suksiet vek ahi tai. Tuhin, leng leh a milienteu chu salin a um tau a. Dante kihilhna a um ta puoh a, thiemgaute chun Lalpa apat thilmuh a nei ta puou hi.

¹⁰ Zion chanu upate chu tuol ah a chuu a; Saidippuon kisilh in a luchang u achun leivui a kibuok khum u a. Jerusalem ngâklakte chu tuol lam ah a kûn tha tau hi.

¹¹ Ka mitte chu kahna’n a chauzo tau a; ka lunggil a gimthei a. Ka mite chanu sietna ziek chun lungkham in ka chautha tai. Naupangte leh nawichep laite chu chau in khawpi achun a puktha zo tau hi.

¹² Amau chun a nuteu kawmah buh leh uain khawia um ahi? a tiu a. Sukliem bang hielin khawlai achun thingilh in a kuol u a. A hinnau chu a nuteu angsung achun a sung buou a.

¹³ Nang dinga hetpih dinga bang thila ka mat ding? Bang tawh ka hun tehkal die? Aw Jerusalem chanu ka hun thamuon theih na dingin bang tawh ka hun tehkal die? Aw Zion chanu thiengtho, na sietna chu tuipi guolin a lien a, Kuo a hun thamuon thei ding?

¹⁴ Na thiemgaute kilâkna muh chu nanga dingin athawn leh ngawlhuoi thil ahi a. Nangmah hun siempha kit dingin na gitlohnate a sulang puou hi. Nanga dingin puokgik leh puihmang na diklote a hun muhsak ui.

¹⁵ Khawpi hun hawh malam taphawt in musit takin a hun nuihsan u a; Jerusalem chanu te chun, a luchang uh thing in, “Zie hi khawpi hawih bukim kha hilo ahim? Ziehi khawvel in a kisuonpih kha hilo ahim?” ti’n a sietna chu a nuihsan u a.

¹⁶ Na melmate cheng chun hun nuihsan in, mudah takin a hun en u a; A mûk teu hun hih zum khum in, a hateu hun lît khum in, “I susie zo tau hi, Zie ni hi ahi, I na thil zing u kha I mudawk tau a, I mit un I mu tau hi” a tiu a.

¹⁷ Lalpa’n hih dinga a na tihsa chu a hih ta a; Tumasang a ei na vaulawk bangin, lungsietna beiin ei susie vek ta a. Lungsietna a nei ta puoh a, na melmate chu na chungah a kipah saka, na melmate ki chu a dawmsang tai.

¹⁸ Aw Zion chanu, na kulhbangte nasan chu Lalpa kawmah kiko hen; Na mitthi tui chu le sun leh zan in luipi bangin luong hen. Chawlhdamna kipie ki’n la, na mitnaucha chu chawlhsak hiel ki’n.

¹⁹ Zan in tho dawk inla, zan ven hun kipat tûngin Lalpa ma ah na lunggil tui bangin sung dawkin. Khawlai ning tina gilkiel a sawlsam na chate dingin a kawm lam ah na khutte dawmsang in.

²⁰ Aw Lalpa, ngaiin, zie hi kuo kawma na hih ahim ngaihtuoh in; numeite chun a cha deih lai tak teu sa chu a neu a; leng khap guon a zui tau a. khata sau naupangte chu ne ding ahiu em? Thiempu leh thiemgaute chu Mun Thiengtho a thah a um ding ahiu em?

²¹ Khawlai a chun teksiete leh khangdawnglaite chu a kithalseh lemlum u a; Ka nungak thieng leh tangvalte chu a melmateu chemzâma thah in a um tau hi. Na lungnatna ni chun amau haw na that ta a.

²² Lalpa lungnatna ni a chu kuomah a suohchak loh na ding leh, nutsieh ahihloh na dingun Kutpi ni bang mai in, ka melmateu chu ning tin apat na samkhawm a; Na lungnatna ni chun taidawk leh suokcha himhim a um puoi. Ka dâwn tei uh, ka etkawl lai uh ka chateu chu melma te’n ei thah sak tau hi.