RUTH 4 - PATHIEN LEKHABU THIENGTHO (BSI)

Ruth Kipahman Piekna

¹ Tichun, Boaz chuh khawpi kulh kawtkhak achun a va chieh to a, zie tak achun a chu a, chun, ngaitie, a gam ngak ding uh, Boaz in a gen kha a hunga, Boaz in a kawmah, “E! nang khah, hung phei inla, hung chu tie,” a ti a. Chun, amah chuh a hung phei a, a hung chu ta a.

² Chun, zie khuo a upahaw lak achun mi sawm a pui a, a kawm u ah, “Zie hin hung chu tiem u!” a ti a. Tichun, amau chuh a va chu tau a.

³ Chun, Boaz chun a gam ngak ding pa kawm achun, “Moab gama pata hung vaikit Naomi chun, I suohpihpau Elimelek gam chuh a zuok a.

⁴ Tichun, zie a na kawma chute mitmuh leh I upateu mitmuh ahin tan in; na tat nawp loh leh ka het theihna dingin ei hilh in; nang tih loh chuh kuomah dang a tan ding dawl a um puoh ngâl a, chun, kei hi nang bana chuh ka hi, tih hun hetsak pawimawh in ka he a,” a ti a. Chun, amah chun, “Tan ing ka,” a ti a.

⁵ Chun, Boaz chun, “Zie gam chuh Naomi khut apat a na châwk ni chuleh mithi pa zi, Moab numei Ruth chule na châwk khawm ding ahi; mithi min chuh mang lo a, a goluoh ding a um zel theihna dingin,” a ti a.

⁶ Ziephet chun, a gam ngak ding pau chun, “Kei a dingin tan thei puo’ng ka, khutilochun, kei uh insung kigoluohna buoi kha’n a, tan thei ka hihna chuh nang chang mai in, kei vangin ka tan thei lo ahi hi,” a ti a.

⁷ Malaia Israel te laka thil bangkim a sukdetnau leh a kichawk dân u leh a kithen dân u chuh hiti bang hi ahi; kengtawbek a sût u a, a vengteu a pieu a, ziehi Israel te laka a thil sukdet dân uh chuh ahi.

⁸ Khutichun, a gam ngak ding pau chun Boaz kawmah “Nang in kichâwk mai in,” ti’n, a kengtawbek a sut a, a pie ta a.

⁹ Chun, Boaz chun, upate leh mipite kawm a chun, “Tuni hin Elimelek neih chengcheng leh Kilion leh Mahlon neih chengcheng Naomi khut apat in ka châwi tih nang haw hi ei hetpihte na hiu hi,

¹⁰ Chun, zie mai chuh hilo in, mithi chuh a min mang lo a, goluoh ding siem sak ding leh, mithi chuh a suohpihte lak leh a umna mun kulh kawtkhak a a min a man loh na dingin, Moab numei Ruth, Mahlon zi chuh ka zi dingin ka chaw khawm a, zie chuh tuni hin, nang haw hi ei hetpihte na hiu hi,” a ti a.

¹¹ Chun, kulh kawtkhaka mipi chengcheng leh upate chun “Hetpihte ka hiu hi, na In a numei hung lut chuh Rachel leh Leah, Israel nam tung ding te nih bang khan Lalpa’n siem henla, chun, nang le Ephrath achun hausa takin um inla, Bethlehem a chun minthang takin hung um in.

¹² Chun, Lalpa’n zie numei apat a suon a hun siem sak ding ziek hin, na inkuon chuh Tamar in Juda a hinsak Perez inkuon bang hung hi hen,” a tiu a.

Boaz leh A Suonte

¹³ Khutichun, Boaz chun Ruth chuh a pui a, a zi a hung hi ta a; chun, a kuolpih a, Lalpa’n nau a vawp sak a, chun chapa a hing ta a.

¹⁴ Chun numeite chun Naomi kieng ah “Tuni tienga gam ngak ding tasam lo a hun um sak Lalpa Pathien chuh pahchak in um hen la, Israel te lak ah a min chuh hung thang hen.

¹⁵ Chun, amah chuh na hinna tungdawk leh na teklam a hun chawm pa hung hi’n tin, na monu nang hun hehpih a, chapa sagih sanga nanga dinga phazaw chun amah chuh a hing ta ngâl a,” a tiu a.

¹⁶ Tichun, Naomi chun nausen chuh a la a, a âng ah a pawm a, a dâwn ta a.

¹⁷ Chun, a inveng numeihaw chun a min a sau a, “Naomi a ding in chapa a hung pieng a,” ti’n a min dingin Obed a sau a; amah chuh David pa Jessai pa ahi.

¹⁸ Ziehaw hi Perez suonte ahiu hi: Perez in Hezron a hing a;

¹⁹ Chun, Hezron chun Ram a hing a, chun, Ram chun Aminadab a hing a;

²⁰ Chun, Aminadab chun Nashon a hing a, chun, Nashon chun Salmon a hing a;

²¹ Chun, Salmon chun Boaz a hing a, chun, Boaz chun Obed a hing a;

²² Chun, Obed chun Jessai a hing a, chun, Jessai chun David a hing hi.