RUTH 3 - PATHIEN LEKHABU THIENGTHO (BSI)

Ruth Chawlhdamna

¹ Chun, a talpinu Naomi chun a kawmah, “Ka chanu, nang a dinga thilpha, na khawsakna ding hun ngaihtuoh sak lo ding ka him?

² Chun, I chanau pau Boaz, a suok nungakte laka na na va sepna pa kha a um hilo ahim? Ngaitie, Boaz in tuzan leh buhphuol ah a buh zap ngim ding ahi a.

³ Khutichun, kisil thieng inla, sathau kinuh inla, kicheina van in kivan inla; phuol achun va chieh in: amahvang chuh nek leh dâwn a zawh masang in a kawmah kihetsak hiel ki’n.

⁴ Chun, hiti hi hi’n tin, a kuol tieng leh a kuolna mun chuh tiemteh inla, chun, lut inla, a keng hâwk inla, kuol in, chun, amah chun na hih ding hun hilh in a,” a ti a.

⁵ Chun, Ruth chun a kawmah, “Na gen takphawt chuh hih zel ing ka,” a ti a.

⁶ Khutichun, Ruth chuh buhphuol achun a va chieh a, a talpinu’n a gen bang tak chun a hih ta a.

⁷ Chun, Boaz chun an a ne a, tui a dâwn zawh chun, lungthim kipâk tak kawmin buhvum bul a giek ding chun a chieh ta a; a kuol ta a. Ruth chuh awlcha’n a chieh a, a keng khuhna chuh a hâwk a, a kuol tai.

⁸ Chun, hiti hi ahi a, zan khang chun amah chuh thakhat in a hung phuguih a, a leh lam a nga, a et viel leh, ngaitie, a kengthuon achun numei khat ana kuol ta mai a.

⁹ Chun, amah chun, “Kuo na hi?” a ti a. Numei chun, “Na suoknu Ruth ka hi: na suoknu hi na puon silh ei kawp in, ka chanau bul na hi ngâla,” a ti a.

¹⁰ Chun, Boaz chun, “Ka chanu, Lalpa’n hun vangsak hen.” “Tangval gimthei ahim, neizo ahim na zuih loh zie hih a tûng lai sangin le a nung lam hin na phatna na sulang zaw ta a.

¹¹ Khutichun, ka chanu, lau ki’n; na gen bang takin na chungah hih ing ka; zie khuo a micheng hin numei phatak na hi tih a he suok ngâl u a.

¹² Chun, kei hi na chanau kinaihpih chuh ka hi a; himahleh, kei sanga na kinaihpih zawk khat a um hi.

¹³ Tuzan hin chuh giek phawt inla, zingkal leh amah chun kigamngakna dinga hih ding dawl chuh a hih chun, a pha hi’n tin; zie chuh hih hen. Himahleh, na chunga a hih ding chuh ama’n a hih loh chun, kigamngak dinga hih ding chuh hih ngêi ing ka, Lalpa chuh a hing zing hi, zingkal tiengin zie hin a na kuol zingin,” a ti a.

¹⁴ Tichun, zingkal tiengin Ruth chuh a kengthuon ah a kuol ta a, chun, khuo kimuhchet theih ma’n a tho a, “Buh phuol achun numei chuh a hung hi tih kuoma’n he kihen,” a ti a.

¹⁵ Chun, a kawmah, “Na puon silh kha hun chawi inla, dawh in,” a ti a. Tichun, a hun dawh phet in buhmanpawl chuh tehna dim gup a teh a, a puok sak ta a; tichun, khuo ah a chieh ta a.

¹⁶ Chun, a talpinu kieng a tun phet chun, “Ka chanu, bang na hung tina le?” ti’n a na dawng a. Chun, amah chun, zie pa chun a chunga thil a na hih dân chengcheng chuh a hilh a.

¹⁷ “Zie buhmanpawl hi tehna dim gup ei pie a, na talpinu kawm achun khutngawn in chieh hiel ki’n, ei na tii,” a ti a.

¹⁸ Chun, Naomi chun, “Ka chanu, bangti’n thil a hung um dem tih na het ma cheng chuh ngak mai in: tuni a zie thil hi a sukfel masang in zie pa chuh thip mai ding ahi puoh ngâl a,” a ti a.