RUTH 2 - PATHIEN LEKHABU THIENGTHO (BSI)

Ruth Nasepna

¹ Chun, Naomi chun a pasal Elimelek inkuon kinaihpih, mi hausa tak a nei a; a min chuh Boaz ahi.

² Chun, Moab numei Ruth chun, Naomi kawmah, “Lo lam ah chieh ing ka ting, kuo hileh ei na lungsiet te buhsang chuh va hawl ing ka aw,” a ti a. Chun, Naomi’n a kawmah, “Chieh ta leh, ka chanu,” a ti a.

³ Tichun, a chieh ta a, buh âtte nutsieh haw chuh a va hawl ta a; tichun, Elimelek inkuon Boaz lo achun a va chieh kha khel khel a.

⁴ Tichun ngaitie, Bethlehem apat in Boaz chuh a va chieh a, buh âtte kawm achun, “Na kawm u ah Lalpa um hen,” a ti a. Chun amau chun, “Lalpa’n hun vangsak hen,” ti’n a dâwng u a.

⁵ Khutichun, Boaz chun a suokte laka buh ât lawiupa kawm achun, “Zie nungak hi kuo ahi?” a ti a.

⁶ Chun, buh âtte laka lawiupa chun, “Moab nungak, Moab gam apat Naomi kawma hung khah ahi.

⁷ Chun, amah chun, ‘Ei lungsiet inla, na buhsang uh hawl ing ka ting, buh âtte’n buhphal a lâkkhâwm zawh tieng u leh hawl zel ing ka,’ a ti a. Tichun, a hung tun apat chawmcha a kichawlh tihloh chuh zingkal apat kichawl lo a nasem zing ahi,” ti’n a dâwng a.

⁸ Khutichun, Boaz chun Ruth kawm achun, “Ka chanu, ngaitie, buhsang hawl dingin midang lo ah chieh ki’n la, zie apat hin kichawn ta ki’n la; ka suok nungakte kawmah hin um zing in,

⁹ A buh ât uh hi en zui zing inla, a nung uh zul zel in; tangvalte chuh bangmah hun lawh lo dingin thu ka pie zo tai. Chun, na dang a châk cheng leh tuibel a tangvalte tui khaihsa va dâwn zieng sek in,” a ti a.

¹⁰ Khutichun, a khun a, a maichang a lei si’n a bawkkhup a, a kawmah, “Nam chuom mi ka hi ngâl a, bangti dana nangin nei hiti het nawp a nei lungsiet ahim?” a ti a.

¹¹ Chun, Boaz chun a dawng a, a kawmah, “Na pasal thih apat a na talpinu chunga na thilhih dante chengcheng mi’n ei hilh vek u a; chun, na nu leh pa leh na pienna gam hun taihsan a, na mi hêtkhâk lohte kawma na hung dân haw le.

¹² Lalpa chun na phatna chuh hun din hen la, Lalpa Israel Pathien, kihumbitna dinga a thanuoi na hun belh pa chun na phat man nasa takin hun pie hen,” a ti a.

¹³ Chun, amah chun, “Hepu, nei lungsiet in, nang in nei thamuon a: na suok nungakte laka pang hi kimahlengle, na suoknu hi phatak in nei hopih ta ngâl a,” a ti a.

¹⁴ Chun, an nêk hun chun Boaz chun a kawmah, “Hung inla chângthâk haw hi hung ne’n la, chângthâk thêm haw hile uain thuk ah hung dieh in,” a ti a. Khutichun, buh âtte kawm achun a chu a; chun, chângthâk haw chuh a pieu a, a ne a, a vah nung inle nekval a nei nalai a.

¹⁵ Chun, buhsang hawl dinga a kipat kit phetin, Boaz chun a tangvalte kawmah, “Buhphal laka le luok zel hen la, na sukzahchak loh dinguh ahi.

¹⁶ Chun, buhphal lawm laka haw le zûk dawk unla, nusieh zel unla, luok henla, na gaih loh dinguh ahi,” ti’n thu a pie a.

¹⁷ Khutichun, nitâk lam tiengin lo a buhsang chuh a luok a; chun a hawlsa chuh a khena, buhmanpawl Ephah khat vel a ngah a,

¹⁸ Tichun a puoh a, khuo achun a chieh ta a. Chun, a talpinu chun a buhsang hawl chuh a na mu a; chun amah chun a sun-an nekval chuh a ladawk a, a talpinu chuh a pie ta a.

¹⁹ Chun, a talpinu chun, “Tuni’n khawi ah buhsang na va hawl hi? Khawitak ah na na va sem hi? A hun na he nuom pa chuh vangsak in um hen,” a ti a. Chun amah chun, kuo kawma va sem ahim tih a talpinu chuh a hilh a, “Tuni a na ka va sepna pa min chuh Boaz ahi,” a ti a.

²⁰ Chun, Naomi chun a monu kawm achun, “Lalpa mihing leh mithi chunga a nunnemna hai diek lo pa chun amah chuh vangsak hen,” a ti a. Chun, Naomi chun a kawmah “Zie pa chuh I chanau bulpen u leh I kinaihpih uh ahi a puo,” a ti a.

²¹ Chun, Moab numei Ruth chun, “Hi ngût in a, ka kawm ale, ka buh hi a ât zawh macheng un ka tangvalte kawm ahin tel zing in le ei tih ahi,” a ti a.

²² Chun, Naomi chun Ruth kawm achun, “Ka chanu, lo danga a hun muh loh na dingin suok nungakte lak ngen achun tel leh chin pha ding ahi,” a ti a.

²³ Khutichun, buhmanpawl leh buhpi ât zawh tiengin Boaz suok nungakte lak ngawn achun buhsang hawl in a chieh zing a; khutichun, a talpinu kawm achun a um zing a.