ROME 9 - PATHIEN LEKHABU THIENGTHO (BSI)

Pathien leh a Mitelte

¹ Krista achun thudik ka gen a, ka lepchieh ahi puoi. Thagau thiengtho zal chun, ka sie leh pha hetna hin le ei hetpih a,

² Ka lunggil ahin dahumna nasa tak leh lungngaihna hai theilo ka vawp a puo.

³ Ka suohpihte, phehlevo a ka chipihte sik in kei hi Krista kawm apat hansie dawl in um hiel leng ka ti ngâla.

⁴ Israel mi ahi ngâl u a, cha hihna le, Pathien nasepna le; thutiem chengcheng le amau haw a ahi ngâl a

⁵ Chi hun suonte chule amau ahiu a, phehlevo lam thu achun Krista chuh amau haw apat hung pawt ahi a; Pathien chuh thil chengcheng chunga vaihawm, kumsawt a pahchak tâk ahi. Amen.

⁶ Pathien thutiem chuh a lawhsam tai ti ka hi puoh a; Israel mi chengcheng chule Pathien mite ahi suok diek puou ui.

⁷ Abraham suonte a hih ziekun le Pathien chate ahi suok diek puou hi. Pathien in Abraham kawmah, “Isak apat hin suon hun nei inla,” ti’n thu a tiem zaw hi.

⁸ Zie chuh, phehlevo a chate chuh Pathien chate ahiu ui tihna ahi puoh a, thutiem chate chuh Abraham suona san ahi zawu tihna ahi.

⁹ Thutiem chuh ziehi ahi: “Tuphat bang hin hung ing ka ting; Sarah chun chapa hing ina,” tih hi.

¹⁰ Khuti mai chuh ahi puoh a, Rebeka inle mi khat (I puu Isak) apat nau phîk a vawp lai khan naucha chuh ana pien mau a, sie leh pha a hih mau in;

¹¹ Thilhih ziek hilo in, a sampa deih lam zawk in, tel a hihna lam thu a Pathien thuguot chuh a det theihna’n a kawmah,

¹² “A upa zaw’n a chapang zaw na sepsak ina,” a tih khah.

¹³ “Jakob ka hehpih a, Esau vang chuh ka hâwi,” tih zik guol khan.

¹⁴ Banga I gen naklai ding u leh? Pathien a chun diktat lohna a um a ahi leh? Naisai lo e!

¹⁵ Amah chun, “Ka khuotuoh tâk phawt chuh khuotuoh ing ka ting, zah ka ngaihna chung taphawt a chun zahngai ing ka,” ti a Mosi kawma a gen khah.

¹⁶ Zieziekchun, mihiemte deih ziek ahi puoh a, a thilhih ziek u le ahi diek puoh a; Pathien hehpihna ziek ahi zawi.

¹⁷ Pathien Lehkha thu’n Aigupta leng kawm achun, “Zieziek hin ka hun tundawk na hi; nangmah a chuh ka thilhih theihna ka etsak theihna dingin leh, lei chung cheng chenga ka min a than theihna dingin,” a ti ngâl a.

¹⁸ Khutichun, Pathien in a deih cheng chuh a khuotuoh sek a, a ut leh a sulochal sek hi.

Pathien Lungnatna leh Hehpihna

¹⁹ Himahlele, na lak u a khatto in ka kawmah, “Khuti a hih leh, Pathien in mite diklohna bangti dana a muh ahi ta dem? Pathien deih lam kuo a dodal thei ding?” ti’n lau.

²⁰ Ahi, himahlele, aw mihiem, Pathien dawng kit thei dingin kuo na hi a ahim? Thilsiem chun a siempa kawmah, “Bangati a tawbang ahi ei siem?” a ti thei dinga ahim?

²¹ Bellei tâng khat apat a, bel khat lul taka denga, bel khat lullo taka dêng dingin, bel dengpa chun, bellei chungah thu a nei puoh a ahim?

²² Khuotuohna bel, lopi dinga a na guonggalh khawlte chung achun;

²³ A neihzawhna hauh zie etsak theihna dingin; lungnatna bel, mangthai ding guolte chunga chun, Pathien in a lungnatna leh a thilhih-theihna latsak nuom mah lele a dawh hâmhâm chun, banga khawk ding?

²⁴ Zie khuotuohna belhaw chuh Judate lak apat mai hilo in, Jentel te lak apat a sapte le I hiu ui.

²⁵ Hosea Lehkhabu a, “Ka mite hi ngeilo chuh, ‘Ka mite,’ ti’ng ka ting; Chun, hehpih khak loh nu chuh, ‘Hehpihnu’ ti’ng ka,

²⁶ Chun, tihi hung hi’n tin, a kawm u ah, ‘Ka mite na hi puou hi,’ a tihna mun ngeia chun Pathien hing chate vawh in um un au,” tih zik guol khan.

²⁷ Isai inle Israel mite thu kikopih in, “Israel mite chuh tuisuohgiet pîlnel zat in tam mahleu le, a gawt mâwkte mai chuh hukdam in um un au.

²⁸ Lalpa chun kintaka hih zo diem in, lei chungah a gawtna ding thu muolsuoh ding ahi ngâl a,” a tih khah.

²⁹ Isai mah in, “Mipite Lalpa chun chi sep zak ding ei na nutsieh lo hi le chuh, Sodom khuo guolin ana um tai ting uh, Gomorra khuo guolin siem in ana um tai tiu,” ti a a gen guol mah khan.

³⁰ Banga I gen naklai ding u leh? Jentel te diktatna delh lote chun, diktatna mu tau hi, taksanna zieka diktatna ngêi chuh.

Israel te Dinga Paul Pauchamna

³¹ Israel te, diktatna Dan delhte vang chun, diktatna Dan chuh a phazo ta puou hi.

³² Taksanna’n a delh puou a, thilhih a muh theih guola a delh zawk ziekun ahi. Pukna suongpi a chun a puk ngâl u a:

³³ Pathien Lehkhathu’n, “Ngaitie, Zion achun pukna suong leh Dalna suongpi ka kawih a; Kuole, amah gingcha ta chuh Muolpho puo’n au,” ti a a gen guol khan.