ROME 5 - PATHIEN LEKHABU THIENGTHO (BSI)

Pathien Masanga Thiemchanna

¹ Zieziekchun, taksanna zieka thiemchang I hih tâk ziekun, I Lalpau Isu Krista vangin Pathien tawh kicham I hitau hi.

² Amah ziek mah chun, zie lungsietna a I din detnau ahin, taksanna’n I lut tau a; Pathien lopina kinem in kipâkin um hitiu.

³ Chuleh, khuti mai chuh hilo in, I gimtheihnau ale kipâkin um hitiu, gimtheihna chun thuokhatna a siem a;

⁴ thuokhatna chun hetchilna a siem a, hetchilna chun kinepna a siem hi tih I he ngâl u a.

⁵ Thagau thiengtho I kawm u a ei piek khan, Pathien hehpihna chuh I lunggil u a a sunthak tâk ziekin, zie kinepna chun ei sulungkham puoi.

⁶ I hât loh lai u khan, a phatcha’n Krista chuh mi gilote sik in a na thi ta ngâl a.

⁷ Mi diktat sika thih mi nuom leh a kilawm puoh ngâl a, mi pha sik in vang chuh, mi kuo ahim bêkin, thih chuh a na ngam kha mawh die.

⁸ Himahlele, Pathien chun a mi hehpihna chuh pahchak takin ana latsak a, migilo I hih lai u a, Krista I sik u a a thih ziek khan.

⁹ Khutichun, a thisana thiem chansaka I um tâk nung u hin, amah vang chun Pathien lungnatna apat chun hukdam in um ngêi hitiu.

¹⁰ Melma I hih lai u a bawn, a Chapa thihna vanga Pathien tawh na kichamsa I hih chun, kichama I um tâk nung u hin, a hinna vangin hukdam in um ngêi hitiu.

¹¹ Khuti chauh chuh hilo in, kichamna, tu a ei muhsak pa, Krista vang chun Pathien ah I kipâk uh ahi.

Adam leh Krista

¹² Khutichun, mi khat ziekin gitloh khawvel ah a lut a, chuleh, gitloh ziekin thihna a lut a; khutibang mah chun, mi chengcheng in thil a na sukkhelh tâk ziekun, thihna’n mi chengcheng a zel suok ta a.

¹³ Dan um masang in gitloh khawvel ah a um ta ngâla; Dan a um loh ngâl chun, gitloh chuh gitloh a ngaih ahi puoi.

¹⁴ Himahlele, Adam a thak in, Mosi tiengin Adam sukkhelhna banga thilhih gilo-lote chung ale thihna chun vai a hawm sek hi. Adam chuh a hungkit ding pa chu tawh tehkal ahi.

¹⁵ Himahlele, thil thawnpiek chuh gitlohna tawh akibang kit puoi. Mi khat gitloh zieka bawn, mi tamtak a na thih u chun, Pathien lungsietna leh mi khat, Isu Krista lungsietna vanga thilpiek chuh mi tamtak chungah vuk in um ngêi ina.

¹⁶ Chuleh, thilpiek chuh mi khat gitloh zieka thil hung um tawh le akibang kit puoi; mawhchansakna vaihawmna chuh mi khat ziekin a hung um a, thiemchansakna thil thawnpiek vang chuh, gitloh tamtak ziekin a hung um zaw ta ngâl a.

¹⁷ Mi khat gitloh zieka thihna’n, zie mi khat ziek mah a vai a hawm ngâl chun, lungsietna nasatak leh, diktatna thilpiek mute haw chun, mi khat Isu Krista vang khan hinna achun vaihawm ngêi un au.

¹⁸ Khutichun, khat sukkhelh ziekin, mawhchansakna vaihawmna chuh mi chengcheng chungah a hung um a; khutibang mah chun, khat diktat ziekin, hinna muh na’n, thiem chansakna thil thawnpiek chuh mi chengcheng chungah a hung um tai.

¹⁹ Mi khat sukmawh ziek khan mi tamtak chuh migilo a hung hi tau a; khutibang mah chun, mi khat thu awih ziek khan mi tamtak chuh diktat hung hi’nau.

²⁰ Chun, sukkhelh kilat zawk theihna’n, Dan a hung um a. Himahlele, gitloh punna chengah lungsietna chule a pung zaw diek sek hi.

²¹ Gitlohna’n thihna a vai a hawm guol mah in, lungsietna chun diktatna’n, kumkhuo hinna chan theihna khawp in I Lalpau Isu Krista zal chun vai a hawm tai.