ROME 4 - PATHIEN LEKHABU THIENGTHO (BSI)

Abraham apat Etsakna

¹ A hih leh, Abraham, phehlevo dana ei uh ei suonpa chun, bang a mûi I ti ding u le?

² Abraham in thilhih zieka thiem a chan ngâl chun, suon ding a nei ahi; Pathien lam vang achun a nei puoi.

³ Pathien lehkha’n banga a gen leh? “Abraham chun Pathien a gingcha a, chun, zie taksanna chuh a diktatna a san ahi,” ti’n a gen hi.

⁴ Chun, nasempa lawh chuh lungsietna a san ahi puoh a, bata san ahi zawi.

⁵ Himahlele, na sem lo a, Pathien limsak lo te nasan thiem chansak pa gingcha zawte, taksanna chuh amah diktatna a san ahi.

⁶ Mi, a thilhih ngaihtuoh lo a, Pathien in diktata a sân pên chuh, vang a piek sak thu David inle.

⁷ “A sukkhelhnau ngaihdama um leh, A gitlohnau melhkhuh a um chuh a hamphau ui;

⁸ Lalpa’n manlohna nei a a san loh chuh a hamphau hi,” ti a a gen guol khan.

⁹ A hih leh, zie hamphatna chuh zektan haw chung maia um ahi leh, zektan lohte chung ale? “Abraham taksanna chuh a diktatna a san ahi,” I ti ngâl u a.

¹⁰ Zie chuh bangtia san a hi leh? A zektan masang in ahi, ahihloh leh a zektan nung in? A zektan nung in ahi puoh a, a zektan masang in ahi zawi.

¹¹ Khutichun, zektan loh a a um lai apat in, diktatna a mui tih hetna’n, zektan melchikna chuh a mu zaw ahi. Zieziekchun, zektan loh hi leu le, a gingcha cheng chengte pa ahih theih na dingin, diktatna chuh amau a ding ale guot ahi.

¹² Chun, zektan haw pa le ahi a. zektan haw pa chauh hilo in, I pau Abraham zektan loh a a um laia, taksanna a neih guola nei chengcheng te pa le ahi zawi.

Pathien Thutiem Ginna a Kimu

¹³ Chun, Abraham leh a suonte kawm a vannuoi a go luohpa ding hi’n a tih thutiem chuh dân ziek ahi puoh a; taksanna a diktatna ziekin ahi zawi.

¹⁴ Dana mite chuh goluoh ding ahih u chun, taksanna chuh bangmah phachuom puo’n tin; thutiem chule pannabei hita ding ahi.

¹⁵ Dan chun lungnatna a siem sek ngâl a; himahleh, Dan um lohna chun sukkhelhna le a um puoi.

¹⁶ Thutiem chuh ginna a kinga ahi a, zieziekchun, thutiem chuh Abraham leh a suonte dinga thil thawnpiek a ngaih ahi a, Dan thupiek zuite mai hilo in, Abraham guola ginchakna neite chengcheng dingin le a hung hi tai. Abraham chuh I bawn chau a dingin thagau lama I pau ahung hi tai.

¹⁷ “Nam tamtak te pa’n ka hun siem hi,” ti a a gen guol khan. Mithite suhingpa leh thil umlote a um banga gen pa a ginchak Pathien mitmuh ah.

¹⁸ Kinepna a um loh nung inle, amah chun kinem takin a gingcha a, chi tamtak te pa a hung hih theihna’n; “Khuti zat khun na suonte hung um un au,” ti a kigen guol khan.

¹⁹ Chuleh, ginna a detlo diek lo in, a sapum thisa guola um chuh a ngaihtuoh a, (amah chuh kum zakhat vel mi ahi ta ngâl a), Sarah chîn chule a ngaihtuoh puoh a.

²⁰ Himahlele, taksanna tasam in, Pathien thutiem chuh a ginglah puoh a, Pathien a limbawl a,

²¹ A thutiem chuh a guitun sak thei hi tih a gingcha a, a taksanna chuh a sudet zaw ta a.

²² Zieziekchun, a taksanna chuh a diktatna a san ana hi tai.

²³ Khutichun, “A taksanna chuh a diktatna a sa’n ahi” tih zik hi amah a ding maia zik ahi puoi.

²⁴ Himahleh, mithi lak apat I Lalpau Isu kaithopa chuh I ginchak u a ahih chun, ei u ding inle diktata san hi ding ahi.

²⁵ Isu chuh I gitloh ziekun thah in a um a, thiem I channa dingun kaihthawh in a um ta ngâl a.