ROME 15 - PATHIEN LEKHABU THIENGTHO (BSI)

Midang te dinga Hindan ding

¹ Khutichun, ei uh hatlaite hin, eimau mai kisulungkim lo in, taksanna a zawngkhalte chuh I thuokpih zawk dinguh ahi.

² Eimah invengte sukphatchuomna dingin, a phatna dingun, sukkipak guo chiet hitiu.

³ Krista chun le, amah kipahna a hawl puoi. Pathien Lehkha thu’n, “Nang hun gaite hosietna chuh, kei chungah a chu ta a,” a tih guol khan ahi zawi.

⁴ Pathien Lehkha thu apat, thuokhatna leh lungbihna mu a, kinepna I neih theihna dingun malaia zik ta cheng chuh, eihaw ei sinsakna dingin zik ahi ngâl a.

⁵ Khutichun, I Lalpau Isu Pathien leh Pa chuh, lungthim munkhat leh kilungguol taka I limbawl theihna ding un,

⁶ thuokhatna leh lungbihna Pathien chun, Krista Isu gen guolin, lungthim munkhat pu chiet dingin hun siem ta hen.

Jentel te dinga Chanchin Pha

⁷ Khutichun, Krista’n Pathien suklopina dinga a hun lawp sek guol khan, kilawptuoh chiet un.

⁸ Ziehi ka gen chuh ahi: Pathien in I pu I pateu kawma a thutiem khah sudet ding leh,

⁹ A khuotuohna vanga Jentel te’n Pathien a limbawl theihna dingun, Pathien thu a dik hi tih hetsakna’n, Krista chuh zektante zenviel in a na um ta a: “Zieziekchun, Jentel te laka chun hun pakcha’ng ka ting, Na min limbawlna dingin la sa’ng ka.” tih zik guol khan.

¹⁰ Chun, “Nanguh Jentel chengcheng te haw, A mite tawh kipâk un,” a ti kit a.

¹¹ Chuleh, “Nanguh Jentel chengcheng te haw, Lalpa chuh pakchau un la; Mi chengcheng inle Amah chuh pakchau hen,” a ti kit a.

¹² Chun, Isai in, “Jessai zung chuh um intin, Jentel lenga um dingin A hung pawt ding chule um ina; Amah chuh, Jentel te chun kineppih un au,” a ti kit a.

¹³ Thagau thiengtho thilhih theihna zieka kinepna na hauh theihna dingun, kinepna Pathien chun, na ginchak ziekun, a kipakna leh chamna tin chengin hun hihdim hen.

Paul Sawlchak ahih na

¹⁴ Chun, ka suohpihte, nanguh chung thu achun vang, nangmau mawng phatna’n na dim u a, chitna tin cheng na hau u a; hilh le na kihilhtuoh thei nau hi tih, keimah ngêi inle diktak in ka he nai.

¹⁵ Himahlele, Jentel te laka Krista Isu zenviela ka pan theihna dingin, Pathien in ei piek, khuotuohna vang hin,

¹⁶ Nanguh hun hetsak kitna dingin, thu khenkhat khat chuh hangsan taka ka hun zik ahi. Jentel te chuh Pathien kawma sukthientho, Thagau thiengtho zâla amah a kipumpiek mi a hih theihna dingun, thiempu nasep guolin, Pathien Chanchin Pha chuh a kawm u ah ka gen ahi.

¹⁷ Khutichun, Pathien lam thilte ah Krista Isu achun suon ding ka nei hi.

¹⁸ Jentel te. Pathien thu zawp ding leh, thunung dinga puihna dinga Krista’n keimah manga, a thilhihte chuh hangsan takin ka gen ngam ahi.

¹⁹ Ziehaw chuh, thu leh thilhih in leh, melchikna leh thilmakte leh, Pathien Thagau Thiengtho mang in a hih a. Chun, Jerusalem apat a, Illurikam gam tienga ka zin lai in le, Krista Chanchin Pha chuh bukim takin ka gen zo tai.

²⁰ Ka thiltup ahih leh, Krista chanchin a na he kha nailote muna Chanchin Pha gen a, mi dang suongphuhsa chunga sak a hih lohna dingin, tih hi a hi zing zing hi.

²¹ Pathien Lekhabu’n: “A Chanchin na kigenkhak ngei lohna a mite chun muu un tin uh, a na zakha lote chun le na hen au,” ti a a gen guol a khah gen ka guot zawk sek ahi.

Paul Rome Khuo a Zin Guotna

²² Zieziek tak chun le ahi, na kawm u a hung ding ka kikhel sak zing sek na hih.

²³ Tuhin vang chuh, zie gam vel a hin, sepna mun ding ka nei ta puoh a, kum tamtak chuh, na kawm u a hung nuom in ka um ta ngâl a.

²⁴ Tuhin, hung ka kinem ta a. Chun, Spain gam ka hun tawh kawmin nang haw hun muh ka kinem a, nang haw tawh chawmkhat kipawl khawm nung leh, ka chiehna ding lama nei hung thak u le ka kinem hi.

²⁵ Tuhin vang chuh, Jerusalem a mi thiengthote panpih dingin chieh tadih phawt ding ka hi.

²⁶ Makedonia leh Akaia gama sapchuom umte chun, lungkim takin Jerusalem khuo a mi thiengthote laka chagahte dingin sum tuok khawm pha a sau a.

²⁷ Zie chuh, amau haw utna ngeia a hih uh ahi a; zie lo chun le, a panpih ding him uh le ahi: Jentel te’n thagau lam thu dawl a a kikawppih ngâl u chun lei vangsakna thila amau haw kikawppih chuh a kûl him ahi.

²⁸ Zieziekchun, zie nasep chuh kitûp taka ka hih zawh a, a sum tuok dawk hawu chule amau haw kawma ka piek dawk zawh phat chuleh, Spain gam zuona ka zin kawm chun, nanguh hun tawh malam ing ka.

²⁹ Chun, na kawm u a ka hung tieng chu leh, Krista Chanchin Pha a vangsakna bukim puo’n hung ding ka hi tih ka hêi.

³⁰ Suohpihte haw, I Lalpau Isu Krista leh, Thagau ei piek, lungsietna vang hin, Pathien kawma ka thil ngetna a hin phachuomngai takin ei ngetpih dingin ka hun nget na hiu hi.

³¹ Judia gama ginglote laka ka bit theihna dingin leh, Jerusalem khuo a ka nasepte chuh, zie a Pathien mite dinga chuh pawm tâk a hih theihna dingin ei ngetpih un.

³² Khutichun, Pathien phasak lam a hih chun, na kawm u ah kipâk takin hung ing ka ting; I kisukhalh khawm chiet theih na dingun.

³³ Chamna Pathien chuh na bawn u a kawmah um ta hen. Amen.