ROME 13 - PATHIEN LEKHABU THIENGTHO (BSI)

Gamsung Vaihawmte

¹ Mitin, a chung u a vaihawmte thu thu’n um u hen. Pathien thu lo in vaihawmte kuomah a um puoh ngâl u a; vaihawmte hih Pathien guot ahiu hi.

² Zieziekchun, kuole, vaihawmte niel chuh, Pathien guot dodal ahiu a; a dodalte chun amau chungah vaihawmna mu’nau.

³ Vaihawmte chuh thilpha hihte dingin lauh-um ahi puou a; thil phalo hihte dingin vang chuh lauh-um ahiu hi. A hih leh, vaihawmtu lau lo a um na nuom em? Thil pha hih leh chin a pahchak uh lawh inla;

⁴ amah chuh na phatna dinga Pathien suok ahi ngâl u a. Himahlele, thil phalo na hih chun, lau ah, chemzâm chuh a mawk chawih puoh ngâl a; amah chuh Pathien suok, thil phalo hihte chunga lungna a phuba lapa ahi ngâla.

⁵ Zieziekchun, lungnat lauh ziek mai hilo in, na sie leh pha hetna vangin le, vaihawmpa thu thu a na um ding him ahi.

⁶ Zieziek hin sieh le na chawi sek uh a puo, khutibang thil hih hâm hâm ding mâwnga chuh Pathien zenviel ahi ngâl u a.

⁷ Mi chengcheng kawmah piek ding ta cheng pieu inla; khasana piekna ding pa kawm achun khasana pieu inla, sieh piek na ding pa kawm achun sieh pieu unla, hih ding chuh hih unla, hugin ding pa chuh hugin un.

Khat le Khat kal a Sep ding

⁸ Kihehpih tuohna ngâllo chuh kuomah bangmah ba kiu; eimah mihing chanpih hehpih chun, dân chuh a hawh bukim ta ngâl a.

⁹ Zie thupiek, “Zawlsai kih, tuolthat kih; gucha kih, awtcha kih,” tih leh thupiek dang na um himhim haw hih, “Nangmah na kihehpih guolin na vengte na hehpih ding ahi,” tih hin a khaikhawm vek ngâl a.

¹⁰ Hehpihna’n vengte a sukhuolo ngei puoh a; zieziekchun hehpihna hi dân hawh bukimna ahi.

¹¹ Tulai thil umzie na het ziek u leh, ipmu thawh halh a hun tak zet tai tih na het ziekun, zie chuh ka gen ahi; tuhin chuh, I awih tûnglai sang u khan I hukdamnau chuh a nai zaw ta ngâl a.

¹² Zan hi a bei vangvang ta a, khuo vak ding ei ta ie; zieziekchun, thim laka thilhih chuh paih hi tingun eng thuom in kithuom hitiu.

¹³ Sun a um guolin, hawih takin um hitiu, zu dâwn buoi leh zukham a um lo in, hûk leh kideihcha a um lo in, kisuol leh kimitthîp a um lo in,

¹⁴ Lalpa Isu Krista chun kithuom zawu inla, na phehlevo utnau pitin dingin bangmah hih kiu.