PHILIPPI 3 - PATHIEN LEKHABU THIENGTHO (BSI)

Diktatna Diktak

¹ A chaihna kêi in, ka suohpihte haw, Lalpa achun kipâk un. Thu kibang mah na kawm u a hun vel zik kit hi. keia dingin vang chimchâk um a hi puoi, nang haw dingin le a phachuom ngâl a.

² Uicha te lak achun chingthei un; thil phalo bawlte lak achun le chingthei un!

³ Eihaw, Pathien Thagau zâla Pathien ho leh, Krista Isu kisuonpihte leh, phehlevo pawlam chunga zek le chan kibawlte chunga ginna ngalote hi, zektan haw I hizaw ngâl u a.

⁴ Nuom vang leng keile, phehlevo pawlama zek le chan kibawlte chunga ginna kimuonpih nei a a kingaih u chun, kei ka kingai zawsem hi.

⁵ Ni giet ni a zektan, Israel suon, Benjamin chi, Hebraite laka Hebrai a pieng ka hi.

⁶ Dan lam achun Pharisai ka hi a; gunchuhna lam achun sapchuom haw sugimthei pên ka hi a; Dan thu a diktatna lam achun paulap bei ka hi ngâl a.

⁷ Himahlele, kei dinga thil phachuom hi a ka ngaih takphawt chuh, ziehaw ngêi chuh Krista vangin chânna a ka ngaih ahi.

⁸ Ziehaw mai chuh hilo in, Ka Lalpa Krista Isu hetna chuh a lopi zawk bêk ziekin, thil bang cheng le chânna a ka ngaih vek ahi. Amah ziekin thil chengcheng ka chan vek ta a; ziehaw chuh thil bangmahlo mai in ka ngai a, Krista ka muh theihna ding leh,

⁹ Amah tawh pumkhata ka um theihna dingin. Keimah diktatna, Dan thu zawp zieka diktatna chuh ka nei ta puoi. Himahlele, tuhin, Krista taksanna zieka diktatna, Pathien apat a diktatna ngêi, taksanna zieka um ngêi chuh ka nei tai.

¹⁰ Ka nawppen chuh, Krista het a, a thawhkitna thilhih theihna chan a, a thuokna kikawppih a, a thihna kibatpih a um leh,

¹¹ Keimah mawng le thihna apat a hinna a kaihthawh a um kinepna nei a um chuh ahi.

Kungmun Lam Zuonin

¹² A musa kiti ka hi puoh a, a bukimsa kiti le ka hi diek puoi; himahleh, Krista ei matlawhna pên kipahman chuh ka mu thei khâi mawh ti a, hah delha ka delh zawk ahi.

¹³ Suohpihte, a musa’n ka kingai puoi; himahlele, thil khat ka hih sek hi, nung lama thil um haw chuh hengilh in, malam a thil um haw chuh ka delh zawk sek ahi.

¹⁴ Khutichun, chunglam sapna, Krista Isu a Pathien sapna kipahman chuh mu dingin, kungmun lam chuh ka zawt hâm hâm sek ahi.

¹⁵ Zieziekchun, I bawn un, thagau lama piting ta, khutibang lungthim pu chun um hitiu. Himahlele, a bang lungthim chuom pu na hih u chun, Pathien in hun hetsak na’na.

¹⁶ Bang hitalele, I phakna tieng u a pat in malam zuon zel hitiu.

¹⁷ Suohpihte, ka umdan late hung hiu un, nang haw dinga ettawn ding kei haw nei nei u a, ka umdan bang u a umte chuh entawn un.

¹⁸ Mi tamtak, a hinnau a Krista thihna kross melma a kisiem a um u a; ziehaw chuh tuma’n tamtak vei nanguh ka hun hilh sek kha, tuhin le kap kawma ka hun hilh na hiu hi.

¹⁹ Ziehaw tawpna chuh gawtmun a hi a, a pathien u chuh a gilpiu ahi. A lopina hawu chule a zahhuoinau a hi a, zie khawvel thilte mai hi a lunggulh sek ngâl ui.

²⁰ Eihaw vang chuh van khuoletui hihna nei I hitau a, van apat a ei hukdampa Lal Isu hung ding chuh ngaklah takin I thil zing ui.

²¹ Amah chun I taksau thithei chuh hih lamdang in, amah taksa lopi bang tak chun siem intin; zie thilhih theihna mah chun, thil chengcheng chuh amah thu nuoi ah a kawih thei ngâl a.