PHILIPPI 1 - PATHIEN LEKHABU THIENGTHO (BSI)

¹ Paul leh Timothe, Krista Isu sawntawlawi te apat chun-Krista Isu tawh kipumkhata um, Philippi khuo a mite kawm leh, Sapchuom lawiupate leh zenviel te kawm achun.

² Pathien I Pau leh Lalpa Isu Krista kawm apat lungsietna leh chamna na kawm u ah um hen.

Sapchuomte dinga Paul Pauchamna

³ Nang haw ka hun geldawk cheng leh, ka Pathien kawmah kipahthu ka gen a:

⁴ chun, na bawn u a dinga ka paucham cheng leh, ni masapen apat tuni chan geia chanchin Pha nasepna lama

⁵ nei panpihna teu ziekin kipâk kawmin ka paucham sek hi.

⁶ Zieziekchun, Pathien, zie nasep pha nangmau a sem pan pa chun, Krista Isu Ni a a pitit tiengin sem zawm zel ina tih ka hechien ngâl a. Ka lunggil ah na um zing u a! Zieziekchun, tu a nang haw ka hun gel banga hun gel hi thil dik a hi him hi.

⁷ Chanchin Pha sukdetna dinga ka dinpihna thu zieka tu a suongkul a ka tan lai leh, zalen taka ka umna haw a le, Pathien in hun khan ei piekte ei kikawppihte na hi ngâl u a.

⁸ Nang haw ka hun ngaihnatna hi Krista Isu lungthim apat ngêi a hi tih, Pathien ei hetpih a hi ngâl a.

⁹ Na lungsietnau chuh hetna diktak leh chitna bukim tawh a hung khan zel theihna dingin ka paucham sek a:

¹⁰ khutichun, Pathien lopina ding leh pahchakna dinga Isu Krista zâla diktatna gah um achun hung dim in,

¹¹ Krista Ni a dinga chuh a tak tak leh sukkhelh bei na hih theihna dingun thil phapen chuh tel thei un lau.

Hin hi Krista ahi

¹² Chun, suohpihte, ka chunga thil hungtunghaw khah Chanchin Pha masawnna ding zawk a hi tih na hetuh ka nuom hi;

¹³ khutichun, ka bulputna haw hi Kaisar In pi sung leh mi danghaw kawm achun Krista sawntawlawi ka hih ziek ahi tih a kiphuong ta ngâl a.

¹⁴ Chun, Lalpa a suohpih tamzaw te chun le ka bulput zieka taksang det in, lau lo in Pathien thugenna lam achun a hangsan zawsem uh ahi.

¹⁵ Mi khenkhat in vang, kiguol-en leh kinielna ziekin Krista thu a tângsappih sek ui; lawikhat chun Chanchin Pha humbitna thu gen dinga guot ka hi tih kihet in,

¹⁶ hehpihna ziekin a gen sek ui.

¹⁷ Lawikhat in vang, suongkul a ka umna a hin lungkhamna ei behlap sak guo’n, tih taktak na hilo in, kinielna ziekin Krista thu a gen zaw sek ui.

¹⁸ Abang chu hitaleh a khawk puoi! A lêm in ahim, a tak in ahim ahih theihna chin a Krista thu gen ahih phawt chun, ka kipâk a, kipâk zel ing ka.

¹⁹ Nei paucham sakna ziek u leh, Isu Krista thagau apat a panpihna hungte ziek chun thahdawk a um ding ka hi ngâl a.

²⁰ Ka utpen leh ka kinepna pên chuh, ka nasep ding hi thulh lo a, himahleh, hun tina, a diek takin tulai taka hi hansanna a ka dim a, ka thih in le, ka hin in le Krista chuh ka sapum a limbawl a a um theihna dingin.

²¹ Keia dingin vang hin hi Krista a hi a, thih le hamphatna ahi.

²² Himahlele, phehlevo a hin hi ka chan hi hen la, zie chuh ka nasep gah bang hita leh, a hawizawk ka tel ding vang ka he puoi.

²³ A kal lak a hin a lawhna helo a um mai ka hi; chieh dawka Krista kawma um nawpna ka neih ziekin, zie chuh a pha zaw mah mah ngâl a.

²⁴ Himahlele, nang haw ziekin phehlevo a hin zing hi a kûl zawi.

²⁵ Zie chuh ka kimuonpih ziekin um zing ding ka hi tih ka hêi, taksanna achun na hung khantoh theihna dingun leh na kipakna dingun na bawnchau a kawmah um zing ing ka tih ka he a,

²⁶ khutichun, na kawmuh a ka hungkit ding ziekin nei suonnau chuh Krista Isu a chuh a nasat zawksem theihna dingin.

²⁷ Bang hilele, na nunlekhan u chuh Krista Chanchin Pha tawh kimeh sak phawt un, khutichun, nangmau haw hung veh in na kawm u ah um kimahlengle, thagau munkhata ding det in lungthim munkhata Chanchin Pha taksanna lama pangkhawm in ei dote bang lam hileh lau lo in na um ui tih na chanchin uh he thei ing ka.

²⁸ Zie chuh amau haw dingin beimang ding a hih uh kilatna kichien tak a hi a, nang u dingin vang hukdam ding na hih uh hetsakna kichien tak a hi zawi; zie chule Pathien apat a um a hi ngâl a.

²⁹ Krista dinga nasep theihna ding hun lemchâng piek na hiu a, amah na ginchak mai uh hilo in. amah zieka na thuok uh le phal a hi ngâl a.

³⁰ Tuhin, kidona achun nei dopih thei tau a. Zie kidona chuh malaia keimah ngêi in ka do sek. na muh u leh na zak sek uh, tuni chan geia ka do sek ngêi hi.