PAWTDAWKNA 9 - PATHIEN LEKHABU THIENGTHO (BSI)

Gawtna ngana: Gancha Pûl

¹ Khutichun, Lalpa’n Mosi kawmah, “Pharaoh kawmah va chieh inla, ‘Lalpa, Hebraite Pathien in, ka mite hin kei ei ho theihna dingun pawtsak in.

² Na pawtsak phal loh a, na hen zing le vang, lo a na ganchateu chung achun Lalpa khut tung intin, sakawl leh sabiltung chung haw, sangawngsau leh bâwng hawn chunghaw leh

³ belam hawn chunghaw achun hi nasa tak mai leng in a.

⁴ Chun, Lalpa’n Israel te gancha leh Aigupta mite gancha chuh khenchuom intin, tichun Israel suonte gancha chuh khatchale thi puo’n au,’ a tii, ti’n gen in,” a ti a.

⁵ Chun, Lalpa chun, “Zing leh Lalpa’n zie gam ahin zie banga chuh hih ding ahi” ti’n hun a guot ta a.

⁶ Lalpa chun a zing chun zie tawbang chun a hih ta a, tichun Aigupta mite gancha chengcheng chuh a thi vek ta a; himahlele Israel suonte gancha chuh khatchale a thi puoi.

⁷ Chun, Pharao’n mi a sawl a, chun, ngaitie, Israel mite gancha chuh khat chale ana thi puoh a. Himahleh Pharaoh lunggil chuh suktak in a um a, mihaw chuh a pawtsak phal kit ta puoh a.

Gawtna Gupna: Uilut

⁸ Chun, Lalpa’n Mosi leh Aron kawm achun, “Thukkhuk a vut khut dim in va ham unla, Pharaoh mitmuh ngêi in Mosi’n van lam ah vawk to hen.

⁹ Tichun, Aigupta gamsung chengcheng chuh vut khu’n hung dim intin, zie chuh Aigupta gamsung cheng chenga mi leh sa chung achun uilut hung um intin, nai khuot takin um chiet un au,” a ti a.

¹⁰ Khutichun, thukkhuk a vut chuh a ham u a, Pharaoh masang achun a va ding tau a; tichun, Mosi chun van lam ah a vak vawk to a; tichun mi chengcheng leh gancha chengcheng chun uilut nasatak a vei chiet tau hi.

¹¹ Tichun, uilut ziek chun mitvaidawi thiemte chun Mosi chuh a el zo ta puou a, mitvaidawi thiemte leh Aigupta mite chengcheng chun uilut chuh a vei suok kêi ngâl u a.

¹² Himahlele, Lalpa’n Pharaoh lunggil chuh a sutak a, tichun, a thuu chuh a ngaitha nuom diek ta puoh a; Lalpa’n Mosi leh Aron kawma a gen tâksa guol khan.

Gawtna sagihna: Giel a Gawtna

¹³ Ziephet chun, Lalpa’n Mosi kawmah, “Zingkal matak in tho inla, Pharaoh ma ah va ding in la, a kawmah, ‘Lalpa Hebraite Pathien in, Ka mite’n kei ei ho theihna dingun pawtsak in.

¹⁴ Tuchung hin vang nang leh na suokte chung leh, na mite chung ahin hi chitin lênsak ding ka hi; tichun, leichung pumpi ahin Kei tawbang kuomah a um puoi tih hun he’n la.

¹⁵ Khutichu hi kile chuh, ka khut tha’ng ka ting, khawvel apat ahih hun na sumang kêi ta ding ka hi a.

¹⁶ Himahlele, zie ding ahih ka hun tundin na hi, ka thilhih theihna hun etsak ding leh khawvel chengchenga ka min a hung kithan theihna dingin.

¹⁷ Ka mite chung ahin na kichawisang zinga, na pawtsak nuom puoh ngâla.

¹⁸ Ngaitie, zing leh tuhun vel hin, giel tampi, Aigupta gam um tûnga pata, tutieng ale na kie kha lo chuh kiek sak ing ka.

¹⁹ Khutichun, phul laka na gancha haw leh, lo a um haw chuh khum tup sak meng in; mihing leh gancha, phul laka um, In a khum loh ta cheng, giel in sep intin, thi vek in au, a ti ie!’ va ti’n,” a ti a.

²⁰ Pharaoh miliente laka Lalpa thugen khawksa taphawt chun a suokteu leh a ganchateu chuh a khumtup u a.

²¹ Khenkhat chun vang Lalpa hilhlawkna chuh a khawksa puou a, a suokteu leh a ganchateu chuh gam achun a um sak zing u a.

²² Chun, Lalpa chun Mosi kawmah, “Van lam ah na khut vak tung inla, Aigupta gamsung cheng ahin, mihingte chung leh, ganhingte chung leh, lo a thai tincheng chunga chuh giel a hung kiek theihna ding in,” a ti a.

²³ Tichun, Mosi’n a tiengkhut chuh van lam ah a vak tung a, chun, Lalpa’n van pi a git sak a, gielpi a kiek sak a, tichun, lei achun mei a hung kie a, Lalpa’n Aigupta gam chung achun giel a kiek sak ta a.

²⁴ Khutichun, gielpi, mei leh giel kihel, nasa tak mai chuh, Aigupta gam chung achun, Aigupta gam thusim a le khutibang himhim ana um khalo chuh a hung um ta a.

²⁵ Giel chun, Aigupta gamsung cheng a, phul laka um chengcheng mihing leh sa haw chuh a sep a; phul laka thing tincheng chuh a bawng suok ta a.

²⁶ Gosen gam, Israel chate umna gam mai achun giel a kie puoi.

²⁷ Chun, Pharaoh chun Mosi leh Aron chuh a sap saka, a kawm u ah, “Tuchung hin vang thil ka hihkhiel tai; Lalpa chuh mi diktat ahi a, kei leh ka mite hi vang a diklo ka na hiu hi.

²⁸ Lalpa kawmah ngên un, zie van gi dul dul leh giel haw hi a hun tai; tichun nanguh hun pawtdawk sak ing ka ting, um sawt ta puo’n lau,” a ti a.

²⁹ Ziephet chun, Mosi’n a kawmah, “Khuo apat hi ka pawt phat leh, Lalpa lama ka khut zak in paucham ka ting, van gi haw chuh hai intin; giel le kie ta puo’n a; tichun, lei hih Lalpa a ahi tih he ta’n la.

³⁰ Himahlele, nang leh na suokte hin vang Lalpa Pathien hi na kihcha diek puou hi tih ka hêi,” a ti a.

³¹ Chun, pat leh buhmanpawl haw chuh a sep sie a; buhmanpawl chuh a vuih lai tak ahi a, pat chule a gah lai tak ahi.

³² Himahlele, buh leh thaichi dang chuh a sep sie puoi, a na keh nailoh ziekun.

³³ Chun, Mosi Pharaoh kawm apat leh khuo apat chun a pawt a, tichun, Lalpa lam ah a khut a zak a; tichun, van gi haw leh giel kie chuh a hung hai ta a, guoh chule a hai ta a.

³⁴ Himahleh, Pharao’n, guoh leh gielpi leh van gi chuh a hai tai tih a het phet chun, amah leh a vaihawmpihte chuh a gilo kit tau a, a lunggil uh a sukhauh kit tau a.

³⁵ Tichun, Pharaoh lunggil chuh sukkhauh in a um a, Israel chate chuh a pawtdawk sak nuom ta puoh a; Lalpa’n Mosi manga a na gen tâksa guol khan.