PAWTDAWKNA 7 - PATHIEN LEKHABU THIENGTHO (BSI)

Pathien in Mosi a Thamuonna

¹ Chun, Lalpa’n Mosi kawmah, “Ngaitie, Pharaoh a ding chun Pathien banga hun siem ding ka hi a, chun, na suohpihpa Aron in na thiemgau bangin a kawmah thu gen ina.

² Thu ka hun piek chengcheng hi Aron hilh in; Aron in lengpa chuh Israel chate a gam apat a pawtdawk sak dingin hilh in a.

³ Chun, Pharaoh lunggil chuh sukhauh ing ka ting, melchikna leh thilmak haw Aigupta gama ka hihsa’n le na thugen chuh ngaitha lo ding ahi.

⁴ Himahlele Pharao’n na thuu pawm nuom puo’n tin, Aigupta chung ahin gawtna tunsak ing ka ting, ka mi Israel chate, ka mipite hi Aigupta gam apat chun puidawk ing ka.

⁵ Chun, Aigupta chunga ka khut ka vak zak a, a lak u apat a Israel chate ka puihdawk tieng le chuh, Aigupta mite chun kei hi Lalpa chuh ka hi tih hun he ta’n au,” a ti a.

⁶ Mosi leh Aron chun Lalpa’n amau thu a piek bang ngêi chun a hih tau a.

⁷ Chun, Pharaoh a va hopih lai u khan Mosi chuh kum sawmgiet mi ahi a, Aron chuh kum sawmgiet leh thum mi ahi.

Aron Tiengkhut gûl a suokna

⁸ Chun, Lalpa’n Mosi leh Aron kawmah,

⁹ Pharao’n, “Thilmak hun hih u le, a na tih chun, nangin Aron kawmah, ‘Na tiengkhut kha la’n la, Pharaoh masang ah septha’n la, tichun gûl hungsuok in a,’ hun ti’n,” ti’n a gen a.

¹⁰ Chun, Mosi leh Aron chuh Pharaoh kawmah a va lut u a, chun, Lalpa thupiek bang chun a vak hih u a; Aron chun a tiengkhut chuh Pharaoh leh a miliente masang achun a vak septha a, chun, gûl a hungsuok ta a.

¹¹ Khutichun, Pharaoh chun le mipil haw leh dawithiemte chuh a sama: chun, Aigupta gama mitvaidawi thiem haw chun le, a dawi u chun a hun hih u a.

¹² A mawlhhawu chuh a vak septha chiet u a, gûl a suok chiet ta a: amahvang chuh Aron tiengkhut chun amau haw mawlh chuh a valh zo vek ta a.

¹³ Chun, Lalpa’n a gen sa bang khan, Pharaoh lunggil chuh sukkhauh in a um a, tichun a thugen u chuh a ngaitha nuom ta puoh a.

Gawtna khatna: Thisan

¹⁴ Chun, Lalpa’n Mosi kawmah, “Pharaoh lunggil hi suktak in a na um ta a, mihaw chuh a pawtsak nawp loh ahi.

¹⁵ Khutichun zingkala Nile luipi a a chieh tak leh va kimuhpih in, Na tiengkhut gûl na suok sak kha chawi inla, luipi pang achun a na ngak in.”

¹⁶ Chun, a kawmah, “Lalpa, Hebraite Pathien in, ka mite hin thalek a ei ho theihna dingun chiehdawk sak in,” ti’n na kawma ei sawl ahi; himahlele tuchan hin na ngaitha nuom nai puoh a.

¹⁷ Zieziekchun Lalpa’n “Zie ahin kei Lalpa chuh ka hi tih he’n la; en in, zie ka tiengkhut hin lui a tui, Nile lui tui hi khên ing ka ting, tichun thisan hungsuok in a.

¹⁸ Tichun, lui a ngahaw chuh thiu intin, lui chuh uih vengvung in a; tichun, Aigupta mite’n luia tui chuh dâwn thei puo’n au a tii, ti’n gen in,” a ti a.

¹⁹ Chun, Lalpa’n Mosi a hopih a, “Aron kawmah hiti hin gen in, Na tiengkhut chawi inla, Aigupta gama tui chunghaw ah, a dîl chunghawu ah, a tuikulhaw chung achun thisan a hung suok vek theih na dingin na tiengkhut kha tungdawk in; tichun Aigupta gamsung cheng chuh thisan in dim in tin, thing leh suong a kisiem kuong haw chule thisan in dim vek ina,” hun tih, a ti a.

²⁰ Mosi leh Aron chun Lalpa thupiek bang chun a vak hih u a; chun, tiengkhut chuh a vak tungdawk a, Pharaoh mitmuh leh a suokte mitmuh chun Nile luipi chuh a vak khên a; tichun lui a tui chengcheng chuh thisan a suok zo ta a;

²¹ Chun, Nile luipi a ngahaw chuh a thi zo vek u a; Nile luipi chuh a uih vengvung zieng ta a. Aigupta mite chun lui a tui chuh a dâwn thei ta puou a; Aigupta gamsung chengcheng chuh thisan in a dim suok ta a.

²² Chun, Aigupta gama mitvaidawi thiem haw chun le a dawi un zie tawbang mah chun a hih u a, chun, Lalpa’n ana gensa bangin Pharaoh lunggil chuh sukkhauh in a um a, tichun, a thuu chuh a ngaitha nuom ta puoh a.

²³ Chun, Pharaoh chuh a kiheia, a In lam ah a chieh ta a, zie thil haw chuh a lungthim in a lungkham pih diek puoi.

²⁴ Chun, Aigupta mi cheng cheng chun tui dâwn ding hawl in Nile luipi pang haw chuh a lai sausau u a, Nile lui tui chuh a dâwn thei puoh ngâl u a.

²⁵ Lalpa’n Nile luipi a khet ni apat chuh ni sagih ahi tai.