PAWTDAWKNA 6 - PATHIEN LEKHABU THIENGTHO (BSI)

¹ Chun, Lalpa chun Mosi kawmah, “Tu’n vang lengpa chunga ka hih ding chuh mu ta ding na hi, khut hattak ziekin ka mite chuh pawtsak intin, chun, khut hât tak ziek chun amau haw chuh a gam apat chun nawhdawk ina,” a ti a.

Mosi Sapna

² Tichun Pathien in Mosi a hopih a, a kawmah, “Kei, Jehovah chuh ka hi:

³ Abraham te, Isak te leh Jakob kawm akhan Pathien Bangakai hihthei in ka na kilak ta a, himahleh ka min thiengtho Jehovah tih hin vang chuh a kawm u ah ka na kihetsak puoi.

⁴ Chun, amau haw kawm achun, Kanaan gam, a khuolzinnau gam, hun chawmcha a na umnau kha piek guo’n ka thugawlh chule ka na sudet ta a.

⁵ Chun, Aigupta mite’n Israel chate suok a a matteu mau git chuh ka za a, ka thugawlh kha le ka hezing hi.

⁶ Zieziekchun Israel chate kawm achun, ‘Kei Jehovah chuh ka hi a, hun hukdawk ing ka ting, Aigupta te suok a na umnau apat hin hun suohchak sak ing ka. A chung u a gawtna lauh-um tak a tun theihna dingin bân zak hiel in hun hukdawk ing ka.

⁷ Chun, ka mi dingin nanguh hun nei ing ka ting, nang uh dingin na Pathien uh hi’ng ka. Tichun kei hih Jehovah na Pathien uh, Aigupta suok a pata hun puidawkpa ka hi tih he’n lau.

⁸ Abraham te, Isak te leh Jakob te kawma kipautiem ngeia piek ka tiemna gam akhan hun puilut ing ka ting; tichun, na goluoh dingun hun pie’ng ka: kei Jehovah chuh ka hi hi,’ ti’n hilh in,” a ti a.

⁹ Chun, Mosi’n Israel chate kawmah zie thu chuha va gen a, himahlele suok a hihnau a a lungthim uh gimtheih na leh nasa taka sukgimtheihna haw ziek chun Mosi thugen chuh ana ngaitha nuom puou hi.

¹⁰ Pathien in Mosi a hopih kitna: Chun, Lalpa’n chun Mosi a hopih a, a kawmah,

¹¹ “Va chieh inla, Aigupta lengpa kawmah Israel chate hi a gama pata pawtsak dingin va gen ah,” ti’n a gen a.

¹² Himahlele Mosi chun Lalpa kawmah, “Ngaitie, Israel chate’n ka thugen a ngaitha nuom puoh ngâl u a; kei mi kamthiem lo thugen hi Pharao’n bangti’n a a ngaihthak ding?” ti’n a dâwng a.

¹³ Chun, Lalpa’n Mosi leh Aron chuh a hopih a, “Israel chate leh Aigupta lengpa kawm achun, ‘Israel chate chuh Aigupta gama pata puihdawk dingin thu ka pie tai,’ ti’n hilh in,” a ti a.

Mosi leh Aron Khangthu

¹⁴ Chun, ziehaw hi a pileputeu nam bulpi pente chuh ahiu hi: Israel cha lutîl Reuben chapate chuh Hanok te, Pallu te, Hezron, te Karmi te ahiu a; a pileputeu, amau hun suonte minpu pente chuh ahiu hi.

¹⁵ Chun, Simeon chapate chuh: Jemuel te, Jamin te, Ohad, te, Jakin te, Zohar leh Kanaan numei apat a a chapa Shaul te, a pileputeu minpu pente chuh ahiu hi.

¹⁶ Chun, ziete hi a suonteu bang zel in Levi chapate min chuh ahi: Gershon, Kohath leh Merari te ahiu hi; a pileputeu suonte minpu pente chuh a hiua, Levi damsung chuh kum za leh sawmthum leh sagih ahi.

¹⁷ Chun, a Inkuon dungzui zel un Gershon chapate chuh Libni leh Shimei ahiu a, suon-le-pak tamtak a nei u a.

¹⁸ Kohath chapate chuh: Amram te, Izhar te, Hebron te, Uziel te ahiu hi; Chun, Kohath damsung chuh kum za leh sawmthum leh thum ahi.

¹⁹ Chun, Merari chapate chuh: Mahali leh Mushi ahiu hi. Ziehaw hi a khanggui dungzui a Levi suon leh a phungte chuh ahiu hi.

²⁰ Chun, Amram chun a pa suohpihnu Jokebed zi’n a nei a; Aron leh Mosi a hinsak a: Amram damsung chuh kum za leh sawmthum leh sagih ahi.

²¹ Chun, Izhar chapate chuh Korah te, Nepheg te, Zigri te ahiu hi.

²² Chun, Uziel inle chapa thum a nei a: Mishael te, Elzaphan te, Sithri te ahiu hi.

²³ Chun, Aron chun Aminadab chanu, Nashon suohpihnu Elisheba chuh zi’n a nei a; Nadab te, Abihu te, Eleazar te, Ithamar te a hinsak a.

²⁴ Chun, Korah chapate chuh: Assir, Elkanah leh Abiasaph te ahiu hi; ziehaw hi Korah inkawte chuh ahiu hi.

²⁵ Chun, Aron chapa Eleazar chun Putiel chanute laka khat chuh zi’n a nei a; Phinehas a hinsak a. Amau haw hi a inkuonteu bang zela Levi suon bulpi pente chuh ahiu hi.

²⁶ Zie Aron leh Mosi te hi ahiu hi Lalpa’n “Aigupta gam apat in Israel chate asi-asen in puidawk un,” ti a a gennate chuh.

²⁷ Zie mite chuh ahiu hi Aigupta lengpa Pharaoh va hopih a, “Israel chate chuh Aigupta gam apat in pawt sak in,” va ti te chuh; zie chuh Mosi leh Aron chuh ahiu hi.

Lalpa ’n Mosi leh Aron a Hopih

²⁸ Chun, hiti hi ahi a, Aigupta gama Lalpa’n Mosi a hopih ni chun,

²⁹ a kawmah, “Kei Lalpa chuh ka hi: Aigupta lengpa Pharaoh kawm achun na kawma ka gen chengcheng hi va gen in,” ti’n Mosi chuh a hopih a.

³⁰ Himahleh, Mosi’n Lalpa kawmah, “Ngaitie, kei mi genmawh tak ka hi ngâl a, tichun kei thugen pi hih lengpa’n bangti’n a a ngaihthak ding?” a ti a.