Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

PAWTDAWKNA 39 - PATHIEN LEKHABU THIENGTHO (BSI)


Thiempute Silhlechen
( Pdn 28.1-14 )

1 Chun, Lalpa’n Mosi thu a piek guol khan, patdumte, sandupte, sandângte mang in mun thiengtho a nasepna dinga silhlechen ding hawihtak a siem u a. Aron a dingin thiempu silhlechen thiengthote le a siem u a;

2 Chun, sana khaute, patdumte, sandupte, sandângte, patngat puonkawpte mang in thiempu puonâk a khui a.

3 Sana chuh phatak in a khen pêk a, patdumte, sandupte, sandângte, patngatpuonte’n mi khutthiem tak in a bât dingin a thêk ngât u a.

4 Thiempu puonâk chuh a liengko tuoka dâlbak a kuoh thawh in a siem u a; a mawng tuok gel a khuihkhawm ahi.

5 Chun, zie puonâk chunga kâwnggak ding chuh, khut thiem takin a gat, zie puonâk zat mah chuh tawn khat mat ahi a: sana patzangte, patdumte, a sandupte, a sandângte, patngat puonkawpte a gat ahi; Lalpa’n Mosi thu a piek guol taka kha siem ahi.

6 Chun, Israel chate min bang zelin, minnamna a geikuok a zik tawbang in, sana patzang phêk a kiphum onix suonghaw achun a zik u a.

7 Chun, Israel suonte hetzingna suong dingin sawmlenihte thasang in thiempu puonâk liengko achun a belh a; Lalpa’n Mosi thu a piek bang khan.


Awmphaw Siemna
( Pdn 28.15-30 )

8 Chun, Awmphaw chuh thiempu puonâk siem tawbang in mi themthiem takin sana patzang te, patdumte, sandupte, a sandângte, patngât puonkawpte mang in a siem a.

9 Zie chuh ning li nei ahi a; awmphaw chuh a thuoh u a: a dunglam chuh khâp khat ahi a, a vailam chuh khâp khat mah ahi, a kithuoh ahi.

10 Zie tak achun suongmantam tien li’n a zêp u a: tien khatna chuh sardius te, topaz te, carbuncle te ahiu a.

11 Tien nihna chuh emerald te, sapphire te, diamond te ahi a.

12 Chun, tien thumna chuh, jacinth te, agate te, amethist te ahi a.

13 Tien lina chuh beril te, onix te, jasper te ahi a: sana patzang kiphêk a zeh tup kêi ahi.

14 Tichun, a suonghaw chuh Israel chate min dungzui in, suong sawmlenih a min uh kizik chu a um a; minnamna a chuong tawbang in, namtin a min u bang zelin, nam sawmlenihte min geikuok a kizik ahi.

15 Chun, awmphaw chung achun khauhuol tawbang kikuoituoh diet diet in, sana thieng kiphêk a siem u a.

16 Sana patzang phêk nih leh sana kikuol nih a siem u a; tichun awmphaw gei mawng tuok achun zie kikuolhaw chu a vawh ui.

17 Sana kikuoituoh diet diet phêk nih chu awmphaw gei mawngtuok gel a kikuol nih achun a thun u a.

18 A kikuoituoh diet diet phêk mawng langtuok nih te chu sana patzang phek nih achun a zawm u a, zie chuh thiempu puonâk malam a dâlbak achun a thun u a.

19 Chun, sana kikuol nih a siem u a, ziehaw chuh awmphaw ning nih, thiempu puonâk mawng sunglam pang achun a vawh u a.

20 Sana kikuol nih a siem u a, ziehaw chuh a malam a thiempu puonâk dâlbak na nih nuoi lam pang ah, a kizawpna vel, thiempu puonâk gâkna, khutthiem taka gat chunglam achun a vawh u a.

21 Chuleh thiempu puonâk a kikuolhaw achun awmphaw a kikuolhaw chuh patkhau dum in a khuimat u a, khutthiem taka gat; thiempu puonâk gâkna chunglama a um theihna dingin leh, awmphaw chuh thiempu puonâk tawh a kikhenlohna dingin; Lalpa’n Mosi thu a piek bang tak khan.


Thiempu Silhlechen chi Dang
( Pdn 28.31-43 )

22 Thiempu puonâk, puonâk chuol, a dum thieng a gat a siem a,

23 chun, puonâk chuol lai tak achun puonâk banbûl bangin a hihvang a, a vanna chuh a ehsiet zieng lohna dingin a gei chuh a kîm a.

24 Chun, puonâk chuol mawnghaw achun vaimimthei lim, a dumte, a sandup te, a sandâng te, patngatpuon kawpte’n a siem a.

25 Chun, sana thieng in lawngchate a siem u a, zie lawngcha chu puonâk chuol mawng ah a kimvelin vaimimthei kikalhaw achun a kawih u a, vaimimthei kikal zela a kawih uh ahi.

26 Lawngcha khat leh vaimimthei khat zel kikal hel in thiempu nasepna a ding chun a kawih u a: Lalpa’n Mosi thu a piek bang khan.

27 Aron leh a chapate ding chun pat ngât taka gat thawh puonâkte a siem u a,

28 patngatpuon a siem, thiempu dielkawp, pat ngât taka siem diel hawihtak te, pat ngât tak a kawpa siem patngât pheika te,

29 patngatpuon kawpte, a dumte, a sandupte, a sandângte sangin puon gat thiemte bât, kâwnggak te tawh, Lalpa’n Mosi thu a piek bang khan a hih a.

30 Chun, lukhuk thiengtho dingin; sana pêk chu sana thieng in a siem u a, a chung achun minnamna a chuong tawbang, “Lalpa DINGA THIENGTHO,” tih geikuok in a chuon sak u a.

31 Zie chuh thiempu lukhuk mai lam achun khau dum in a gâk dên u a; Lalpa’n Mosi thu a piek bang khan.


Nasep Zawh a Hihna
( Pdn 35.10-19 )

32 Khutichun kihona puon-In na chengcheng chuh a zo tau a: tichun Lalpa’n Mosi kawma hih dinga thu a piek bangtak khan Israel chate chun a hih u a.

33 Chun, Mosi kawmah hobuk siemna ding haw chuh a hun chawi u a, puon-In leh a matchâk chengcheng te, a kilhmatna te, a guhpi te, a bâng guhte, a khuomte, a kingakna geikuok te tawh;

34 belamchal vun kihuon san a siem, a khuhna te, savun hawihtak a siem a khuhna te, a daltanna ding puonzakte tawh,

35 thugawlh kawihna bawm leh a zawnna te, zahngaihna chutphah leh,

36 dawhkante, a matchâk chengcheng te, chângthâk kawihna te tawh,

37 sana thieng a siem thaumei kawihna te, thaumei tunna dingte a matchâk chengcheng leh det vak dingin a thau tawh;

38 sana maichâm te, thau nuh chi te, hâl ding gimlim tak te, puon-In kawtkhaka zak ding puon zak te,

39 sumeng maichâm te, a sumeng lên te, a zawnna te leh matchâk chengcheng te, kuong leh a luihna te tawh;

40 puon-In huongsung a puonzak te, a khuom te, a khuom kingakna geikuok te, a huongsung kawtkhaka puonzak te, a khau te, a kilhmatna te, puon-In hobuk sunga a matchâk thil chengcheng te,

41 mun thiengtho a nasepna dinga silhlechen hawihtak a gat te, thiempu Aron leh a chapate’n thiempu na a sep tieng u a a âk ding uh silhlechen thiengtho te,

42 Lalpa’n Mosi kawma hih dinga thu a piek chengcheng chuh Israel chate chun a hih suok kêi tau a.

43 Mosi’n zie nasep chengcheng chuh a en a, a zo suok kêi tau a; ngaitie, Lalpa thupiek bang takin a zo suok kêi tau hi: tichun Mosi’n amau chuh a vangsak ta a.

Gangte Holy Bible - PATHIEN LEKHABU THIENGTHO

Copyright © Bible Society of India, 2010.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ