PAWTDAWKNA 38 - PATHIEN LEKHABU THIENGTHO (BSI)

Hâlmang Maichâm

¹ Chun, thinggi thing in hâlmang thilpiek maichâm chuh a siem a; a dunglam chuh tawng nga ahi a, a vailam chuh tawng nga ahi a, ning li a nei a, a sânlam chuh tawng thum ahi.

² A ning li sip haw achun a kite a siem a; zie kite chuh maichâm tawh a kimat vek a; sumeng ti’n a luonkhum suok kêi a.

³ Chun, maichâm matchâk ding chengcheng, belte, vut luoknate, kuongte, sathukna thik kawmte, leh meilaknate a siem a: zie matchâk chengcheng chuh sumeng ti’n a siem vek a.

⁴ Chun, maichâm umna ding chun sumeng lên, maichâm dawh cham nuoi lam kimvel chun a kimkhat huop in a siem a.

⁵ A zawnna thunna dingin sumeng lên umna ning li a vawh ding chun thikkuol li a sung a.

⁶ A zawnna haw chuh thinggi thing in a siem a, sumeng ti’n a luonkhum a.

⁷ A zawnna dingin maichâm sîk a a bilhaw achun a zawnna haw chuh a thun a, maichâm chuh thing phel a ki-ûm in a sung âwng in a siem a.

Sumeng Kuong

⁸ Khutichun, amah chun Lalpa um na puon-In kawtkhak bula nasem numeite hun piekkhawm sumeng lim-et te chuh lakhawm in, sumeng kuong leh a luihna chuh a siem a.

Hobuk Huongsung

⁹ Hobuk huongsung a siem a; simlam panga a huongsung puonzak ding chuh patngat puonkawp a siem tawng zakhat a sau ahi.

¹⁰ Zie a ding chun khuom, sumeng a siem sawmnih leh a tunna ding sumeng mah a kisiem leh a tukmatna ding leh a zawl ding sana a kiluonkhum a siem hi.

¹¹ Chun, mâllam panga puonzak ding chuh tawng zakhat ahi a, a khuom haw chuh sawmnih leh sumeng tang geikuok sawmnih ahi a; khuoma a bânna haw leh a zakna zawl haw chuh dangkathîk ahi.

¹² Chun, thanglam pang achun puonzak, tawng sawmnga a sau a um a, a khuom sawmkhat tawh, a kingakna, a tukmatna ding tawh, a zawl sana kiluonkhum tawh a siem a.

¹³ Chun, suohlam pang a puonzak ding chuh tawng sawmnga mah a sau ahi.

¹⁴ Kawtpi sîk langkhat a puonzak dingte chuh tawng sawmlenga a sau ahi a, a khuom thum tawh a kingakna ding kigeikuok thum tawh ahi;

¹⁵ a sîk langkhat lampang a ding chule khutibang mah chuh ahi; hobuk huongsung kawtpi langtuok a puonzak dingte chuh tawng sawmlenga a sau ahi; a khuom chu thum ahi a, a kingakna kigeikuok chule thum ahi.

¹⁶ Hobuk huongsung vela zak ding puonhaw chu patngat puonkawp ahi chiet hi.

¹⁷ Chun, a khuom kingakna kigeikuokte chuh sumeng ahi a; khuoma a banna te leh a puonbanna zawlte chu dangkathîk ahi; a sipzum bawka kisiemte chu dangka ti a luonkhum ahi a, hobuk huongsung khuom chengcheng leh a puonbannate chu dangkathîk a siem vek ahi.

¹⁸ Chun, hobuk huongsung kawtpi a puonzak zak ding chuh puon bât thiem takin a bât ahi, patngat puonkawpte, a dumte, a sandupte, a sandângte a siem ahi; chun, a sauhlam chuh tawng sawmnih ahi a, a sânlam chuh hobuk huongsung puonzak zak dingte tawh kichan phet tawng nga mah ahi.

¹⁹ Chun, a khuom chuh li ahi a, a kingakna kigeikuokte chu le li ahi a, sumeng ngen a siem ahi; a khuomte chuh dangkathîk ahi a, a mawngzum bawka kisiemte leh a puonbanna zawlte chuh dangkati a luonkhum vek ahi.

²⁰ Hobuk leh a huongsung kilhmatna chengcheng chuh sumeng a siem vek ahi.

Hobuk a Mat Ding Thik haw

²¹ Ziehaw hi Hobuk a suongpek nih a chunga Thu Sawm Piek kizik kawihna ding a thil matchâk kimangte chuh ahi. Zie chuh Mosi’n thu a piek guol a Levi chite’n thiempu Aron chapa Ithamar puihhuoina nuoia a bawlteu chuh ahi.

²² Chun, Juda nam a Hur chapa Uri chapa Bezalel chun Lalpa’n Mosi kawma siem dinga thu a piek chengcheng kha a siem suok kêi a.

²³ Chun, thil zik thiem, khutthiem, patdumte, sandupte, sandângte patngât puonkawp bât hawih thiem Dan nam a Ahisamak chapa Oholiab chun a kithuohpih a.

²⁴ Mun thiengtho a dinga matchâk pawimawhte cheng, sana matchâk chengcheng chuh talent sawmnih leh kuo leh mun thiengtho a sekel a piek sek bang u a sim chun sekel zasagih leh sawmthum ahi.

²⁵ Chun mipi simsa haw laka tel taphawt te dangka piek chuh talent za leh, mun thiengtho a kipie sek tawbang a sim chun sekel sangkhat leh zasagih leh sawmsagih leh nga ahi.

²⁶ Kum sawmnih apat a chunglam kisimna laka tel dinga chieh, nuoigup leh sangthum leh zanga leh sawmnga te chuh mun thiengtho a sekel kipie sek tawbanga sim chun beka khat chiet (zie chuh sekel kimkhat ahi) pie tawbang ahiu hi.

²⁷ Chun, dangka talent zakhat chuh puon-In khuom kingakna geikuok sunna’n a mang u a, a kingakna khat sunna’n talent khat zel a mat uh ahi.

²⁸ Chun, sekel sangkhat leh zasagih leh sawmsagih leh nga chun khuom kingakna ding thikkuol a siem a, a khuom sip mawngbawkte chuh dangka ti’n a luonkhum a, a puon banna zawlte chule a siem a.

²⁹ Sumeng kipiehaw chuh talent sawmsagih leh sekel sangnih leh zali ahi.

³⁰ Chun, ziehaw chuh kihona puon-In kawtkhak khuom kingakna geikuok te, sumeng maichâmte, sumeng lên leh maichâm a matchâk thil chengcheng te,

³¹ Hobuk huongsung khuom kingakna geikuokte, hobuk kilhmatna chengcheng siemna a mat ahi.