PAWTDAWKNA 37 - PATHIEN LEKHABU THIENGTHO (BSI)

Thugawlh Kawihna Thingkuong

¹ Chun, Bezalel chun thinggi thing in thugawlh kawihna thingkuong chuh a siem a; a dunglam chuh tawng nih leh alang ahi a, a vailam chuh tawng khat leh alang ahi a, a sânlam chuh tawng khat leh alang ahi.

² A sung leh a paw chuh sana thieng ti’n a luonkhum a, sana’n a gei a kîm a.

³ Chun, a keng li a vawh ding chun sana kikuol li a sung a; kuol nih chu a langkhat a ding ahi a, kuol dang nih chu a langkhat a ding ahi.

⁴ Chun, thinggi thing in a zawnna a siem a, ziehaw chuh sanati’n a luonkhum a.

⁵ Thugawlh bawm chuh zawn theih dingin a geia a bil achun zawnna chuh a thun a.

⁶ Chun, sana thieng in zahngaihna chutphah a siem a, a dunglam chuh tawng nih leh alang ahi a, a vailam chuh tawng khat leh a lang ahi.

⁷ Chun, cherub nih a siem a, zahngaihna chutphah mawng tuok achun a sêka sêkthawh a; a mawng langkhat achun cherub khat, a mawng langkhat achun cherub khat:

⁸ zahngaihna chutphah tawh kizawm khawm vekin, a mawng tuok achun cherub te a siem a.

⁹ Cherub te chuh kimaingat in, zahngaihna chutphah chuh a thau a khuh in, a thateu chuh a zak u a; zahngaihna chutphah lam chuh cherub te chun a nga gêl gêl u a.

Chângthâk Dawhkhâng

¹⁰ Chun, thinggi thing in dawhkân a siem a: a dunglam chuh tawng nih ahi a, a vailam chuh tawng khat ahi a, a sânlam chuh tawng khat leh alang ahi:

¹¹ zie chuh sana thieng in a luonkhum a, sana mah in a gei a kîm a.

¹² Chun, khutpêk bawka lien in a gei a siem a, chun, a gei chuh a kimvelin sana’n a kîm kit a.

¹³ Zie a ding chun sana kikuol li a siem kita, zie kikuol chuh dawhkân keng li ning chiet achun a vawh a.

¹⁴ Dawhkan sik achun a zawnna chuh a kithun theihna dingin a bil ding chuh a gei sukha’n a vawh a.

¹⁵ Chun, dawhkhâng zawnna ding chun thinggi thing a siem a, sanati’n a luonkhum a.

¹⁶ Chun, dawhkhâng a ûmlebel, kuongte, thikkhe te, a but dawkna ding belhbu te, uain umte chuh sana thieng in a siem a.

Thaumei Tunna Siem thu

¹⁷ Thaumei kawihna chuh sana thieng in a siem a; zie thaumei kawihna chuh a kung leh a tunna chuh a sek thawh a; a khawnte, a pak liengte leh a pak te chuh a kizawm vek a.

¹⁸ Chun, a sîktuok achun bâk gup a hung kadawk a; thaumei kawihna kung sîk langkhat achun bâk thum a um a, thaumei kawihna sîk langkhat achun le bâk thum a um hi.

¹⁹ A langkhat lampang bâk achun, almond mûm tawbang bawk thum, a paklieng leh a pak a siem a; a langkhat lampang achun le almond mûm tawbang bawk thum, a paklieng leh a pak a siem a: khutibang chun thaumei kawihna bâk gup a dingin a siem a.

²⁰ Tichun thaumei kawihna kung achun bawk li, almond mûm tawbang a siem a, a paklieng leh a pak haw a um a.

²¹ Chun, zie chu tawh kizawm mah, bâk nih nuoi achun paklieng a um a; zie chu tawh kimat kit mah in bâk nih nuoi achun paklieng a um kit a, thaumei kawihna kung a bâk gup achun a um chiet hi.

²² Chun, zie a a paklieng haw leh a bâkhaw chu a kimat suok kêi a; a pum chun sana thieng a sêk ahi.

²³ Zie a ding chun thaumei sagih tawh, chaicheh tawh, meivam kawihnahaw tawh sana thieng in a siem a.

²⁴ Zie thaumei kawihna leh a matchâk ding chengcheng siemna a chun sana thieng talent khat a mang hi.

Gimlim Hâlna Maichâm

²⁵ Chun, gimlim hâlna dingin thinggi thing in maichâm a siem a. A dunglam chu tawng khat ahi a, a vailam chu tawng khat ahi a, ning li nei ahi; a sânlam chuh tawng nih ahi; a ning haw chuh kimat suok kêi a siem ahi.

²⁶ A chunghaw, a sîk vel haw leh a ning li haw chuh sana thieng ti’n a luonkhum a; sana’n a gei a kîm a.

²⁷ A gei kuol nuoi lama a sîk tuok achun sana kikuol nih a siem a, a sîk nih achun a vawh a, zie chuh a zawnna thunna ding ahi.

²⁸ Thinggi thing in a zawnna ding a siem a, sanati’n a luonkhum a.

²⁹ Chun, thau nuh chi, thau thiengtho leh hâl ding gimlim, gimlim siemte siem tawbang in a siem a.