PAWTDAWKNA 36 - PATHIEN LEKHABU THIENGTHO (BSI)

Mipite apat Thilpiek tamtak

¹ “Chun, Bezalel, Oholiab leh mi themthiem, kuole Lalpa’n thu a piek bang zela mun thiengtho a nasepna tincheng sem thei dinga chitna leh hetthiemna a piekte chauh chun a sep ding uh ahi,” a ti a.

² Chun, Mosi’n Bezalel, Oholiab leh mi themthiemte, Lalpa’n a lunggil u a chitna a piek a, zie na chuh sem ngâp dinga lunggil taka thalawpna nei taphawt chuh Mosi’n nasep pan dingin a hilh a.

³ Chun, Israel chate’n mun thiengtho a nasepna ding a siem ding thil a hun chawih cheng cheng teu chuh Mosi apat in a la zel u a. Mipite chun zing chengin amau kiphal dungzuia thilpiekte chuh a kawmah a hun chawi zel u a.

⁴ Khutichun, mun thiengtho a na chuom chuom sem, mi khutthiemte chuh a nasepna mun chiet u apat chun ahung u a,

⁵ Mosi kawmah, “Lalpa’n hih dinga thu a piek siemna dingin mipite chun a mamawh sanga tamzaw ahun chawi khawm tau hi” ti’n a hilh u a.

⁶ Ziephet chun, Mosi’n, “Mun thiengtho a dinga thilpiek ding chuh numei hileh, pasal hileh, kuoma’n hun guonggalh ta kiu hen,” ti’n a giehbuk cheng u a phuonzak ding thu a pie a. Khutichun, mite chun thilpiek chuh a chawlhsan tau hi.

⁷ A thil chawihkhawmteu chuh siem dinga khawk cheng siemna dingin a kiting a, a tam taluo bawn hi.

Lalpa Umna Puon-In Siemna

⁸ Chun, a lak u a mi themthiem, nasemte chengcheng chun Hobuk chuh puonzak sawm nei in a siem u a; zie puonzak chuh patngat puonkawpte, a dumte, a sandupte, a sandângte, mang in cherub lim mi themthiemte siem chuon sak in a siem u a.

⁹ Puonzak chuh a dung lam tawng sawmnih leh giet chiet ahi a, a vailam tawng li chiet ahi; puonzak chengcheng chuh a kichan chiet u a.

¹⁰ Chun, puonzak nga te chuh kithuohpel in a zawm u a; chun puonzak dang nga te chu le kithuohpel in a zawm ui.

¹¹ Chun, puonzak bawng khat pên gei achun a bil, a dum in a siem u a; khutimah bang chun puonzak bawng langkhat mawng pên gei achun le a siem ui.

¹² Puonzak khat achun bil sawmnga a siem u a, bawng khat puonzak gei achun le bil sawmnga a siem u a, zie bilhaw chuh kizawm tuoh chiet ahiu hi.

¹³ Chun, sana thik in kilhmatna sawmnga a siem u a, kilhmatnate chun puonzak haw chuh a kilhmat a; tichun hobuk chuh indan khat a hung hi tai.

¹⁴ Puon-In chung khuhna dingin kelmul puonzak haw a siem u a, puonzak sawmlekhat a siem ui.

¹⁵ Puonzak chuh a dunglam tawng sawmthum chiet ahi a, a vailam tawng li chiet ahi; puonzak sawmlekhat haw chuh a kichan chiet ui.

¹⁶ Chun, puonzak nga te chuh kithuohpel in a khuikhawm chiet u a, chun, puonzak gup chule kithuohpel in a khuikhawm chiet ui.

¹⁷ Puonzak bawng khat mawng pên gei achun bil sawmnga a siem u a, puonzak bawng khat gei achun le bil sawmnga a siem ui.

¹⁸ Puon-In chuh indan khat a hung hih theihna dingin a kilhmatna dingin sumeng kilhmatna sawmnga a siem u a,

¹⁹ belamchal vun huonsan in puon-In chung khuhnate, savun hawihtak in a khuhthuohnate a siem u a. Chun, ngalvang vun in a khuhna a siem a.

²⁰ Chun, Hobuk chuh zang taka a din theihna dingin thinggi thing zang tak khuom in a siem u a.

²¹ Khuom kitieng dunglam chuh tawng sawm ahi a, a vailam chuh tawng khat leh a lang chiet ahi.

²² Khuom kitieng cheng achun keng nih kizawm in a um a: khutibang chun hobuk khuom kitieng chengcheng chuh a siem u a.

²³ Hobuk a ding chun khuom kitiengte a siem u a; simlam dawh, simlam pang a ding chun khuom kitieng sawmnih a siem u a.

²⁴ Zie khuom kitieng sawmnih kingakna ding chun dangkathîk tang geikuok sawmli a siem u a; khuom khat a keng nih kingakna ding chun geikuok nih a siem a;

²⁵ Chun, hobuk sîk langkhat mâllam pang a ding chun khuom kitieng sawmnih a siem u a.

²⁶ Ziehaw ding chun dangkathîk tang geikuok sawmli tawh, khuom kitieng khat a dingin kingakna geikuok nih, khuom kitieng dang khat a dingin kingakna geikuok nih a siem u a.

²⁷ Chun, Hobuk tawm, tumlam pang a ding chun khuom kitieng gup a siem u a.

²⁸ Hobuk tawmlam ning tuok a ding chun guhpi nih a siem a.

²⁹ A nuoi lam achun a kithuohpel a, khutibang mah chun a chunglam thik kikuol masapen chanin kithuohpel ahi a, a ning nih achun zie bang chun a hih gêl gêl u a.

³⁰ Chun, guhpi giet, a kingakna ding dangkathîk tang geikuok sawmlegup tawh a um a, guhpi cheng kingakna ding geikuok nih zel a um hi.

³¹ Chun, thinggi thing zawl bâng guh, hobuk bâng langkhat tumat dingin nga,

³² chun, hobuk tawmlam, tumlam guhpi dingin le nga mah a siem u a. Chun, hobuk tawm, thanglam dawh achun le khuom nga a siem a;

³³ Tichun, bâng guh laita guhpi lai tak achun khuom tawppen a kipata lehlam, lehlam tawppen chanin thun tung dingin a siem ui.

³⁴ Chun, a guhpihaw chuh sanati’n a luonkhum u a, chun, bâng guhte tunna ding chun sana kikuol a siem u a, zie bâng guhte chuh sanati a luonkhum ahi.

³⁵ Chun, puonzak ding chuh patngat puonkawp haw, a dumte, a sandupte, a sandângte, mang in cherub lim haw mi thiemtak siem kizik in a siem u a.

³⁶ Zie a ding chun thinggi thing khuom li a siem u a, ziehaw chuh sanati’n a luonkhum u a, a khuom haw chuh sana ahi; ziehaw kingakna ding chun sana tang geikuok li a sung u a.

³⁷ Chun, hobuk kawtkhaka zak ding pat ngât tak kawphaw, a dum, a sandup, a sandângte mang in, puon bât hawih thiemtak bât tawh a siem ui.

³⁸ Chun, zie zakna ding chun khuom nga, a zawl haw tawh a siem u a; chun, khuom sipzum haw leh puon banna zawl haw chuh sanati’n a luonkhum u a; chun, ziehaw kingakna kigeikuok nga te chuh sumeng a siem ahi.