PAWTDAWKNA 35 - PATHIEN LEKHABU THIENGTHO (BSI)

Sabbath Mat dân Ding

¹ Chun, Mosi’n Israel chate kikhawm khawm chengcheng te chuh a samkhawm a, a kawm u ah, “Ziehaw hi ahi Lalpa’n na hih ding u a thu a hun piek chuh.

² Ni gup sung nasepna a mat ding ahi a, a ni sagih ni vang chuh nang u dingin ni thiengtho, Lalpa dinga chawlh kêi na, chawlhni hi ding ahi: kuole zie ni a nasem taphawt chuh suklup tei ding ahi.

³ Chawlhni chun na chênnau mun himhim achun mei na tih ding uh ahi puoi,” a ti a.

Hobuk Thiengtho a Thilpiekte

⁴ Mosi’n Israel chate kikhawm khawm chengcheng te kawm achun, “Ziehi ahi Lalpa’n thu a hun piek chuh:

⁵ Na lak u a pat in Lalpa kawma thillat ding hun lau in: kuole a lunggil a kiphalna nei taphawt chun Lalpa masang ah hun chawi u hen; sana te, dangka te, sumeng te,

⁶ patdumte, sandupte, sandângte, patngatpuonte, kel multe tawh;

⁷ chun, belamchal vun huonsante, savun hawihtak te, thinggi thingte tawh;

⁸ thaumei dingin thau te, thau nuh chi leh hâl dingin gimlim tak; thil gimlim tawh;

⁹ Chun, thiempu puonâk leh puonâk awma zeh dingin onix suongte leh suongmantamte tawh.

Puon-In Matchâkte

¹⁰ “Chun, na lak u a mi khutthiem taphawt chuh hung u henla, Lalpa’n siem dinga thu a piek taphawt chuh siem u hen;

¹¹ hobuk te, puon-In te, a khuhna te, a huongsung khuhna te, a kilhmatna te, a guhpi te, a bâng guhte, a khuom te, a kingakna geikuok te tawh;

¹² bawm leh a zawnna mawlhte, zahngaihna chutphah te, a daltanna ding puonzak tawh;

¹³ dawhkhâng leh a zawnna leh a matchâk chengcheng te, chângthâk zek kawihte tawh;

¹⁴ chun, a vak ding thaumei tunnate leh a matchâk chengcheng te, det vak dingin thau te tawh;

¹⁵ chun, gimlim hâlna maichâm leh a zawnna te, thau nuh chi te, hâl ding gimlim tak te, hobuk kawtkhak a zak ding kawtkhak puonzakte tawh;

¹⁶ hâlmang thillat maichâm a sumeng vutluoh leh a zawnna te leh a matchâk cheng chengte, kuong leh a luihna te tawh;

¹⁷ hobuk huongsung mai a puonzak te, a guhpite, a khuom kingakna geikuok te leh, a huongsung kawtkhaka puonzak te tawh;

¹⁸ hobuk kilhmatna te, a huongsung kilhmatna te, a khaute tawh;

¹⁹ mun thiengtho a nasepna dinga silhlechen hawihtak a gatte, thiempu’n na a sep hun u a âk ding thiempu Aron silhlechen thiengtho leh, a chapate silhlechen te,” ti’n, a ti a.

Mipite Thilpiek

²⁰ Tichun, Israel chate kikhawm khawm chengcheng chuh Mosi kawma pat in a kikhen vek tau a.

²¹ Mitin in a lunggil tak u a thalawpna nei leh lungthima utna nei taphawt chuh a hung u a, kikhawp khawmna puon-In a mat ding leh nasepna dinga matchâk thilkhawk taphawt leh silhlechen thiengtho ding chuh Lalpa a dingin a hun tuok u a.

²² Pasal leh numei thil pie nuom taphawt chuh a hung u a, chauchate, bilbahte, minnamna zungbuh te, khite, sana kicheina tincheng a hun chawi u a; chun, mitin sana piek ding nei taphawt chun Lalpa dingin a pieu a.

²³ Chun, mi tin patdumte, sandupte, sandângte, patngatpuonte, kelmulte, belamchal vun huonsante, savun hawih chi nei taphawt chun a hun chawi u a.

²⁴ Kuole dangka leh sumeng tuok thei taphawt chun, Lalpa kawma thilpiek dingin a hun chawi u a; kuole thinggi thing, matchâk tincheng dinga mat tâk nei taphawt chun le a hun chawi u a.

²⁵ Chun, numei khutthiemte cheng chun pat a khêk u a, zie a patkhêk uh a dumte, sandupte, sandângte, patngat puonte chuh a hun chawi u a.

²⁶ Chun, numei khutthiem, patkhêk utna nei cheng chengte chun kelmul a khêk u a.

²⁷ Thiempu puonâk leh a puonâk awma zeh ding vaihawmte’n onix suongte leh suongmantamte a hun chawi u a;

²⁸ gimlimte, thaute, det vak dingte, thau nuh thawh ding te, hâl ding gimlim takte le.

²⁹ Lalpa’n Mosi manga hih dinga thu a piek chengcheng hihna ding chun Israel chate mitin, numei leh pasal lunggil taka piek nawpna nei taphawt amau kiphal dân bang zel in Lalpa masang ah ahun chawi u a.

Puon-In Siem dinga Mi khutthiemte

³⁰ Tichun, Mosi’n Israel chate kawm achun, “Lalpa’n Juda nam a Hur chapa Uri chapa Bezalel chuh a tel tai.

³¹ Zie pa chuh chitnate, hetthiemnate, hetnate, lam tincheng a themthiemna te nei dingin Pathien thagau in a hih dim ta a,

³² thilhih ding chingthei taka ngaihtuoh thiemnate, sana te, dangkathîk leh sumeng sêk thiemnate,

³³ suongmantamte, zeh ding a ât hawihdante, thing khuohkuok thiemnate leh, thil chenga themthiemna te nei dingin.

³⁴ Chun, amah leh Dan nam a Ahisamak chapa, Oholiab chuh mite sinsak thei dingin chitna a pie gêl gêl a.

³⁵ Amau chuh thil chenga themthiemna te, thil zik thiemna te, themthiemna te, patdumte, sandupte, sandângte, patngatpuon pin a hawih taka khuih thiemna leh a hel tuok thiemnate, puon-gat thiemnate, nasep tincheng thiemnate, thilhih ding chingthei taka ngaihtuoh thiemnate nei dingin lunggil chitna’n a thuom tai,” a ti a.