PAWTDAWKNA 34 - PATHIEN LEKHABU THIENGTHO (BSI)

Thupiek Zikna Suongpek Thak

¹ Lalpa’n Mosi kawmah, “Suongpek nih a masa tawbang khan sêk kit in: chun, suongpek achun a masa a na seh phel suongpek a thu kizik mah khah zik kit ing ka.

² Chun, zing leh zingkal in kisazo inla, Sinai tâng ah hung to inla, tângvum ah ka masang ah hung ding in.

³ Na kawmah kuomah hung to kiu henla, tâng mawngmawng achun kuomah hung kilang kiu hen; belam hawn haw leh bâwng hawnhaw le tâng pang achun ta hiel kiu hen,” a ti a.

⁴ Khutichun Mosi chun suongpek nih, a masa tawbang khan a sêk a, zingkal matak in a tho a, Lalpa’n thu a piek bangin Sinai tâng achun a va kalto a, a khut in suongpek nih chuh a chawi a.

⁵ Chun, Lalpa chuh meipi achun a hungsuk a, a kawmah a ding a, Lalpa min chuh a sam ta a.

⁶ Lalpa chun a masang lam achun a chiehpel a, “Kei hi Lalpa, Lalpa Pathien, zahngaihna a dim, lainat thei tak, dawhhat tak, lungsietna leh thutak a dim,

⁷ sang tamtak chunga lungsietna latsak sek, manlohna haw, sukkhelhna haw, gitlohna haw ngaidam sek; himahleh, diklo a mawhchangte bangti ale pawtsak lo; pate manlohna zieka chate, cha sawn te, suon thumna leh suon lina chana gawt sek chuh ka hi,” ti’n a phuong ta a.

⁸ Ziephet chun, Mosi chuh kintakin tuol ah a bawkkhup a, a ho ta a.

⁹ “Tuhin na mit ka tun chun, aw Lalpa, ka kawm u ah hung in. Zie mite hi nam genhak tak ahi ngâl u a; tichun ka manlohnau leh ka gitlohnau ngaidam in la, na go chan dingin ei nei in.” a ti a.

Thuthun Namdet Thak na

¹⁰ Chun, Lalpa’n Mosi kawmah, “Ngaitie, thu ka thun hi, khawvel chengcheng leh kuoma’n le a hih khâkloh, na mite chengcheng mitmuh hin thilmak hih ding ka hi: tichun na kimvel u a um chengcheng hin Lalpa thilhih chuh mu’n au, na chunga ka thilhih ding hi huoisietak ahi ngâl a.

¹¹ Tuni a ka hun thupiek ding hi pawm in, na masang achun Amor te, Kanaan te, Hit te, Periz te, Hiv te, Jebus te nawhdawk ing ka.

¹² Chingthei in, khutilochun, na chieh na ding gama chêngte kawma thuthun in na tin, zie chuh na lak u a ding in thâng hung hi kha’n a.

¹³ A maichâmteu chuh na sukchip vek ding uh ahi a, a milimteu chuh sukgawp sak vek un, a Asher pathien teu chuh na phuk sak vek ding uh ahi zawi.

¹⁴ “Pathien dang himhim chuh na ho ding uh ahi puoh a; Lalpa chuh amin le thikthusie ahi a, thikthusie Pathien ahi.

¹⁵ Khutilochun zie gama mite kawm achun thu gawlh un na tin, a pathienteu ah zawlsai un na tin, a pathienteu kawm achun kithawi un na tin, a hun chiel tieng u leh a kithawihnau chuh ne kha’n lau.

¹⁶ Chun, na chapateu a dingin a chanuteu nei un na tin, a chanuteu chun a pathienteu ho sak un tin, na chapateu le a pathienteu kawmah zawlsaih sak kha’n au.

¹⁷ “Milim kisunthawh pathiente na siem ding uh ahi puoi.

¹⁸ “Chângthâk chawl sawhloh kut na neih ding uh ahi. Thu ka hun piek tâksa bang khan, ni sagih sung chuh, chângthâk chawl sawhloh, Abib tha a hun guot a chuh na nek ding uh ahi; zie tha khan Aigupta gam apat a hung pawt na hi ngâl u a.

¹⁹ “Cha sûl hawng masapen chuh kei a ahi; chun, na ganchateu, a chal chengcheng; bâwngchal leh belamchal suok masapente chu tawh.

²⁰ Chun, sabiltung suok masapen chuh belamno a na tat ding ahi: na tat nawp loh chun a ngâwng na sukbawt ding ahi. Na chapa chengcheng laka pieng masapen chuh na tat ding ahi. Tichun ka masangah kuomah khutngawn a na hung kilat dinguh ahi puoi.

²¹ “Ni gup sungin na sem un la, a ni sagih ni vang chun na chawlhdam ding uh ahi; lokaih hun leh buh-ât hun inle na chawlhdam ding uh ahi.

²² “Chawlhkal kut, buh thak tung kut chuh, kum a hung bei a, buh kawihtup suok nung in, bâwkcha kut tawh pawltâk kut na mat ding uh ahi.

²³ “Pasal phawt chuh Lalpa Pathien, Lalpa Israel Pathien masang ah kum khat sunga thumvei ava kilat dinguh ahi.

²⁴ Na masang u a namtin nawhdawk a, na gamgiteu keklien ding ka hi ngâl a; kum khata thumvei Lalpa na Pathien uh ho dinga na chieh tak u chuleh kuoma’n na gam u hi hun lâksak puo’n au.

²⁵ “Kei dinga kithawihna sa thisan chuh chângthâk chawl sawh tawh na hun piek ding uh ahi puoi, Chiehkân kut kithawihna chuh a zing tieng in umsak ding ahi diek puoi.

²⁶ “Na lo a thai gah masapen chuh kum cheng leh Lalpa In a na hun kawih ding ahi. Kelno sa a pi nawitui in na huon ding ahi puoi,” a ti a.

²⁷ Chun, Lalpa’n Mosi kawmah, “Zie thu haw hi zikin: zie bang thu haw hin ahi nang leh Israel te kawma thu ka gawlh chuh,” a ti a.

²⁸ Mosi chuh zie tak achun Lalpa kawmah ni sawmli leh zan sawmli a um a; an himhim a ne puoh a, tui le a dâwn diek puoi, Suongpek haw achun thugawlhna thu, Thu Sawm Piek te chuh a zik ta a.

Mosi mai Vak

²⁹ Chun, tihi a hung hi a, Mosi chuh Thu Sawm Piek zikna suongpek nih chuh a khuta chawi in Sinai tâng apat chun a hung suk a, tâng apat a a kum suk chun, Mosi’n Lalpa tawh a kihona ziek u chun a maivun chuh a hung vak tai tih a he hiel puoh a.

³⁰ Chun, Aron leh Israel mipi chengcheng chun Mosi a muh u chun, ngaitie, a maivun chuh ana vaka, ava naih ngam ta puou a.

³¹ Chun, Mosi’n amau haw chuh a vak sama; Aron leh kikhawmkhawmte laka vaihawm a pang chengcheng chuh a kawmah a hung u a: chun, Mosi’n amau haw chuh a na hopih a.

³² Zie nung chun Israel chate chengcheng chun a hun naih u a: tichun Sinai tânga Lalpa tawh a kihonau chengcheng te chuh thu pie’n; a na hilhsawn ta a.

³³ Mosi’n amau haw chuh a hopih zawhin a mai chuh maikhuhna’n a khuh ta a.

³⁴ Amahvang chuh Mosi Lalpa hopih dinga a masanga a lut cheng chuleh, a hung pawtdawk masieh chuh maikhuhna chuh a hâwk sek a; chun, a hung pawt kit sek a, a thupiekte chuh Israel chate a hilhsawn sek a;

³⁵ Tichun, Israel chate chun Mosi mai chuh a vak et tieng u leh Mosi mai vak chun a salh seka; chun, Mosi chuh Pathien hopih dinga a lut kit masieh chuh maikhuhna chun a mai a khuh kit sek hi.