PAWTDAWKNA 33 - PATHIEN LEKHABU THIENGTHO (BSI)

Sinai Tang Nusieh dinga Thupiek

¹ Tichun Lalpa’n Mosi chuh a hopih a, “Kipan inla, zie apat hin pawtdawk unla, Abraham te, Isak te, Jakob te kawm a, ‘Na suonte pie ding ka hi,’ ti a ka na kipautiemna gam achun nang leh Aigupta gam apat a na hun puihdawkte hi zie tak apat hin va chiehto un.

² Na masang uh ah vânsâwlchâk hun sawl ing ka ting, Kanaan te, Amor te, Hit mite, Periz mite, Hiv te leh Jebus te chuh nawhdawk ing ka.

³ Bâwngnawi leh khuoizu luonna gam achun chieh to un; kei vang na lak u ah hung to lo ding ka hi, a ziek chuh nam lochal tak na hiu a, lamkal ah hun sumangthai vek kha’ng ka,” a ti a.

⁴ Chun, mipite’n zie thu kipah-um lo tak chuh a zak u chun a kap u a: kuomah sanate chun a kivan nuom ta puou hi.

⁵ Chun, Lalpa’n Mosi kawmah, “Nam genhak tak na hiu hi: chawmchah na lak u ah hung tel lengle hun sumangthai mai ding ka hi. Khutichun na kivannau khah kawihthau inla, tichun nang uh ka hun ngaihtuoh ding dân hethei ing ka, a tii, hun ti’n,” a ti a.

⁶ Zieziekchun, Israel mipite chun a kicheina hawu chuh Horeb tâng apat chun a suoh tha den tau hi.

Lalpa Umna Puon-In

⁷ Chun, Mosi’n puon-In chuh a sawm zel a, giehmun pawlam gamla deuh achun a zak sek a. Zie chuh Lalpa umna puon-In a vawh a, kuole Lalpa thu dawng nuom taphawt chuh giehmun pawlama puon-In achun a va chieh sek u a.

⁸ Mosi chuh puon-In a lut dinga a pawt tieng leh, mipi chengcheng chuh puon-In kawtkhak achun a ding chiet u a, Mosi puon-In a a lut chanin a enzing sek ui.

⁹ Chun, hiti hi ahi a, Mosi chuh puon-In a a lut tieng leh, meipi ding lai chuh a hung kitawl suk a, puon-In kawtkhak achun a hung ding sek a: chun, Lalpa’n meipi apat chun Mosi chuh a hun hopih sek a.

¹⁰ Tichun, meipi chuh puon-In kawtkhaka ding a muh tieng u leh mipite chuh a ding u a, amau puon-In kawtkhak apat chun a bawk chiet sek u a.

¹¹ Tichun, Lalpa’n Mosi chuh kimaituoh in, mihing in a guolpa a hopih bang mai in a hopih seka. Mosi chuh giehmun lam achun a hung vaikit sek a: amah panpih Nun chapa tangval Joshua chun puon-In chuh a nusieh puoi.

Lalpa ’n Mipite Umpih zel Ding

¹² Mosi’n Lalpa kawm achun, “Ngaitie, nang ka kawmah, zie mite hi vak puito in, na tih ahi a: kuo a ka kawma na hun sawl ding lah nei hilh puoh ngâl a. Nang chun la, Na min in ka hun hechien a, ka mittung in na um hi tih le ka he a puo, na ti a.

¹³ Tia chuh na mit ka tun ngâl chun, nangmah ka hun hêtchet theihna dingin leh na mittung a ka um theihna dingin tuhin na lampite chuh lungsiet takin ei kâwkmuh in. Zie namte hi na mite dinga na tel ahiu hi tih le hezing in,” a ti a.

¹⁴ Chun, amah chun, “Na lak u ah um zel ing ka ting, tichun chawlhdamna hun pie’ng ka,” a ti a.

¹⁵ Mosi’n a dâwng a, a kawmah, “Ka lak u a na tel zing loh dinga a hih chun, zie apat hin ei puito ta ki’n.

¹⁶ Kei leh na mite hi na mittung in ka um ui tih bangti’n ahim hetna a um theih tâk ding? Lei chunga mihing chengcheng te leh na mite kihetkhen theihna chuh, nang ka kawm u a na um sek hi hilo ding ahim?” a ti a.

¹⁷ Lalpa’n Mosi kawmah, “Zie chule na gen bang chun hih ing ka: ka mit na tung ngâl a, na min in ka hun hechien ngâl a,” a ti a.

¹⁸ Chun, Mosi chun, “Na lopina chuh ei muhsak tie,” ti’n a ngên a.

¹⁹ Chun, Lalpa chun, “Ka lopina chengcheng chuh na masangah latsak ing ka ting, ka min thiengtho chuh na masangah phuong zel ing ka; tichun ka lungsiet tak chuh lungsiet zel ing ka ting, zah ka ngaihna taphawt achun zahngai ing ka,” a ti a.

²⁰ Lalpa chun, “Ka mel vang mu thei puo’n la: a ziek chuh, mihing ka mel mu a hing kuomah a um puoh ngâla,” a ti a.

²¹ Chun, Lalpa’n, “entie, ka kawm ahin mun khat a um hi; suongpi chung ahin ding in la.

²² Chun, hiti hi hi’n tin, Ka hun chiehpelh sung chun, suongpi khi sung ahin hun kawih ing ka ting: ka hun chiehpelh masang sieh chuh ka khut in hun lieh khuh ing ka ting;

²³ Zie zawh chuleh ka khut lamang ing ka ting, tichun, ka nung lam mai mu’n na tin, ka mai vang chuh mu puo’n la,” a ti a.