PAWTDAWKNA 30 - PATHIEN LEKHABU THIENGTHO (BSI)

Gimlim Hâlna Maichâm

¹ “Chun, gimlim hâlna ding maichâm na siem ding ahi a; thinggi thinga na siem ding ahi.

² A dunglam tawng khat, a vailam tawng khat hi ding ahi; ning li nei a siem ding ahi; chun, a san lam chuh tawng nih hi’n tin, a kite chuh maichâm chu tawh a kizawp vek ding ahi.

³ Chun, a chunghaw, a sîk vel haw, leh a ning lite chuh sana thieng ti a na luonkhum ding ahi; chun, a sip chuh sana a na tuom kimvel ding ahi.

⁴ A gei nuoi lam siktuok achun sana kikuol nih na siem ding ahi, ziehaw chuh a zawnna thunna ding hi’n a.

⁵ Chun, thinggi thing in zawnna haw siem inla, sanati a na luonkhum ding ahi.

⁶ Chun, zie chuh thugawlh kawihna chunga ka hun hopih sek na ding, zahngaihna chutphah ma ah, thu hetsakna kienga puonzak pawlam achu na kawih ding ahi.

⁷ Chun, Aron in zingkal cheng leh zie tak achun thil gimlim a hâl ding ahi a; thaumei guonggalh dinga a hung tieng leh a chunga chuh gimlim a hâl sek ding ahi.

⁸ Chun, Aron in nitâk lama thaumei a det tieng gimlim chuh a hâl sek ding ahi a; zie chuh na suonteu chana Lalpa ma a gimlim hizing ina.

⁹ Zie tak achun gimlim dang ahim, hâlmang thillat ahim, nek theih thillat ahim na lat dinguh ahi puoh a; zie tak achun dâwn ding thilpiek le na sun ding uh ahi puoi.

¹⁰ Chun, Aron in kum khat leh khatvei maichâm kihaw chuh sukthienna a siem ding ahi; kichamna dinga gitloh thawihna thisan chun kum chengin khatvei maichâm ning li chuh a theh sek ding ahi. Zie chuh hun hungtung zel ding ale hun chengin na hih ding ahi, zie chuh Lalpa a dinga thiengtho pên ahi,” ti’n.

Mun Thiengtho Sekel

¹¹ Chun, Lalpa’n Mosi kawmah, “Israel chate zah na sim tieng leh, a um zah na sim bang zel chun mitin in a hinnau tatna chuh a piek zel ding uh ahi,

¹² amau haw na sim tak leh a lak u a hisie a lên loh na dingin.

¹³ Ziehi a piek ding u chuh ahi: simsa haw laka tel ding a chieh taphawt chun, mun thiengtho a sekel a piek sek u tawbang sekel kimkhat a piek dinguh ahi (sekel chuh gerah sawmnih ahi). Lalpa a ding chuom a thillat dingin sekel kimkhat.

¹⁴ Kuole, simsa haw laka tel dinga chieh taphawt, kum sawmnih apat chunglam chun Lalpa chanvo a piek dinguh ahi.

¹⁵ Na hinnau tatna ding a Lalpa chanvo thil na piek u chun mi neizo inle sekel khat sanga tam chuh a piek ding ahi puoh a, mi chagah inle zie sanga tawm zaw chuh a piek ding ahi diek puoi.

¹⁶ Israel chate tatna man dangka chuh la’n na tin, kihona puon-In etkawlna dinga na mat ding ahi. Na hinnau tatna ding a Lalpa ma a Israel chate chuh hetzing ahih theihna ding un nanga dinga tatna chuh hi’n a,” ti’n a gen a.

Sumeng Kuong

¹⁷ Chun, Lalpa’n Mosi kawmah, “Kisilna ding sumeng kuong, a luihna ding chule sumeng na siem ding ahi.

¹⁸ Zie chuh kihona puon-In leh maichâm kikala na kawih ding ahi a; zie tak achun tui na kawih ding ahi.

¹⁹ Zie taka chuh Aron leh a chapate’n a khut leh keng uh a sil sek ding uh ahi.

²⁰ Kihona puon-In sunga a lut tieng u leh ahim, maichâm a mei a thillat lân dinga a chieh tieng u leh a thih lohna dingun tui a chuh a kisil sek dinguh ahi.

²¹ Khutichun a thih loh na dingun a khut leh a kengteu chuh a sil sek ding uh ahi. Zie chuh amau dingin kumkhuo a amah leh a suonte leh, a suon kitte chan dinga dân hi’n a,” ti’n a gen a.

Kinuh ding Thau

²² Lalpa mah in Mosi kawmah,

²³ “Gimlim, lim pên chi murra tui sekel zanga leh, thingguithak gimlim, zie kimkhat sekel zanih leh sawmnga leh kawl chuh gimlim sekel zanih leh sawmnga leh,

²⁴ thingguithak chi dang sekel zanga, mun thiengtho a sekel a piek sek tawbang uh,

²⁵ olive thau hin khat tawh hun la’n la, gimlim siempa siem bangin thau nuh chuh thau thiengtho dingin na siem ding ahi: zie chuh thau nuh zat thau thiengtho hi’n a.

²⁶ Chun, kihona puon-In te, thuthun kawihna bawmte,

²⁷ dawhkhâng leh a bel chengcheng te, thaumei kawihna leh a matchâk te, gimlim hâlna maichâm te,

²⁸ hâlmang thilpiek maichâm leh a matchâk chengcheng te, kuong leh a luihna haw tawh, zie chun na nuh sek ding ahi.

²⁹ Chun, a thiengtho pên ahung hihtheihna dingun, na sukthiengtho ding ahi: bang hileh ziehaw sukha taphawt chuh hung thiengtho zel un au.

³⁰ Kei dinga thiempu nasema ei zenviel theihna ding un Aron leh a chapate chuh thau nuh in, na namdet ding ahi.

³¹ Chun, Israel chate kawmah, ‘Zie thau thiengtho hi na suonteu chanin ka nasem dingte nuh zel dinga mat hi’n a.

³² Mi vantâng chunga sun ding ahi puoh a, zie kisiem dân tawbang hin na siem ding le ahi puoi: ziehi vang a thiengtho ahi a, tichun nang u di’n le thil thiengtho hi ding ahi.

³³ Kuo’n le a kibatpih siem in ahim, midang, thiempu hilote dingin a na mang taleh, zie mi chuh ka mite lak apat satthak hi’n a,’ ti’n gen in,” a ti a.

Gimlim hâl Ding

³⁴ Lalpa’n Mosi kawmah, “Gimlim tak tak, stac te, onuka te, galbanum te la’n la; gimlim, lim tak begaw chîm tak tawh a kizah chietin lakhawm inla,

³⁵ zie chun gimlim siemte siem bangin chi a sawh, chîm leh thiengtho takin gimlim na siem ding ahi.

³⁶ A khenkhat chuh gawi nêl dimdem inla, ka hun hopih sekna ding kihona puon-In sung a thugawlh umna thingkuong masang a na kawih ding ahi; zie chuh nanga dingin thil thiengtho taka hi’n a.

³⁷ Chun, zie gimlim na siem ding, a siem dân ding banga siem chuh nang u a dingin na mat ding uh ahi puoi. Lalpa a dinga thiengtho a na ngaih ding uh ahi.

³⁸ Kuo’n le a gim nak ding mai a khutibang chuh a siem chun, zie mi chuh a chipihte laka apat a satthak hi’n a.” a ti a.