PAWTDAWKNA 29 - PATHIEN LEKHABU THIENGTHO (BSI)

Thiempu dinga Namdet Dan

¹ “Chun, thiempu na sema, kei a dinga zenvielna na a sep theihna ding un amau haw sukthienthona dingin a chung u ah hitibang hin na hih ding ahi: bâwngchal tuoi khat leh belamchal demna bei nih tawh,

² chângthâk chawl sawhloh tawh, chângthâk pêk chawl sawhloh thau kihel tawh, chângthâk pêk pan chawl sawhloh thau a mêk-hel tawh na siem ding ahi.

³ Ziehaw chuh bawm khat a kawih in, a bawm pum in bâwngchal leh belamchal nih chu tawh na hun piek ding ahi.

⁴ “Aron leh a chapate chuh kikhawpna puon-In kawt achun hun pui in, tui a na silthien ding ahi.

⁵ Chun, kivanna haw chuh hun la’n, Aron chuh puonâk tawh, thiempu puonâk chuol tawh, thiempu puonâk tawh, awmphaw tawh âksak in, thiempu puonâk gâkna, khutthiem taka gat chun na gâk ding ahi.

⁶ Chun, thiempu dielkawp chuh kawpsak in, lallukhuk chung achun lukhuk thiengtho chuh na khuksak ding ahi.

⁷ Tichun, thau nuh chi hun la’n la, a luchang a sunkhum in na nuh ding ahi.

⁸ “Chun, a chapate chuh hun pui in na tin, puonâk chuol na âksak ding ahi.

⁹ Chun, Aron leh a chapate chuh kâwnggak a gâk in, diel na kawpsak ding ahi; chun, thiempu hihna chuh kumkhuo a dingin namdetna chang tan au; tichun, Aron leh a chapate chun kumkhuo’n thiempu na chuh sem ta’n au.

¹⁰ “Chuleh, kihona puon-In mai achun bâwngchal na hun kaih ding ahi: Aron leh a chapate chuh bâwngchal lu chunga a khut u ngau in tin.

¹¹ Tichun kihona puon-In kawtkhak bula Lalpa masang achun bâwngchal chuh na na thah ding ahi.

¹² Chun, bâwngchal thisan chuh na khut in la’n na tin, maichâm kihaw chuh na khutzung a na nuh ding ahi; chun, thisan um nalai chuh maichâm bula na sunthak vek ding ahi.

¹³ Chun, asungthau chengcheng tawh, a thin tuom dida tawh, a kal nih leh a tuom thau haw tawh la’n la, maichâm achu na hâl ding ahi.

¹⁴ Bâwngchal sa leh a vun leh a êk vang chuh pawlama na hâl ding ahi, zie chuh gitloh a dinga thilpiek ahi.

¹⁵ “Belam chal khat le na hun kaih ding ahi; chun, Aron leh a chapate chuh zie belamchal lu chunga chuh a khut uh ngau in tin.

¹⁶ Belam chal chuh that in, a thisan chuh la’n na tin, maichâm chung chuh na theh kuol ding ahi.

¹⁷ Zie belamchal chuh na sem zak ding ahi a, a sung leh a kengte chuh sawp inla, a sa dangte tawh, a luchang tawh na kawih ding ahi.

¹⁸ Chun, belamchal chuh a pum in maichâm achun an thilpiek banga na hâl ding ahi. Lalpa a ding a mei a thillat gimlim chuh ahi.

¹⁹ “Chun, belamchal khat na hun kaih kit ding ahi; Aron leh a chapate chun belamchal lu chung a chun a khut uh ana ngau in tin.

²⁰ Tichun belamchal chuh that in na tin, a thisan chuh la’n na tin, Aron bil changlam lêk haw leh a chapate bil changlam lêk haw, a khut changlam khutpiu haw, a changlam kengpiu haw a na tat ding ahi a, chun, maichâm chung ning li achun thisan chuh na theh ding ahi.

²¹ Chun, maichâm chunga thisan huntieng leh thau nuh chi chuh la’n la, Aron leh a silhlechen haw leh, a chapate leh a kawm u a um chapate silhlechen haw chuh na thehkhum ding ahi; tichun, amah leh a silhlechen leh a chapate leh a kawma um a chapate silhlechen te chuh sukthiengtho hung hi ta’n a.

²² “Belam chal thau tawh, a mei thau tawh, asungthau tawh, a thin tuom dida tawh, a kal nih leh a chunga thaute tawh, a dâk changlam tawh na lâk ding ahi; zie chuh kipiekna belamchal ahih ziekin.

²³ Chun, Lalpa masanga chângthâk chawl sawhloh bawm apat in chângthâk tang khat leh chângthâk pêk sathau kihel khat tawh chângthâk pêk neu khat la’n la,

²⁴ Chun, ziehaw chuh Aron khut leh a chapate khuthaw achun kawih inla, Lalpa ma a pei thillat dinga na pei ding ahi.

²⁵ Chun, zie chuh a khut u apat la’n na tin, Lalpa dinga gimlim dingin maichâm a hâlmang thillat behlapna a na hâl ding ahi; zie chuh Lalpa dinga mei a thillat ahi.

²⁶ “Chun, Aron hih thienthona belamchal âwm chuh la’n na tin, Lalpa ma a pei thillat dinga na pei ding ahi; zie chuh nang chanvo ding hi’n a.

²⁷ “Chun, Aron leh a chapate chuom a dinga sukthienna belamchal âwm, pei thillat leh khaihkang thillat a, a malpi peisa leh khaihkangsa chuh na kawih thientho ding ahi. Aron leh a chapate chanvo ahih ziekin.

²⁸ Zie chuh Israel suonte apat a kumkhuo a Aron leh a chapate chanvo dinga guot hi’n a; zie chuh khaihkang thillat ahi ngâla; chamna thillat a a kithawihna teu laka Israel suonte’n a khaihkang thillat ding u chuh hi’n a, Lalpa dinga khaih thillat ngêi u chuh a malpi thiempute dinga a piek ding uh hi ka dân kithenglo ding chuh ahi. Ziehi kei Lalpa kawma mipite thilpiek chuh ahi.

²⁹ “Aron thiempu silhlechen haw chuh a nunga a chapate’n hun luoh zel in au, ziehaw achu a kivan u a, thau nuh leh sukthientho a hih theihna ding un.

³⁰ Chun, a thasanga a chapa thiempu nasem dinga guot chuh, kihona puon-In a zenviel ding a munthiengtho a a lut tieng leh ni sagih sung chuh kivan in a um ding ahi.

³¹ “Chun, namdetna belamchal sa chuh hun la’n na tin, a sa chuh munthiengtho a na huon ding ahi.

³² Tichun, Aron leh a chapate chun belamchal sa leh bawma chângthâk pêk haw chuh kikhawpna puon-In kawtkhak bula chuh a nek ding uh hi.

³³ Zie kichamna thil, amau haw namdetna ding a leh sukthienthona dinga piek haw chuh a nek ding uh ahi. Amahvang chuh thil thiengtho a hih ziekin pawlam mi’n a nek ding uh ahi puoi.

³⁴ Zie namdetna sa ahim, chângthâk ahim chuh a zingkal tienga a val a na um chun, a val chuh meia na hâlmang ding ahi: zie chuh thil thiengtho a hih ziekin nek ding ahi puoi.

³⁵ “Tichun, zie thu cheng hi ka hun piek bang tak hin Aron leh a chapate chung achun na hih ding ahi: Ni sagih amau haw na kawihchuom ding ahi, ni sagih sunga chuh na namdet ding ahi.

³⁶ Ni chengin gitloh kithawihna thilpiek bâwngchal kichamna dingin na piek ding ahi. Zie chun maichâm chuh na hih thientho ding ahi. A thienthona dinga thau na nuh ding ahi.

³⁷ Ni sagih sung chuh maichâm a dinga tatna na siem ding ahi a, na hih thientho ding ahi a; tichun, maichâm thil thiengtho pên hung hi’n tin, maichâm sukha tapoh chuh hung thiengtho zel un au.

Ni chenga Thilpiekte

³⁸ “Khutichun, maichâm chunga na lat ding chuh ziehi ahi; belamno kum khat a upa nih zel ni chenga na lat ding ahi.

³⁹ Belamno khat chuh zingkal lama lat ding ahi a; belamno dang chuh nitâk lam leh lat ding ahi.

⁴⁰ Belamno khat lat na ding achun changbuong nêl tak epha mun sawma khena mun khat olive thau kithawk hin mun li a khena mun khat tawh kichawkhel na tel sak ding ahi; dâwn ding thillat dingin uain hin mun li a khena mun khat tawh.

⁴¹ Belamno khat chuh nitâk lama na lat ding ahi a, zie a chu zing lama nek ding thillat dân bang leh dâwn ding thillat dân bangin, gimlim, Lalpa dinga meia thillat dinga na lat ding ahi.

⁴² Zie chuh na suonteu chana kihona puon-In kawtkhak bul a Lalpa ma a hâlmang thillat hih zing ding ahi.

⁴³ Zie tak achun Israel mipite le hun hopih sek ing ka ting; tichun puon-In chuh ka lopina a sukthientho hung hi’n a.

⁴⁴ Kikhawpna puon-In leh maichâm chuh suthiengtho ing ka ting: Aron leh a chapate chuh kei a dinga thiempu nasem a zenvielna na a sep theihna ding un hih thiengtho ing ka.

⁴⁵ “Tichun, Israel chate lak achun chêng ing ka ting, chun, a Pathien uh hi’ng ka.

⁴⁶ Khutichun, amau haw laka ka chên theihna ding a Aigupta gam apat a puidawkpa Lalpa a Pathien uh chuh ka hi tih hun he’n au: kei Lalpa a Pathien uh ka hi hi.