PAWTDAWKNA 28 - PATHIEN LEKHABU THIENGTHO (BSI)

Thiempute Kivanna Ding

¹ “Chun, na suohpihpa Aron leh a chapate, Nadab leh Abihu, Eleazar leh Ithamar te chu pui in la, Israel chate laka ka thiempu na a sep theih na dingun kawih chuom in.

² Chun, na suohpihpa Aron dingin kivanna thiengtho, a sulopi ding leh a suhawih dingin na siem sak ding ahi.

³ Chun, mi khutthiem haw, hihtheihna ka piekte chengcheng chuh sam inla, Aron chun thiempu nasep na chuh kei a dinga thiengtho taka a sep theihna dingin a kicheinahaw chuh siem sak u hen.

⁴ A silhlechen a a siem ding hawu chuh awmphaw, thiempu puonâk, puonâk chuol, puonâk pawl chitchet tawh, thiempu dielkawp leh kâwnggak tawh hiding ahi. Na suohpihpa Aron leh a chapate chuh thiempu na kei a dinga a sep theihna ding un silhlechen thiengtho a siem sak ding uh ahi.

⁵ Chun, khutthiem mite chun, sana te, patdum te, pat sandup leh sandângte, patngat puonkawp te manga a siem ding uh ahi.

⁶ “Chun, amau chun thiempu puonâk chuh sana khau te, patdum te, sandupte, sandângte, patngat puonkawp te manga thiemnel taka a siem ding uh ahi.

⁷ Zie puonâk mawng nung lam leh malam achun, a tumat dingin dâlbak nih siem ding ahi; a kimat zing theihna dingin.

⁸ Chun, puonâk chunga kâwnggak ding, themthiem taka gat, zie puonâk puon man chuh tawn khat hi suok kêi mat ding ahi; zie chuh sana tawh, patdum tawh, sandup tawh, sandâng tawh, patngat puonkawp a gat ding ahi.

⁹ Chun, onix suong nih na lâk ding ahi a, zie achun Israel cha sawmlenih te min na chuon sak ding ahi.

¹⁰ suong khat achun a min uh gup, chun, suong dang khat achun a um nalai gup min chuh a pien dân bang zel un na chuon sak ding ahi.

¹¹ Min namna a chuong tawbang, suong zik thiem in a zik tawbang hin Israel chate min bang zelin suong nih achun na zik ding ahi; sana suong chuh tâk dinga na siem ding ahi.

¹² Chun, zie suong nih chuh Israel suonte hetzingna dingin thiempu puonâk liengko gel a chuh na belh ding ahi; tichun, Aron chun hetzingna dingin Lalpa ma ah amin hawu chuh a liengko nih tuok achun bât ina.

¹³ Chun, sana khau chuh phêk in na tin;

¹⁴ sana thieng a siem kidawngvawh diet diet nih tawh, khauhuol guola hêk in na siem ding ahi; chun, zie kidawngvawh diet diet kihekhaw chuh a kiphêk chu tawh na zawp ding ahi.

Thiempu Awmphaw

¹⁵ “Chun, awmphaw thiemnel takin mithiemte siem sak in la; thiempu puonâk siem banga kha na siem ding ahi; sana patzangte, patdumte, sandupte, sandângte, patngat puonkawpte manga na siem ding ahi.

¹⁶ Ning li nei a kisiem, a thuoh ding ahi, a dunglam khâp khat, a vailam le khâp khat hi ding ahi.

¹⁷ Chun, zie achun suongmantam tien li na zeh tel ding ahi: tien khatna chuh sardius, topaz leh carbuncle hi’n tin;

¹⁸ chun, tien nihna chuh emerald te, sapphire te, diamond te hi’n a;

¹⁹ chun, tien thumna chuh jacinth te, agate te, amethist te hi’n tin,

²⁰ tien lina chuh beryl te, onix te, jasper te a hi’n tin: sana a tuomkhum ding ahi.

²¹ Chun, zie suong sawmlenih achun Israel chate min aban banin zik in na tin, min namna a zik tawbanga kigeikuok chietin nam sawmlenih te min a um ding ahi.

²² Chun, awmphaw chung achun sana thieng kiphêk, kidawngvawh diet diet na siem ding ahi.

²³ Zie awmphaw chung achun sana kikuol nih na siem ding ahi a, zie kikuol nih chuh awmphaw mawng tuok achun na vawh ding ahi.

²⁴ Sana kidawngvawh diet diet nih chuh awmphaw mawngtuok a kikuol nih achun na thun ding ahi.

²⁵ Zie kidawngvawh diet diet kiphek mawng tuok chuh sana pat kiphêk nih achun na zawp ding ahi a, zie chuh thiempu puonâk malam a dâlbak achun na thiet den ding ahi.

²⁶ Chuleh sana kikuol nih na siem ding ahi a, zie chuh thiempu puonâk sunglam panga awmphaw ning tuoka chuh na vawh ding ahi.

²⁷ Zielo chun sana kikuol nih siem beh in na tin, ziehaw chuh a malam a thiempu puonâk kidalbakna nih nuoi lam pang a kizawpna kieng, thiempu puonâk gâkna, thiemtak a gat chunglam achun na vawh ding ahi.

²⁸ Chun, awmphaw a sana kuol chu tawh thiempu puonâk a thikkuol chu khauhuol a na khih mat ding ahi; tichun, thiemnel taka kigat Thiempu puonâk chunga chuh a um zing theih na dingin. Chun, awmphaw chuh Thiempu puonâk tawh a kikhenloh ding ahi.

²⁹ “Khutichun, Aron chuh munthiengtho a a lut tak leh, Lalpa masanga a hetzing theihna dingin a lungchang zawn tak ah vaihawmna awmphaw achun Israel namte min chuh a puok zing ding ahi.

³⁰ Chuleh, zie vaihawmna awmphaw achun Urim leh Thumim na kawih ding ahi a; zie chuh Aron chuh Lalpa ma a chieh tieng chuleh Israel chate vaihawmna chuh a lungchang zawna a kawih zing ding ahi.

Thiempu Kivanna Ding Thil dang

³¹ “Chun, thiempu puonâk, puonâk chuol adum thieng kêi na siem ding ahi.

³² Alai tak chuh luchang thawl na hihvan ding ahi a; zie a avanna kimvel chuh a siet zieng theih lohna dingin, puonâk banbûl bangin a gei chuh na kîm ding ahi.

³³ Chun, a mawng kimvel achun, vaimimthei lim, adum, a sandup leh a sandâng a na siem ding ahi.

³⁴ Chun, puonâk chuol mawng kimvelhaw achun sana lawngcha khat leh vaimimthei khat kikal hel in na siem ding ahi.

³⁵ Aron chun zenvielna na a sep tieng leh khutibanga chuh a kivan ding ahi: tichun, munthiengtho a Lalpa umna a lut leh a pawt kit tak leh a git chuh zak theih hiding ahi, khutichun, thilo ding ahi.

³⁶ “Chun, sana thieng pêk khat siem in la, achung a chun min namna a chuong tawbang ‘Lalpa ADING A THIENGTHO’ tih na chuon sak ding ahi.

³⁷ Zie chuh patkhau duma thiempu dielkawp a na gâk den ding ahi, thiempu dielkawp malam panga chuh belh ding ahi.

³⁸ Aron in zie chuh a chalpâng ah belh intin, tichun, kei Lalpa hin Israel chate’n kei a hima a piek thiengthoteu chuh pawm sak ing ka ting, ka mipite’n a thilpiek chungchâng u a thil bang ahim khat a na sukhiel mah leule pawm sak ing ka.

³⁹ “Chun, Aron a dingin patngat puonâk zem hawih tak na gat ding ahi, chuleh, patngat puonnêm takin thiempu lukhuk na siem ding ahi a, chun, kâwnggak chuh a zem hawihtak a pin a na khuih ding ahi.

⁴⁰ “Chun, Aron chapate ding chun puonâk na siem sak ding ahi a, chun, kawnggakte, dielte le na siem sak ding ahi, a sulopi ding leh a suhawih dingin.

⁴¹ Ziehaw chun na suohpihpa Aron leh a chapate chuh na thuom ding ahi; kei dinga thiempu na sem a, zenvielna a sep theihna ding un, amau haw chuh thau nuh in, kawihchuom in, na hih thientho ding ahi.

⁴² Chun, a taksau sangawn khuhna dingin patngatpuon pheika nuoi na siem sak ding ahi; kâwng apat a malpi tung hi hen;

⁴³ Zie chuh Aron leh a chapate ka umna puon-In a a lut tieng u leh, mun thiengtho a thiempu na sem dinga maichâm kawma a chieh tak u leh a âk zel ding uh ahi; khutilochun gilo a ngaih hiu intin, thi kha’n au; zie chun Aron leh a nunga a suonte chanin le kumkhuo a dinga dân det hi’n a.