PAWTDAWKNA 27 - PATHIEN LEKHABU THIENGTHO (BSI)

Hâlmang Maichâm

¹ “Chun, Thinggi thinga maichâm na siem ding ahi, a dunglam tawng nga, a vailam tawng nga a na siem ding ahi; zie maichâm chuh ning li nei hi ding ahi; chun, a sânlam chuh tawng thum hi ding ahi.

² A ning li chiet achun a kihaw na siem ding ahi: maichâm tawh zie a kihaw chuh kimat suok ding ahi: sumeng ti a na luonkhum ding ahi.

³ Chun, meivam dawhna belhaw, vutluokna haw, kuonghaw, sa suokdawkna thik zum haw, meilakna haw na siem ding ahi; zie matchâk chengcheng chuh sumeng a na siem ding ahi.

⁴ Chun, zie maichâm a ding chun sumeng lên na siem ding ahi; chun zie lên ning li haw achun sumeng kikuol li na siem ding ahi.

⁵ Zie chuh maichâm dawhkhâng nuoi lam kimvel achun na zak ding ahi, zie lên chun maichâm kimkhat chuh a khuh theihna dingin.

⁶ Chuleh, maichâm chawnvielna dingin, thinggi thing zawl nih na siem ding ahi a, zie chuh sumeng ti a na luonkhum ding ahi.

⁷ A zawnna haw chuh a bil achun na thunlut ding ahi, tichun a zawl haw chuh zawnna dinga maichâm sîk tuoka chuh a ûm gel ding ahi.

⁸ Maichâm chuh thingpek in um in na tin, a hawm na siem ding ahi: tânga ka hun etsak bangtak a kha na siem ding ahi.

Lalpa Umna Puon-In Huongsung

⁹ “Chun, Hobuk chuh a umna huongsung na siem ding ahi; simlam pang achun, a sîk khat a ding chun a huongsung a puonzak dingte, patngatpuon, a kawpa siem tawng zakhat a sau hi ding ahi.

¹⁰ Zie a ding chun khuom sawmnih leh sumeng geikuok sawmnih a um ding ahi; khuoma a tukmatnahaw leh a puon banna zawl haw chuh dangkathîk a hih ding ahi.

¹¹ Khutibang mah chun, mâllam dawh huongsung puonzak ding haw chuh tawng zakhat a sau hi’n tin, zie a ding chun khuom sawmnih leh sumeng geikuok sawmnih a um ding ahi; khuoma a tukmatnahaw leh a puon banna zawl haw chuh dangkathîk ahih ding ahi.

¹² A tumlam pang huongsung vailam puonzak ding haw chuh tawng sawmnga a sau hi ding ahi, a khuom sawm leh a kingakna geikuok sawm tawh.

¹³ A suohlam pang achun a huongsung vailam puonzak ding chuh tawng sawmnga a sau hi ding ahi.

¹⁴ Kawtbieng langkhat a puonzak ding haw chuh tawng sawmlenga a sau hi ding ahi; a khuom thum leh a kingakna geikuok thum a um ding ahi.

¹⁵ A kawtbieng langkhat a puonzak zak ding haw chuh, tawng sawmlenga a sau ahih ding ahi; a khuom thum leh a kingakna geikuok thum um ding ahi.

¹⁶ A huongsung kawtkhaka zak ding tawng sawmnih a sau, patngat puonkawp haw, a dumhaw, a sanduphaw, a sandângte mang in puon khuih thiemtak khuih tawh a um ding ahi; a khuom li leh a kingakna geikuok li a um ding ahi.

¹⁷ Chuleh, a huongsung khuom chengcheng chuh dangkathîk a zem suok kêi ding ahi a, a tukmatna haw chuh dangkathîk a hih ding ahi a, a kingakna geikuok chuh sumeng hi ding ahi.

¹⁸ A huongsung sauhlam chuh tawng sawmnga hi’n tin, chun, a sânlam chu tawng nga hi’n tin, patngat puonkawp a ûm hi’n tin, a kingakna geikuokhaw chu sumeng hi ding ahi.

¹⁹ Chun, hobuk sakna chengcheng a matchâk chengcheng leh, a kilhmatna chengcheng leh, a huongsung kilhmatna chengcheng chuh sumeng ngên hi ding ahi.

Thaumei Etkawl dân Ding

²⁰ “Chun, thaumei chuh bangtik lai ale det a hih zing theihna dingin olive thau hawihpente na kawma hun chawi sek dingin Israel chate chuh thu na piek ding ahi.

²¹ Aron leh a chapate chun, ka umna puon-In sung a thugawlh umna bawm kawihna puonzak pawlam achun a det sek ding uh ahi. Zie taka ka umna chuh nitâk apat in zingkal chanin a det sek dinguh ahi. Zie thupiek hi Israel chate leh a suonteu in kumkhuo a dettaka a zuih dinguh ahi.