PAWTDAWKNA 26 - PATHIEN LEKHABU THIENGTHO (BSI)

Pathien Chenna Hobuk

¹ “Ziehaw bân achun, Hobuk chuh puonzak sawm nei a na siem ding ahi; patngat puonkawp a dumte, a sandupte, a sandângte, mang in cherub lim khutthiem tak a siem chuon sak ding ahi.

² Puonzak chuh a sauhlam tawng sawmnih leh giet chiet hi henla, a vailam tawng li chiet hi henla, puonzak chengcheng chuh kichan chiet ding ahi.

³ Puonzak ngate chuh kizawp ding ahi a; chun, puonzak dang ngate chule a kizawp ding uh ahi.

⁴ Chun, puonzak bawng khat mawng gei achun a bil a duma pawl na siem ding ahi a; khutibang mah in puonzak bawng khat mawng lehlam achun le na siem ding ahi.

⁵ Puonzak khat achun bil sawmnga na siem ding ahi a; puonzak nih na kizawpna achun le a bil sawmnga na siem ding ahi a, zie bilhaw chuh a kizawn chiet ding uh ahi.

⁶ Chun, sana ti’n kawihtuohna ding sawmnga na siem ding ahi a, a kilhmatnahaw chun puonzak haw chuh na kilhmat ding ahi; zie chuh Hobuk khat hung suok ina.

⁷ “Chun, Hobuk chung khuhna dingin kelmul puonzak haw na siem ding ahi; puonzak sawm leh khat na siem ding ahi.

⁸ Puonzak chuh a dunglam tawng sawmthum chiet, hi ding ahi a, a vailam chuh tawng li chiet hi ding ahi; puonzak sawmlekhatte chuh kichan chiet ding ahi.

⁹ Tichun, puonzak ngate chuh khuih zawp ding ahi a, puonzak gup chule khuih zawp ding ahi, puon-In malam ah puonzak gupna chuh a kithuohpel ding ahi.

¹⁰ Chun, puonzak bawng khat gei achun bil sawmnga na siem ding ahi a, puonzak bawng lehlam gei achun le bil sawmnga na siem ding ahi.

¹¹ Chun, a kilhmatna chuh sumeng in sawmnga na siem ding ahi a, zie kilhmatna chuh puon gei a a bil achun na vawh ding ahi a, In khat ahung hih theihna dinga puon-In chuh thuoh mat ding ahi.

¹² Chun, puon-In puonzak mawng val kaitha kimkhat chuh hobuk intawm a kaihthak sak ding ahi.

¹³ Chun, puon-In puonzak dunglam mawng tuoka tawng khat gêl gêl val chuh, hobuk hâp tuok khuhna’n a kaihthak ding ahi.

¹⁴ “Chun, belamchal vun huonsan in, puon-In chung khuhnate, savun in a chunga khuh sawnna te, na siem ding ahi.

¹⁵ “Chun, Hobuk khuom ding chun thinggi thing zang tak mang inla.

¹⁶ A sauhlam chuh tawng sawm hi henla, a letlam chuh tawng khat leh a kim chiet hihen, a hawm nih chiet siem in,

¹⁷ Khutia chuh zie guhte chuh a kitukmat theihna ding un. A khuom chung achun zie kitukmatna ding hawm chuh a neih chiet ding ahi.

¹⁸ Chun, Hobuk simlam pang a ding chun ban lepkhawm sawmnih na siem ding ahi.

¹⁹ Chun, zie ban lepkhawm sawmnih kingakna ding chun dangkaguo tang sawmli na siem ding ahi; a keng nih a dingin ban lepkhawm khat kingakna ding geikuok nih leh a keng nih a dingin ban lepkhawm dang khat kingakna geikuok nih na siem ding ahi.

²⁰ Chun, Hobuk sîk lehlam mâllam panga ding chun ban lepkhawm sawmnih na siem ding ahi.

²¹ Zie a ding chun dangkaguo tang sawmli geikuok tawh, ban lepkhawm khata ding kingakna geikuok nih leh ban lepkhawm dang khat a ding kingakna geikuok nih le na siem ding ahi.

²² Chuleh hobuk tawm tumlam pang a ding chun a guhpi gup na siem ding ahi.

²³ A tawmlam ning tuok a ding chun ban lepkhawm nih na siem ding ahi.

²⁴ Chun, a nuoi lam a chuh zawp ding ahi, khutibang mah chun a sip lam bil masapen chanin hih suok ding ahi: khutibang a chuh a nih a hih gêl gêl ding ahi; ziehaw chuh a ning nih a ding chuh hi ding ahi.

²⁵ Khutichun khuom giet, a kingakna ding dangkathîk geikuok sawmlegup tawh um ding ahi; khuom khat a dingin kingakna geikuok nih, khuom dang a dingin kingakna geikuok nih zel tawh.

²⁶ “Chun, thinggi thing in bâng guh, hobuk bâng sîk khat mat dingin nga, hobuk bang sîk khat mat khawm dingin nga mah.

²⁷ Chun, hobuk In tawm tumlam pang ban lepkhawm a dingin le nga na siem ding ahi.

²⁸ Bâng guh laita khuom tumat pên chuh khuom tawppen apat a a langkhat tâwp chanin a tunpai ding ahi.

²⁹ Chun, khuom haw chuh sanati a na luonkhum ding ahi, bâng guh haw thunna dingin sanati a a bil na siem ding ahi: zie bâng guh haw chuh sanati a na luonkhum ding ahi.

³⁰ Khutichun, tâng chunga a lim ka hun etsak bang taka khah hobuk chuh na sak ding ahi.

³¹ “Chuleh puonzak ding patngat puonkawp haw, a dumhaw, a sanduphaw, a sandâng haw mang in mi themthiem tak siem cherub lim chuonga na siem ding ahi.

³² Zie chuh thinggi khuom li sanati a luonkhum a chuh na zak ding ahi, a bânna chuh sana a siem ding ahi; chun dangkaguo tang geikuok li a phuh ding ahi.

³³ Zie puonzak chuh puonzak kilhmatna nuoi lam a chuh na zak ding ahi a; puonzak sung lam achun Thuthun Bawm chuh na kawih lut ding ahi; tichun, puonzak chun mun thiengtho leh mun thiengtho pên chuh hun daidan sak ina.

³⁴ Chun, zahngaihna chutphah chuh munthiengtho pên a thuthunna bawm chunga chuh na kawih ding ahi.

³⁵ Chun, puonzak pawlam achun dawhkhâng na kawih ding ahi a, hobuk simlam pang dawhkhâng zawn achun thaumei kawihna na siem ding ahi: chun, dawhkhâng chuh mâllam pang achun na kawih ding ahi.

³⁶ “Chun, puon-In kawtkhaka zak ding patngat puonkawp haw, a dumhaw, a sanduphaw, a sandâng haw mang in puon khuih thiemtak in pin a khuih na siem ding ahi.

³⁷ Chun, puonzak zakna ding chun thinggi khuom nga na siem ding ahi a, ziehaw chuh sanati a na luonkhum ding ahi; a banna chuh sana a siem hiding ahi; zie tunna ding chun sumeng geikuok nga na sun ding ahi.